Лъэпкъхэм я Къэралыгъо театрэу УФ-м инароднэ артистэу Евгений Мироновыр зипащэмрэ Адыгэ Республикэм итеатральнэ зэхахьэрэ зэдаштэгъэ проектэу «Режис­серхэм ялабораторие» Адыгеим щагъэцакIэ. Ащ фэгъэхьыгъэ пресс-конференцие Пушкиным и Унэ щыкIуагъ.

АР-м культурэмкIэ и Министерствэ ыкIи шIушIэ фондэу «Театральнэ гукъэкI­хэр» зыфиIорэр Iофтхьабзэм IэпыIэгъу фэхъух.
Театральнэ эскизхэм, режиссер ыкIи артист ныбжьыкIэхэм творческэ амалэу яIэр къызэIуахыным мы проектыр афэ­лажьэ.
АР-м итеатральнэ зэхахьэ ипащэу Ацумыжъ Рустам конференциер къызэIуихыгъ.
— Культурэм хэхъоныгъэ ышIыным къыдыхэлъытэгъэ проектыкIэу «Режиссерхэм ялабораторие» гъэхъагъэ хэлъэу зэрэпхырыщыгъэщтым сицыхьэ телъ. Тиартистхэр режиссер цIэрыIохэм яушэтынхэм ахэлажьэх. Актер IэпэIасэу, УФ-м инароднэ артистэу, лъэпкъхэм я Къэралыгъо театрэ ихудожественнэ пащэу Евгений Мироновыр гъэрекIо Адыгеим щыIагъ. ЗэIукIэгъум щызэдэтштагъ мыщ фэдэ проектым игъэцэкIэн. Тхьамафэрэ тызыхэлэжьэгъэ IофшIэнхэм ащыщэу анахь спектаклэ дэгъур тикъэгъэлъэгъонхэм ахэдгъэхьащт. ХэзгъэунэфыкIы сшIоигъу режиссерэу къедгъэблэгъагъэхэм сэнаущы­гъэшхоу ахэлъыр, — къыIуагъ Ацумыжъ Рустам.
Творческэ гухэлъэу яIэхэм хьакIэхэр къатегущыIагъэх. Программэм лъыплъэрэ Елена Носовам проектым ипшъэрылъхэр хигъэунэфыкIыгъэх.
— УФ-м инароднэ артистэу Евгений Мироновыр зипэщэ теат­рэм тырилIыкIу. «Урысыем итеатрэ цIыкIухэм яхэхъоныгъ» зыфиIорэ программэм тыдэ- лажьэ. Мыщ фэдэ ушэтын дэкIыгъохэм режиссер IэпэIасэхэм ясэнаущыгъэ къыщагъэлъагъо, амалыкIэхэмкIэ артистхэм адэгуащэх. СпектаклыкIэу агъэу­цугъэхэр къадэхъугъэхэу сэлъытэ, — къыIуагъ Елена Носовам.
— Адыгеим и Театральнэ зэхахьэ шэпхъэшIухэм адиштэу зэрэлажьэрэр тинэрылъэгъу. ШIэныгъакIэхэр актерхэм алъыдгъэIэсыныр типшъэрылъ шъхьэ­Iагъ. Актерхэм яIофшIагъэ республикэм имызакъоу, зэрэ Урысыеу зэрэщызэлъашIэщтым сицыхьэ телъ, — къыIуагъ режиссерэу Къулэ Тимур.
Проектым икIэухэу хъугъэр спектаклэ цIыкIуищым ягъэуцун: «Камино норте» (режиссерыр Артем Устинов), «Одноместная канава» (режиссерыр Юлия Каландаришвили), «Вроде легче» (режиссерыр Къулэ Тимур) зыфиIохэрэр.
Къэбар жъугъэм иамалхэм ялIыкIохэм упчIабэ къатыгъ, ахэм яджэуап­хэри игъэкIотыгъэу журналистхэм агъо­т­ыжьыгъэх.

Лъэпшъыкъо Фатим