УрысыбзэкIэ къыдэкIырэ журналэу «Родничок Адыгеи» ­зыфиIорэм иредакторэу Бэ­гъу­шъэ Мариет кIэлэцIыкIухэм апае бэмышIэу къыдигъэкIыгъ тхылъэу «Дышъэ бзыйхэр» зыфиIорэр.

Ошъогу шхъуантIэм, тидунэе дахэ жъогъожъыеу щышIэтырэ сабыйхэм, Iэтахъохэм ар афэгъэхьыгъ. Адыга­бзэкIэ ыкIи урысыбзэкIэ тхыгъэ рассказ цIыкIу е сурэт кIэкI 45-у ар зэхэт.
Мариет ны, иунагъо ибысымышIу. Ишъхьэгъусэу Бэгъушъэ Руслъанрэ (Тхьэм джэнэт къырет) Мариетрэ къорэ пхъурэ зэдапIугъ, рагъэджагъэх, унагъохэр яIэ хъугъэх, сабыйхэри къакIэ­хъухьагъэх. КIэлэцIыкIухэм ягъэпсыкIэ-шIыкIэхэр Нэнэжъым дэгъоу къыубытынхэ ылъэкIыгъ.
Тхылъым иавтор гущыIапэм къызэрэщиIоу, «…Хэтрэ цIыфкIи сабыигъом ебгъэпшэн тхъагъо щыIэп». ЕтIани Iуи, шIи уимыIэу, сабыим уфэса­къэу, уедэхашIэу къэтэджымэ, ащ ыгу цIыкIуи ышъуи зэрахахъорэр нафэ. Унагъо пэпчъ зэфэдэу тынчыныгъэ, тхъагъо арылъ хъумэ, Хэгъэгуми зиIэтыщт, ыкIуачIэ хэхъощт. Тыгъосэрэ сабыир арыба, непэрэм тапашъхьэ цIыфы хъугъэу, ныбжьыкIэу къиуцорэр. Мариет ар зэхешIэ, сабыигъом идунэе хьалэмэт къыриIотыкIэу, къыригъэлъэгъукIэу матхэ.

«Айщэт», «Шъоу», «Дамик», «Динарэ — дышъэ», «Джанэр», «Одыджын», нэмыкIхэри адыгабзэкIэ ыкIи ардэдэхэр урысыбзэкIэ тхылъым къыдэхьагъэх.
Мариет бзэ шъэбэ дахэ Iулъ ыкIи сабыигъор, ежь сабыйхэм афэдэкъа­бзэу, дэхэн, зэфэн, къэбзэн, хэти ны-тыхэм, ныжъ-тыжъхэм ямызакъоу, зы­ныбжь икъугъэ цIыф пэпчъ ахэм уасэ афишIыныр кIэлэцIыкIухэм зэряпэсыгъэр итхыгъэ зэкIухэмкIэ зэхыуе­гъэшIыкIы.
Дэгъоу сшIэрэ Мариет мыщ фэдэ тхылъ зэкIэупкIагъэр къызэрэIэкIэкIыгъэм сигъэгушIуагъ. Адыгабзэр зышIэу, еджэрэ пэпчъ — нахьыжъи, нахьыкIи, ежь зыфитхыгъэ кIэлэцIыкIухэри зэригъэгушIощтхэр нафэ. Сабый дышъэ цIыкIу пстэуми сабыигъо дахэ яIэнэу, ны-тыхэр, нанэхэр ашъхьэщытынхэу, ахэм ягущыIэ зэхахэу къэтэджынхэшъ, цIыфышIу хъунхэу тафэлъаIо! ТхылъыкIэу «Дышъэ бзыйхэр» «Золотые лучики» зыфиIорэм «Гъогу маф!» фэтэIо.

Мамырыкъо Нуриет