Адыгэ Республикэм и Сурэт ­къэгъэлъэгъуапIэ загъэпсыгъэр илъэс 45-рэ зэрэхъурэм фэгъэ­хьыгъэ мэфэкI къэгъэлъэгъон ащ къыщызэIуахыгъ.

IофшIэгъи 100 фэдиз ащ хагъэлажьэ. Лъэпкъ тарихъым, щыIэныгъэм къапкъы­рыкIырэ гупшысэхэр сурэтышI IэпэIэсэ 30-мэ къагъэлъагъо.
КъэгъэлъэгъуапIэм щыкIогъэ зэхахьэр АР-м исурэтышIхэм я Союз итхьаматэу Елена Абакумовам зэIукIэгъур пэублэ гущыIэкIэ къызэIуихыгъ, мэфэкIым ехъу­лIэу сурэтышIхэм я Союз къыдигъэкIы-
гъэ каталогыр Сурэт къэгъэлъэгъуапIэм шIухьафтынэу ритыгъ.
— Илъэс 45-рэ хъугъэу Адыгеим исурэтышIхэм яIофшIагъэхэр мыщ къыща­гъэлъагъо. Непэрэ къэгъэлъэгъоным хэ­хьагъэр лIэшIэгъуныкъом алэжьыгъэ IофшIагъэхэм яIахь цIыкIу ныIэп. ГукъэкI гъэшIэгъонхэр IэпэIасэхэм агъэфедэзэ, илъэсыбэм IэшIэгъабэ аIапэ къычIэ­кIыгъ. ТисурэтышIхэм щыIэныгъэр зэралъэгъу­рэр къизыIотыкIырэ IофшIагъэхэм ­джыри тяжэщт, — къыIуагъ Елена Абакумовам.
Сурэт къэгъэлъэгъуапIэм ипащэу Быр­сыр Абдулахь, КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ ипащэу ШъэуапцIэкъо Аминэт зэхахьэм къыщыгущыIагъэх.
— Илъэс 45-м проект гъэшIэгъон пчъагъэ Сурэт къэгъэлъэгъуапIэм ыгъэ­цэкIагъ. ТиIофшIапIэ ыкIоцIи, итеплъи зэхъокIыныгъэу афэхъугъэхэмкIэ ти ЛIышъхьэу КъумпIыл Мурат лъэшэу ты­фэраз.
1980-рэ илъэсым къызэIуахыгъэ галереем апэрэу мыщ фэдэ зэхъокIыныгъэшхохэр фашIыгъэх, джырэ шапхъэхэм ар адештэ. Сурэтхэр нахь игъэкIотыгъэу къэдгъэлъэгъонхэм тегъэпсыхьагъэ хъугъэ. Шъолъырым исхэм ятворческэ кIуачIэ зыкъызэIуегъэхыгъэнымкIэ ахэм мэхьанэшхо яI. Тикъэгъэлъэгъонхэм цIыфыбэ ащызэблэкIынэу тызфэлъэIожьы. Творческэ цIыф зэчыишIухэр бэу Адыгеим исых. Тэ типшъэрылъыр ахэм яамалхэм икъоу зыкъызэIуахынымкIэ тфэлъэкIырэр тшIэныр ары. Художественнэ искусствэм республикэм зыщегъэушъомбгъугъэным Сурэт къэгъэлъэгъуапIэр зэрэфэIорышIэщтым, цIыфхэр нахьыбэу ащ творчествэм зэрэфищэщтхэм сицыхьэ телъ, — къыIуагъ Бырсыр Абдулахь.

— Мы илъэсыр мэфэкIхэмкIэ баи. Сурэт къэгъэлъэгъуапIэр илъэс 45-рэ, тимузей загъэпсыгъэр илъэс 40 мэхъух. КъэгъэлъэгъуапIэмрэ музеимрэ зэпхыныгъэ тиIэу тызэдэлажьэ, Адыгеим икультурнэ щыIакIэ тиIахьышIу хэтэлъхьэ. Культурэм зегъэушъомбгъугъэнымкIэ, лъэпкъ шэн-хабзэхэр ухъумэгъэнхэмкIэ тигупчэхэм амалышхохэр яIэх, — еIо Шъэуап­цIэкъо Аминэт.
СурэтышIхэм щыIэныгъэм илъэны­къуабэ къызэлъаубытызэ, искусствэм ыбзэкIэ сурэтхэм акупкI къырагъэлъэгъу­кIыгъ. Искусствэм, шэн-хабзэхэм, Урысыем щыпсэурэ лъэпкъхэм ящыIэкIэ-псэу­кIэ яхьылIэгъэ сурэтхэр дахэх, лъэ­гъупхъэх, тарихъым иIотакIох.
СурэтышIхэу Къуанэ Аслъан, Хъуажъ Рэмэзан, Бырсыр Абдулахь, Паштэ Герман, Къат Теуцожь, ПIэтIыощэ Феликс, нэмыкIхэм яIофшIагъэхэм искусствэм гъунапкъэ зэримыIэр джыри зэ къау­шыхьатыгъ.
Культурэм зегъэушъомбгъугъэнымкIэ, лъэпкъ шэн-хабзэхэр ухъумэгъэнхэмкIэ Адыгеим итворческэ союз амалышхохэр иIэх. Художественнэ искусствэм хэхъоныгъэ егъэшIыгъэным тисурэтышI Iэпэ­Iасэхэр дэлажьэх.
ХьакIэхэм экспозициехэм нэIуасэ зафашIыгъ, IофшIагъэхэр куоу зыгу нэсыгъэхэр бэу къахэкIыгъ. Творчествэр зикIэсэ цIыфыбэ Адыгеим зэрисыр къэ­гъэлъэгъоным джыри зэ къыушыхьатыгъ.
Бэдзэогъум и 27-м нэс къэгъэлъэгъо­ныр зэIухыгъэщт.
Лъэпшъыкъо Фатим.