2025-рэ илъэсым бэдзэогъум и 6-м сыхьатыр 18.00-м Адыгэ Республикэм и Къэралыгъо орэдыIо ыкIи къэшъокIо ансамблэу «Ислъамыем» концертэу къытыщтым шъукъырегъэблагъэ.

БлэкIыгъэм ыкIи непэрэ мафэхэм ягушIуагъо зэхэшъушIэн шъулъэкIынэу орэдым, къашъом ыкIи тари­хъым ямэфэкI шъукъыхэлажь.
«Ислъамыем» программэ гъэшIэгъонэу «Сила песни, энергия танца» зыцIэр къыгъэлъэгъощт. Ащ хэтыщтых классическэ орэдхэм ямызакъоу, адыгэ культурэм ибаиныгъэ къизыIотыкIырэ орэдыкIэхэри. Адыгэ шэн-хабзэхэм ядунай ухащэзэ узыIэпызыщэрэ мэкъамэхэр къырагъэIощтых ыкIи къэшъо гъэшIэгъон­хэр къашIыщтых ансамблэм иартист IэпэIасэхэм. МэкъамэмкIэ ыкIи къашъомкIэ къыраIотыкIырэ номер пэпчъ тарихъ гъэшIэгъон пылъ.
Лъэпкъ искусствэм идэхагъэ цIыфхэм зэхашIэным, агу къинэжьыным ансамблэм иамалхэр рихьылIэ-
щтых.
Концертыр «Налмэсым» иунэ щыкIощт.