Мыекъопэ футбол командэу «Зэкъошныгъэм» истадион щыриIэгъэ зэIукIэ­гъум текIоныгъэ къызыщыдехым, турнир таблицэм ар къыщыдэкIоягъ.

ФутболымкIэ Урысыем изэнэ­къокъу иятIонэрэ лигэ икупэу «Б-м» хэт «Зэкъошныгъэм» ия 18-рэ тур къыдыхэлъытэгъэ ешIэгъоу Мыекъуапэ щыриIагъэм ар щыIукIагъ Махачкала икомандэу «Легионым».
«Зэкъошныгъ» — «Легион» — 2:0 (0:0.
Къэлапчъэм Iэгуаор дэзыдза­гъэхэр: Е. Рагулькиныр — я 71-рэ такъикъым, А. Малкандуевыр – я 75-рэ такъикъым.
«Зэкъошныгъэм» щешIагъэ­хэр: М. Вертиевыр (къэлэпчъэIут), У. Магомедбековыр, С. Черджиевыр, М. Гаджимагомедовыр (Т. Мохбалиевыр), К. Юшко, К. Антонец, А. Малкандуевыр (Т. Хьэхыр), Н. Сергеевыр (Д. Антоненкэр), Е. Рагулькиныр, А. Делэкъор (Э. Цанава), Г. Абдуллаевыр.
Тренер шъхьаIэр — С. Мирошниченкэр.
«Легионым» хэтыгъэхэр: Р. Климановыр (къэлэпчъэIут), А. Ереминыр, А. Исмаиловыр, К. Перелетовыр (А. Магомедовыр), О. Коротковыр, Н. Красновыр, Г. Курбановыр, К. Курбановыр, Р. Полковниковыр (А. Алим), А. Токаевыр (А. Курбаналиевыр), С. Котовыр (М. Ибрагимовыр).
Тренер шъхьаIэр: Л. Гвазава.
Мы зэIукIэгъум щешIэгъэ ко­ман­дитIур турнир таблицэм щызэкIэлъэкIох. Ащ къыхэкIэу текIоныгъэр ахэм лъэшэу ящыкIэгъагъ. ЕшIэгъум иапэрэ та­къикъ­хэм къащегъэжьагъэу «Зэ­къош­ныгъэм» итренер шъхьаIэ ыпэкIэ илъынэу щыт футболистищ шъофым къыригъэхьагъ. Бысым­хэм хьакIэхэр якъэлапчъэ рафылIэнхэ алъэкIыгъ, ау Iэгуаор дадзэныр афэгъэхъугъэп. «Легионми» ар къыдэхъугъэп.
Командэхэм зызагъэпсэфым ыуж хьакIэхэр нахь лъэшэу къи­лъыгъэх, ау «Зэкъошныгъэр» дэгъоу ешIагъ. Я 71-рэ такъи­къым Е. Рагулькиным хьакIэхэм якъэлапчъэ Iэгуаор дидзагъ. «Леги­оным» зыкъышIэжьын ымылъэ­кIызэ, джыри «Зэкъошныгъэр» ыпэкIэ илъыгъ, мыщ дэжьым хьакIэхэм хэукъоныгъэ ашIыгъ, пенальти тикомандэ къылэжьыгъ, ар ыгъэцэкIагъ Делэкъо Аскэр — пчъагъэр 2:0 хъугъэ ыкIи ар зэмыхъокIэу зэIукIэгъур аухыгъ.
«Апэрэ ешIэгъум тэ нахь чIыпIэ дэгъу титыгъ, ау къэлапчъэм Iэгуаор дэтыдзэным пае ищыкIэгъэ пытагъэр кIалэхэм къахэфагъэп. Ащ тIэкIу къыгъэгу­мэкIы­гъэх. Зыгъэпсэфы­гъом ыуж чIы­пIэ зэжъу­хэм командэр арыфэу хъугъэ, ау кIалэхэр дэгъоу ахэм ахэкIыгъэх. Анахь шъхьаIэр очкоуи 3 къызэрэдгъэ­хъагъэр ары», — къыIуагъ тренер шъхьаIэм.
«Зэкъошныгъэм» имызакъоу, очко щырыщ къахэхъуагъ «Победэм», «Нартым» ыкIи «Севастополым».
Я 18-рэ турым изэфэхьысыжьхэр:
«Зэкъошныгъ» — «Легион» — 2:0
«Победа» — «Астрахань» — 1:0
«Динамо Ставрополь» — «Рос­тов-2» — 0:0
«Нарт» — «Ангушт» — 1:0
«Шъачэ-2» — «Кубань Холдинг» — 1:1
«Севастополь» — «Спартак-Налщык» — 1:0
Джырэ уахътэм турнир таблицэм «Зэкъошныгъэм» я 9-рэ чIыпIэр щиIыгъ. Хасавюрт икомандэу «Победэр» пэрытныгъэ зыIыгъыгъэ Ставрополь икомандэу «Динамэм» кIэхьагъ. Зичэзыу ешIэгъур тикомандэ бэдзэогъум и 26-м иIэщт, Назрань ар «Ангушт» щыIукIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Динамо Ставрополь» — 35
2. «Победа» (Хасавюрт) – 35
3. «Севастополь» — 33
4. «Кубань Холдинг» — 32
5. «Ростов-2» — 31
6. «Астрахань» — 27
7. «Шъачэ-2» — 26
8. «Нарт» (Черкесск) – 25
9. «Зэкъошныгъ» — 25
10. «Рубин Ялта» — 25
11. «Легион» — 23
12. «Ангушт» — 13
13. «Спартак-Налщык» — 12
14. «Динамо-2» — 2