Бэдзэогъум иапэрэ тхьаумафэ республикэ шыкъэгъэчъапIэм къекIолIэгъэ нэбгырэ пчъагъэмкIэ анахьыбэ къызыщызэIукIэгъэ мафэу плъытэн плъэкIыщт.

ЦIыфхэм лъэшэу ашIогъэшIэгъо­нэу шыгъачъэхэм яплъыгъэх, IэпэIасэхэм яIэшIагъэхэм, лъэпкъ творчествэм ибаиныгъэ зэрагъэлъэгъугъ. Инджылыз шы лъэпкъхэр ыкIи къэбэртэе шыгъэчъэшхэр зыхэтыгъэ программэр 7-у зэтеутыгъагъ.
Шыгъэчъэ мафэр къызэIуахыгъ метрэ 1200-рэ къэзычъыщтхэм. «Большой спринт» зыфаIуагъэм илъэси 3 ыкIи ащ ехъу зыныбжь шитф хэлэжьагъ. ШIухьафтынэу ащ илъыгъ сомэ мини 100. ТекIоныгъэр къыдихыгъ шыбзэу Ай Пи Гана зыцIэм. Ащ тесыгъ шыкъэгъа­чъэу Юрий Кулинич. Шым а гъогууанэр къычъыгъ такъикъ 1.13.3-кIэ. ЯтIонэрэу къэсыжьыгъ Золушка Агро, ящэнэрэр — Андола.
ЯтIонэрэ къызэпэчъэнми шIухьафтынэу илъыгъэр сомэ мини 100. «Шъхьэгуащэ ишIухьафтынкIэ» зэджагъэхэм шыбзыхэу илъэситIу зыныбжьыхэр ары къыщызэдэ­чъагъэхэр, ахэм ягъогууани метрэ 1200-рэ хъущтыгъ. Апэрэу ар къызэзынэкIыгъэр шыкъэгъачъэу Юрий Кулинич зытесыгъэ Первая Агро, ятIонэрэ хъугъэ Эми Томас, ящэнэрэр Катана зыцIэр ары.
Ящэнэрэ къызэпэчъэныр анахь гъэшIэгъоныгъ. Ащ хэлэжьагъэх илъэсищ зыныбжь шибгъу. ШIухьафтынэу ащ илъыгъэр бэкIэ нахьыбагъ — сомэ мин 400. Гъогу­уанэу къачъын фэягъэр метрэ 2400-рэ. Яблэнэрэу мыщ фэдэ шыгъачъэхэм ахэлэжьэрэ Фуксия зыцIэм текIоныгъэр мы зэпэчъэным къыщыдихыгъ. Ащ ыпэкIэ гъогогъуиплIэ ащ хагъэунэфыкIырэ чIыпIэхэр къыхьыгъ, мыр апшъэрэ, бэрэ зэжэгъэ текIоныгъэу щытыгъ. Мы мафэм шым тесыгъ Щыгъущэ Айдэмыр, гъогууанэр къызэрачъыгъэр такъикъи 2.38.1-рэ. Зы нэгъэупIэпIэгъукIэ ащ ыуж къинагъ Санта Стар зыцIэ шыр, ящэнэрэ хъугъэ нэгъэу­пIэпIэгъуи 2-кIэ къэгужъогъэ Мэй­джик.
ЯплIэнэрэ къызэпэчъэным хэлэжьагъэх илъэси 4 ыкIи нахьыбэ зыныбжь шыхэр. Гъогууанэр — метрэ 2400-рэ. Мыщ хэлэжьэн ылъэкIыщтыгъ АдыгеимкIэ анахь шы чъэрэу алъытэрэ Славер, ау нахь зэнэкъокъушхоу Краснодар краим мыщ ыпэрэ мафэм щыIагъэм ар кIогъагъэ ыкIи ящэнэрэ чIыпIэр ыубытыгъ. Мыдырэ къызэ­пэчъэнэу «Жокей-Клубым ишIу­хьафтын» зыфиIорэм шитIу хэлэжьагъэр. Анахь лъэшэу зыкъигъэлъэгъуагъ Расим Кяковыр зытесыгъэ шы тхъоплъэу Гелиополис. Гъогууанэр ащ такъикъи 2.37.2-кIэ къычъыгъ. ЯтIонэрэу хъугъэ Бретонка Про.
Ятфэнэрэ къызэпэчъэным зыныбжь илъэситIу хъугъэ шитфыр метрэ 1400-м щызэнэкъокъугъэх. «Приз летний» зыфаIуагъэу сомэ мини 100 шIухьафтынэу зэрылъы­гъэр ыхьыгъ Мэзнэф зыцIэ шэу Щыгъущэ Айдэмыр ыгъэIорышIэщтыгъэм. Такъикъ 1.26.8-кIэ ащ а гъогууанэр къычъыгъ, ятIонэрэ хъугъэр Апсара, ящэнэрэ чIыпIэр ыубытыгъ Филиал зыцIэ шым.
Яхэнэрэ къызэпэчъэнэу шIухьаф­тынэу сомэ мин 200 зэрылъыгъэм илъэсищ зыныбжь ших къыщызэдэчъагъ, гъогууанэр — метрэ 1600-рэ. Фарс зыцIэ шым ар анахь псынкIэу къы­чъыгъ, такъикъ 1.39.7-кIэ, зы нэгъэупIэпIэгъу фэдизкIэ ащ ыуж къинагъ Эль Кондор Паса, ящэнэрэ хъугъэ Файер Ролекс.
КIэух къызэпэчъэнэу инджылыз къэгъэчъэш лъэпкъхэу зыныбжь илъэсищ хъугъэхэр ыкIи нахьыжъхэр зыхэлэжьагъэхэм метрэ 1600-рэ къачъыгъ. Ащ ащытекIуагъ Марк Антоний зыцIэ шэу Юрий Кулинич ыгъэIорышIэщтыгъэр, Профи Джет — ятIонэрэ, Бэккер ящэнэрэ хъугъэх.