Я 15-рэ Дунэе къэгъэ­лъэгъонэу «ИННОПРОМ-2025-рэ» зыфиIоу къалэу Екатеринбург щыкIорэм Адыгеир хэлажьэ.

Урысые Федерацием ииндустриальнэ паркхэм ахэтэу Адыгеим хэхъоныгъэхэр егъэшIыгъэнхэмкIэ Корпорацием типромышленнэ паркэу «Инэм» зыфиIорэр ащ къыщегъэлъагъо.
— Къэгъэлъэгъонэу «ИННОПРОМ-2025-р» тэгъэфедэ Iоф­шIэгъу зэдэгущыIэгъухэм, инвесторхэм якъещэлIэн апае, Iоф­шIэкIэ амалхэм язэхъо­- ­жьынкIэ. Тиамалхэр зыгъэфедэн зылъэкIыщтхэм анаIэ къыттырадзэгъахэу теплъы, сыда пIомэ индустриальнэ паркэу «Инэмыр» къыдэгъэкIыжьыным илъэ­ныкъо пстэуми ателъы­тагъ, зэкIэхэмкIи хъопсапIэу щыт. Промышленнэ шъолъырым тэрэзэу Iоф ышIэным пае ищыкIэгъэ транспорт-инженер инфраструктурэр тэгъэпсы. Тиреспубликэ ипроектышхо хэлажьэ зышIоигъохэм апае нэ­мыкI федэ лъэныкъохэри ащ иIэх. Ахэр ыкIи промышленнэ чIыпIэу Тэхъутэмыкъое рай­оным итым тапэкIэ хэхъоны­гъэу ышIыщтхэр къащыфэсIотагъ промпаркэу «Инэм» ыубытырэ чIыналъэм зипроизводствэ щызэтезыгъэуцо зышIоигъохэм адысиIэгъэ зэIукIэгъум, — къащитхыгъ Адыгеим и ЛIышъхьэу КъумпIыл Мурат исоциальнэ нэкIубгъохэм.
Шъугу къэдгъэкIыжьын, хэгъэгум ипащэхэм яIэпыIэгъу хэлъэу республикэм Iофтхьэбзэ заулэ щагъэнэфагъ, нахьыбэмкIэ ахэр зыфытегъэпсыхьагъэхэр бизнес цIыкIумрэ гурытымрэ IэпыIэгъу ятыгъэныр ары. Промышленнэ шъолъы­рым, адрэхэм ялъытыгъэмэ, лъэныкъо анахь дэгъухэу IофымкIэ къызфагъэфедэн алъэкIыщтхэр епхыгъэх. ГущыIэм пае, производствэм фытегъэпсыхьэгъэ унэхэмрэ чIыгу Iахьхэмрэ бэджэндэу аштэнхэ зыхъукIэ, ахъщэу атыщтымкIэ фэгъэкIотэныгъэ яIэщт, организациехэм ямылъку хэбзэIахь тыралъхьащтэп, административнэ Iофыгъохэри нахь Iэрыфэгъоу зэрэзэшIуахыщтхэм анаIэ тырагъэ­тыщт, проектхэми IэпыIэгъу афэхъущтых. Промышленнэ шъолъырыр лъэныкъоу зыдэгъэзагъэми шIогъэ гъэнэфагъэхэр пылъых, транспорт-логистикэ инфраструктурэми джырэ уахътэм диштэрэ нэшанэу иIэхэр нэрылъэгъух. Ахэм анэмыкIэу Краснодаррэ Тэхъутэмыкъое районым ипсэупIэхэмрэ къызэрэпэблагъэхэм къыхэкIэу IофышIэ кIуачIэхэми ар ащыкIэщтэп.
«Промышленнэ чIыналъэр федэ къэзытыщт инвестпроектхэм япхырыщынкIэ хъопсэпIэным, Адыгеим иэкономикэ хэхъоныгъэ ышIынымкIэ къэкIуапIэ хъуным ущыгугъын плъэкIыщт», — къызэфихьысыжьыгъ Адыгеим и ЛIышъхьэ.