Адыгеим щыпсэухэрэм, зыдэсхэм емылъытыгъэу, медицинэ IэпыIэгъоу арагъэгъотырэм хэхъо.

ЦIыфхэр апэ зэолIэхэрэ IэзапIэхэм япчъагъэ нахьыбэ шIыгъэным респуб­ликэм щыдэлэжьэ зэпытых. ЗэкIэмкIи джырэ уахътэм Адыгеим ащ фэдэ псэуалъэу щашIырэр блы мэхъу: псэупIэу Садовэм (Красногвардейскэ районыр), къуаджэхэу Афыпсыпэрэ Щынджыерэ (Тэхъутэмыкъое район), Мыекъопэ районымкIэ Абдзэхэхьаблэ, псэупIэхэу Краснооктябрьскэм, Победэмрэ Северо-Восточные Сады зыфиIорэмрэ адагъэуцох.
IэзапIэхэу къоджэ псэупIэхэм аща­шIыхэрэр зэкIэ ящыкIэгъэ медицинэ Iэмэ-псымэхэмкIэ зэтегъэпсыхьагъэх, медицинэ фэIо-фэшIэ пстэоу ящыкIэгъэ­щтыри ащарагъэгъотыщт.
Къэралыгъо программэхэмрэ лъэпкъ проектхэмрэ ягъэцэкIэн ишIуагъэкIэ Адыгеим аужырэ илъэси 8-м сымэджэщи 4, IэзэпIи 5, фельдшер-мамыку псэолъэ 33-рэ ыкIи амбулатории 3 кIэу къыщызэIуахыгъ. Мы илъэсым ыкIэ нэс Мыекъуапэ, Адыгэкъалэ, Джэджэ, Кощ­хьэблэ ыкIи Тэхъутэмыкъое районхэм сымэджэщ ыкIи IэзэпIи 5-мэ гъэцэ­кIэжьын куухэр ащарашIылIэщтых.
«ТапэкIи тфэлъэкIырэр зэкIэ тшIэщт псауныгъэм икъэухъумэн ылъэныкъокIэ шъолъырым хэхъоныгъэ ышIыным, цIыфхэм шэпхъэшIухэм адиштэрэ медицинэ IэпыIэгъу Iэрыфэгъу агъотыным апае», — къыIуагъ КъумпIыл Мурат.