Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иIофышIэхэмрэ Адыгэ Республикэм хэгъэгу кIоцI Iоф­хэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуе­кIогъэнымкIэ и ГъэIорышIапIэрэ зэгъусэхэу къыхагъэщыгъ зэхэщэгъэ бзэджэшIэ купым чIычIэгъ баиныгъэхэр зэриты­гъугъэхэр.

ЗэрагъэунэфыгъэмкIэ, Адыгэ Республи­кэмрэ Краснодар краимрэ ащыпсэурэ нэбгыритфым бзэджэшIэгъэ Iоф зэкъуа­дзагъ. Мылъку къэкIуапIэу къыхахыгъэр чIычIэгъ баиныгъэхэр тыгъугъэнхэр ары. Тэхъутэмыкъое районым ихъызмэтшIапIэхэм ащыщ горэм ичIыгу Iахь бэджэндэу зыштэгъэ организацием илIыкIо бзылъфыгъэу, илъэс 42-рэ зыныбжьэу а бзэджэшIэ купым хэтым хэбзэнчъэу а чIыгу Iахьыр къаритыгъ. ЯщыкIэгъэщт техникэр къызIэкIагъахьи, мыжъо-пшэхъо зэхэлъыр къычIахымэ, IуагъэкIэу аублагъ. 2024-рэ илъэсым гъэтхапэм къыщегъэжьагъэу 2025-рэ илъэсым жъоны­гъуакIэм нэс кубическэ метрэ мин 16-м ехъу чIычIэгъ баиныгъэу ахэм атыгъугъ. ПстэумкIи сомэ миллиони 5 фэдиз ащ къафыхэкIыгъ.
ХэбзэухъумакIохэм къаугъоигъэ мате­риалхэмкIэ Адыгэ Республикэм хэгъэгу кIоцI IофхэмкIэ и Министерствэ и Следст­веннэ гъэIорышIапIэ иследственнэ къута­мэ уголовнэ Iоф къызэIуихыгъ. Урысые Федерацием и Уголовнэ кодекс ия 158-рэ статья ия 4-рэ Iахь къыдилъытэрэ бзэджэшIагъэр («Тыгъуагъэх») ахэм зэ­рахьагъэу ылъытагъ. Статьям къызэрэщиIорэмкIэ, илъэси 10 хьапс атыралъхьан алъэкIыщт.
Мы лъэхъаным бзэджашIэхэр къаубытыгъэх. Зэхэфын Iофхэр макIох. Урысыем щынэгъончъэнымкIэ и Федеральнэ къулыкъу и ГъэIоры­шIапIэу
Адыгэ Республикэм щыIэм ипресс-къулыкъу