Автомобиль гъогухэмкIэ ГъэIорышIапIэу «Адыгеяавтодорым» ­бэмышIэу къызэритыгъэмкIэ, автомобиль гъогоу «Мыекъуапэ — Джаджэ — Псыбай — Зеленчукскэр — Карачаевск» зыфиIорэм къыщежьэу станицэу Джаджэ идэхьапIэ екIурэ Iахьым игъэцэ­кIэжьынкIэ псэолъэшIхэм Iофы­шхо ашIэ.

Джащ фэдэу автомобиль гъогоу «Кужор­скэр — Сергиевскэр — Дондуковскэр» зыфиIорэм игъэцэкIэжьыни Джэджэ районым щэкIо. Лъэпкъ проектэу «ЩыIэныгъэм пае инфраструктурэр» зыцIэм диштэу IофшIэнхэр зэхащэх.
Шъугу къэтэгъэкIыжьы Джэджэ районым игъогуи 4-у километри 7 зикIыхьагъэр федеральнэ шапхъэхэм адиштэу гъэрекIо зэрэзэтырагъэпсыхьажьыгъэр. Мы илъэсым гъогушIхэм гухэлъэу яIэр республикэ мэхьанэ зиIэ гъогуи 5-у ­километрэ 13,4-рэ зикIыхьагъэр гъэцэ­кIэжьыгъэныр ары.
Республикэ мэхьанэ зиIэ автомобиль гъогоу «ПсэупIэу Новэм идэхьапI» зыфиIорэм иIахьитIоу километри 5,7-рэ зикIыхьагъэр шапхъэхэм адиштэу мыгъэ Джэджэ районым щызэтырагъэпсыхьа­жьыгъ.
Автомобиль гъогухэмкIэ ГъэIорышIапIэу «Адыгеявтодорым» къызэритыгъэмкIэ, подряднэ организациеу «ДСУ-3-м» испециалистхэм автомобиль гъогоу ­«Кужорскэр — Сергиевскэр — Дондуковскэр» зыфиIорэм телъыгъэ асфальты­жъыр тырахыжьи, зэшъхьэзашъо ашIыгъ. ЫужкIэ мыжъуакIэмрэ мастикэмрэ зы­хэгъэчъыхьэгъэ асфальтбетоныр ащ ышъхьагъ тыралъхьащт, гъогубгъухэр агъэпытэщтых, гъогур агъэтхъыщт.
Гъогоу ахэм агъэцэкIэжьырэм километри 3,75-рэ икIыхьагъ. Сомэ миллион 67,3-у ащ пэIухьащтыр къафыхагъэкIы-гъах. Тицыхьэ телъэу къэтIон тлъэкIыщт лъэпкъ проектэу «ЩыIэныгъэм пае инфраструктурэр» зыфиIорэр республикэм игъогу-транспорт инфраструктурэ изе­гъэушъомбгъун зэрэфэIорышIэщтыр, цIыфхэм ящыIэкIэ-псэукIэ зыкъызэрэригъэIэтыщтыр.