Теуцожь Юрэрэ Мариетрэ мэз хъызмэтым зыщылажьэхэрэр лIэшIэгъуныкъо фэдиз хъугъэ. Зэшъхьэгъусэхэм ящыIэныгъэ ащ фагъэшъошагъэу гъэхъэгъэ гъэнэфагъэхэр ашIыгъэх, Адыгеим имэз хъызмэт зезыгъэIэтыгъэхэм ащыщых. Ежьхэм ямызакъоу, къакIэлъыкIогъэ лIэ­уж­хэр мэз хъызмэтым хэщэгъэнхэм яIахьышхо халъхьагъ.

Мариет мэз хъызмэтым ишъолъыр диспетчерскэ къулыкъу иподразделение ипащ, мыщ зыщылажьэрэр илъэс 43-рэ хъугъэ. Ишъхьэгъусэу Теуцожь Юрэ илъэс 40 ащ Iоф щишIагъ, АР-м изаслуженнэ мэзлэжь, джы зыгъэпсэфыгъом щыI, аужырэ илъэс 30-м мэзпэсэу Iоф ышIагъ. Ахэр нэIуасэ зыщызэфэхъугъэхэр Апшеронскэ мэз техникумым щеджэхэ зэхъу лъэхъаныр ары. Юрэ — Воронеж имэзтехническэ академие, Мариет — Мыекъопэ къэралыгъо технологическэ университетым мэз хъызмэтымкIэ ифакультет къаухыжьыгъэх. Хахыгъэ лъа­-
гъом ушэтыпIэ зэфэшъхьафхэм ащыпхырыкIыгъэх. Мэзым хэт чъыгхэр узхэм, хьацIэ-пIацIэхэм, машIом ащыухъумэ­гъэнхэр, чъыгыкIэхэр гъэтIысхьэгъэнхэр пшъэрылъ шъхьаIэу илъэсипшI пчъагъэ­хэм яIагъ. ЯIофшIэн гухахъоу хагъуатэрэр ясабыйхэми янэрылъэгъугъ. Акъоу Сэ-
фэр мэз хъызмэтыр IофшIэнкIэ хихы­гъэу илъэс 15 хъугъэ зыхэтыр. Ар Первомайскэ мэз хъызмэтшIапIэм иотдел ипащ. Мэз хъызмэтым унагъор хэщагъэ хъугъэу, шъхьадж ипшъэрылъхэр щигъэцIакIэзэ къехьы.
Мариет мэз хъызмэт еджапIэхэм язы­къегъэIэтыжьын иIахьышхо хилъ­хьагъ.
— Мэз хъызмэт еджапIэхэм илъэс 50-м къехъу аныбжь, — хегъэунэфыкIы Теуцожь Мариет. — 1997-рэ илъэ­сым щыублагъэу ахэр республикэм щызэхэщэгъэнхэм сыдэлэжьагъ. Мэз хъызмэтшIапIэу 4 Адыгеим ит: Гъозэрыплъэ, Мыекъопэ, Первомайскэ ыкIи Красно­гвардейскэ хъызмэтшIапIэхэр. ЧIыопсым, мэзхэм якъэухъумэн ахэр игъэкIотыгъэу дэлажьэх. А IофшIэнхэм кIэлэеджакIохэр хэтэщэх. Мэзыр гъэкIэ­жьыгъэнымкIэ, чъыгхэр щыгъэтIысхьэгъэ­нымкIэ IофшIэнхэм, къэралыгъом щызэхащэрэ зэнэкъокъу зэфэшъхьафхэм ныбжьыкIэхэр ахэлажьэх. Джащ фэдэу 2015-рэ илъэсым Урысые кIэлэцIыкIу зыгъэпсэфыпIэ гупчэу «Орленкэм» щызэхащэгъэгъэ зэнэкъокъум Первомайскэ мэз хъызмэтшIапIэм дэлэжьэрэ еджапIэм икIэлэеджакIохэр сщэгъагъэх. Я 3-рэ чIыпIэр къыщахьыгъ. 2004-рэ илъэсым мэз хъызмэтым иеджапIэхэм язэфэсэу Москва щыкIуагъэм Первомайскэ ыкIи Мыекъопэ мэз хъызмэтшIапIэхэм адэлэжьэрэ еджапIэхэм якIэлэеджакIохэр хэзгъэлэжьагъэх.
Мариетрэ Юрэрэ якъорэлъфэу Руслъа­ни, ятэу Сэфэр фэдэу, мэзым фэщагъэ хъугъэ ыкIи мэз хъызмэтым щылэжьэным джырэкIэ кIэнэцIы. «Ау хихыщт сэнэхьатыр джыри къэшIэгъуае», — еIо Ма­риет.

Сабыйхэм яцIыкIугъом щыублагъэу чIыопсым икъэухъумэн епхыгъэу узэрадэлэжьэн, шIэныгъэ икъухэр ябгъэгъо­тын зэрэфаер хегъэунэфыкIы.
— Спутник амалхэр къызфэдгъэфедэхэзэ, республикэм ит мэзхэм чэщ-­зымафэм зэпымыоу талъэплъэ ыкIи ащы­щэу машIо къызщыкIанэрэр тэлъэгъу. НэмыкI шъолъырхэм къащыхъухэрэри ары. ГумэкIыгъо къызыхъукIэ, ошIэ-дэмышIэ IофхэмкIэ къулыкъум, мэз хъыз­мэтшIапIэхэм тафытео. Ащ пае IофшIапIэм сычIэкIын сыфитэп. Пчыхьэм сыхьа­тыр хым, сызэблэзыхъущт диспетчерыр къэкIо. ТелефонкIэ бэ къытфытеорэр. ГущыIэм пае, 2025-рэ илъэсыр къызихьагъэм къыщыублагъэу чIыпIэ 202-мэ ма­шIом закъыщиштагъэу дгъэунэфыгъэ. Ахэр мэкъумэщ лэжьыгъэшIапIэх. Мэзым машIо къыщыхъугъэу зэ дгъэунэфыгъ. МэшIогъэкIосэ къулыкъоу мэз хъызмэтымкIэ ГъэIорышIапIэм хэтым псынкIэу макъэ едгъэIугъ. Иегъэшхо къэмыкIоу машIор агъэкIосэжьыгъ.
Мариет ипшъэдэкIыжь зэрэиныр зэхешIэ. Зыщылэжьэрэ мэз хъызмэтым ишIуагъэ къыщигъэкIоным ишъыпкъэу пылъ. Гъэхъагъэу ышIыгъэхэм апае Уры­сыем имэз хъызмэт ыкIи мэз хъызмэтымкIэ УФ-м и Департамент ящытхъу тхылъхэр, АР-м и ЛIышъхьэ и Рэзэныгъэ тхылъ къыфагъэшъошагъэх. Непэрэ ма­фэхэми ипшъэрылъхэм хэз афи­мышIэу егъэцакIэх.
Мариет унагъом иджэныкъо иухъумакIу. Теуцожь Мариетрэ Юрэрэ япхъо­рэлъфэу Самирэ гурыт еджапIэр мыгъэ дышъэ медалькIэ къыухыгъ, медицинэр ыгукIэ къыхихыгъэу апшъэрэ еджапIэм чIэхьанэу зегъэхьазыры. Унэгъо зэ­кIу­жьым илIэужыкIэхэр лъэкIуатэх. Лъэпкъым инеущырэ мафэ зыгъэпсыщтхэм ясатырэ хэуцощтых.
Тэу Замир.