Iофтхьабзэу «Гражданский мониторинг» зыфиIорэм хахьэу общественностым илIыкIохэр кощын IофхэмкIэ ГъэIорышIапIэм щыIагъэх.

АР-м хэгъэгу кIоцI IофхэмкIэ и Министерствэ щызэхэщэгъэ Общественнэ советым илIыкIохэу Николай Киселевымрэ Андрей Синельниковымрэ аIукIагъэх гъэIорышIапIэм ипащэ иIэнатIэ зыгъэцэкIэрэ ХьацIэцIэ Рустам ыкIи отделхэм япащэхэм.
ЗэIукIэгъум ыпэкIэ ХьацIэцIэ Рус­тамрэ кощын уплъэкIунхэмкIэ отделым ипащэу, полицием имайорэу Валерий Садовоимрэ подразделением иIофшIэн зэрэзэхэщагъэм хьакIэхэр щагъэгъо­загъэх. 2025-рэ илъэсыр къызихьагъэм къыщыублагъэу гъэIорышIапIэм кощын Iофхэм афэгъэхьыгъэу къэралыгъо фэIо-­фэшIэ мин 63-рэ фэдиз агъэцэкIагъ. Кощыным епхыгъэ хэбзэгъэуцугъэм ылъэныкъокIэ хэукъоныгъэхэр амы­шIынхэм фэшI Iофтхьабзэхэр ренэу зэхащэх. ГущыIэм пае, мы илъэсым кощын Iофхэм алъэныкъокIэ админист­ративнэ хэукъоныгъэ 400-м ехъу къы­хагъэщыгъ.
Р. ХьацIацIэмрэ В. Садовоимрэ Общественнэ советым хэтхэм анаIэ тырарагъэдзагъ мы илъэсым ищылэ мазэ къыщыублагъэу Урысыем иреестрэ гъэ­лъэшыгъэ шIыкIэм тетэу цIыфхэр ауплъэкIухэ ашIынэу зэрэхагъэхьагъэр. Мыщ фэдэ шIыкIэмкIэ IэкIыб къэралхэм къарыкIыгъэхэм ыкIи гражданствэ зимыIэхэм алъыплъэнхэмкIэ, тикъэралыгъо ихэбзэ рэхьатныгъэ, ищынэгъончъагъэ гъэпытэгъэнхэмкIэ ишIуагъэ къэкIощт. ГъэIорышIапIэм икъулыкъушIэхэм IэкIыбым къикIыгъэхэм Iоф языгъашIэ­хэрэм заIуагъакIэ, кощыным епхыгъэ хэбзэгъэу­цугъэм ишапхъэхэр ыкIи ахэр заукъокIэ пшъэдэкIыжьэу ахьыщтыр агу­рагъаIо.

Советым хэтхэм гъэIорышIапIэм иотделхэм япащэхэм Iоф зыщашIэрэ ка­би­нетхэр къарагъэплъыхьагъэх, къэралыгъо фэIо-фашIэу агъэцакIэхэрэм ащагъэгъо­загъэх, ахэр къызIэкIэбгъэхьан зэрэплъэкIыщтыр къафаIотагъ.
ГъэIорышIапIэм ипащэхэмрэ Об­щественнэ советым хэтхэмрэ щыIагъэх кощын IофхэмкIэ фэIо-фашIэхэр зыщагъэцэкIэрэ Гупчэу бэмышIэу Мыекъуапэ къыщызэIуахыгъэм. Мыщ нэбгырэ 30 фэдизмэ Iоф щашIэ, шэпхъакIэхэм ади­штэрэ техникэмкIэ зэтегъэпсыхьагъ. Гупчэм ипащэу Мамый Юрэ къызэри­IуагъэмкIэ, мыр зыфэгъэзагъэр кощын Iофым епхыгъэ хэбзэгъэуцугъэхэр амыу­къонхэм фэшI пэшIорыгъэшъ Iофтхьа­бзэхэр цIыфхэм, IофшIапIэ языгъэгъоты­хэрэм адызехьэгъэнхэр ары.
ЗэIукIэгъум икIэухым Николай Ки­селевым кощын IофхэмкIэ ГъэIоры­шIапIэм икъулыкъушIэхэм Гупчэм икъэ­бар игъэкIотыгъэу къазэрафаIотагъэм ыкIи зекIо гъэшIэгъон зэрафызэхаща­гъэм фэшI рэзэныгъэ гущыIэхэр ариIуагъ. Джащ фэдэу яIофшIэнкIэ гъэхъагъэхэр ашIыхэзэ ыпэкIэ лъыкIотэнхэу къулы­къушIэхэм къафэлъэIуагъ.
АР-м хэгъэгу кIоцI IофхэмкIэ
и Министерствэ ипресс-къулыкъу.