Урысые кIэлэцIыкIу гупчэу «Смена» зыцIэм щыIэ кIэлэцIыкIухэм Адыгэ къэралыгъо университетым мы мафэхэм шIэныгъэм ифестиваль афызэхищагъ.

Урысыем ишъолъыр 47-мэ къарыкIыгъэ ныбжьыкIэ 850-рэ апэрэ фестивалым хэлэжьагъ. Урысые шIэныгъэ проектэу «Наука вокруг. Открытия про­должаются» зыфиIорэм къыдыхэлъы­тагъэу фестивалым епхыгъэ Iофтхьабзэхэр къызэIуахыгъэх. Урысые Федерацием шIэныгъэмкIэ и Министерствэ игранткIэ Адыгэ къэралыгъо университетым ахэр зэхещэх.
Фестивалым епхыгъэ тематическэ чIыпIэ 30-мэ Iоф ашIагъ, джэгукIэ, интерактивнэ шIыкIэм тетэу биологием, физикэм, астрофизикэм, химием, IT-м, хьисапым нахь куоу нэIуасэ фэхъугъэх.
— Урысые кIэлэцIыкIу гупчэу «Орленкэм» зыщызыгъэпсэфыхэрэм апае гъэрекIо апэрэу шIэныгъэм ифестиваль афызэхэтщэгъагъ. Урысыем, Абхъазым, Австралием, Армением, Белоруссием, Германием, Испанием, Казахстан, Канадэм, Киргизием, Молдовэм, Таджикистан, Узбекистан ыкIи Японием къарыкIыгъэ ныбжьыкIэ мин 16 фэдиз ащ хэлэжьэгъагъ. НыбжьыкIэхэм апае мастер-класс гъэшIэгъонхэр щыIагъэх, ушэтын зэфэшъхьафхэр афызэхащагъэх, Урысыем ишIэныгъэлэжьхэр лекциехэм къяджагъэх, фильм­хэм арагъэплъыгъэх.
ШIэныгъэм хэхъоныгъэ егъэшIыгъэнымкIэ мыщ фэдэ шIыкIэм шIуагъэ пылъэу дгъэунэфи, мыгъи IофшIэным пытыдзэжьыгъ. Джы «Орленкэм» имызакъоу, Сменэми», фестивалыр щызэ­хэтщагъ. Проектэу «Наука вокруг. Открытия продолжаются» зыфиIорэр мэкъуогъу мазэм къыщегъэжьагъэу Iоныгъом нэс щыIэщт. Фестивали 5 кIэлэ­еджакIохэм афызэхэтщэщт, ащ щыщэу тIур «Сменэм», щыр «Орленкэм» щыкIощтых, — къыIуагъ проектым ипащэу, Адыгэ къэралыгъо университетым иректорэу Мамый Даутэ.
Мэфэ реным «Научная мастерская» зыфиIорэм Iоф ышIагъ. ФизикэмкIэ ыкIи химиемкIэ ушэтынхэм кIэлэеджакIохэр къахэлэжьагъэх, тыгъэм исистемэ зэрэзэхэтыр зэрагъэшIагъ, хьисапым епхыгъэ упчIэхэм яджэуапхэр къашIагъэх, цIыфым и ДНК модель агъэпсын алъэ­кIыгъ. Джащ фэдэу интеллектуальнэ джэгукIэу «Стихи науки» ыкIи сурэттехынымкIэ зэнэкъокъоу «Мир глазами детей» зыфиIорэр афызэхащагъэх.
Научнэ кином епхыгъэ лабораторием режиссерэу Ольга Ажнаковам ыгъэуцугъэ документальнэ фильмэу «Влюбленные в математику» зыфиIорэр къащафагъэлъэгъуагъ. Фестивалым ихьэкIагъ РАН-м ичлен-корреспондентэу, профессорэу, медицинэ шIэныгъэхэмкIэ докторэу Ольга Кобяковар. Ар кIэлэцIыкIухэм лекцие къафеджагъ.
КъыкIэлъыкIощт фестивалыр бэдзэогъум и 20-м «Сменэм» щызэхащэщт.
Адыгэ къэралыгъо университетым ипресс-къулыкъу