Креативнэ экономикэм ихэхъоныгъэкIэ гухэлъэу пIэлъэ кIыхьэм телъытагъэр гъэхьазырыгъэнымкIэ Урысые Федерацием и Президент къыгъэуцугъэ пшъэрылъым къыделъытэ хэбзэ къулыкъухэмрэ иэксперт сообществэмрэ Iофэу зэдагъэцакIэрэм зэдегъэштэныгъэ хэлъыныр.

Лъэпкъ кинематографием хэхъоныгъэ егъэшIыгъэным иамалхэм защытегущыIэгъэхэ Iофтхьабзэу «Кинематограф как драйвер развития креативной экономики региона» зыфиIорэр Адыгеим щы­кIуагъ. УФ-м икинематографистхэм я Союз ыкIи Адыгэ къэралыгъо университе­тым и Дунэе гъэсэныгъэ-ушэтын Гупчэ онлайн-Iофтхьабзэр зэхащагъ.
УФ-м икинематографистхэм я Союз ипащэ игуадзэу Алексей Алешковскэм, АКъУ-м инджылызыбзэ филологиемкIэ икафедрэ ипащэу, Адыгэ къэралыгъо университетым и Дунэе гъэсэныгъэ-экзаменационнэ Гупчэ ипащэу, креативнэ шъолъырэу «SuzieMArtRoom» икIэщакIоу Сусана Макеровам ар зэрищагъ.
Адыгэ Республикэм культурэмкIэ иминистрэу Аулъэ Юрэ, режиссерэу, УФ-м икинематографистхэм я Союз иотделениеу АР-м щыIэм ипащэу Нэгъэп­лъэ Аскэрбый, АР-м и Къэралыгъо Совет — Хасэм идепутатэу Шэуджэн Тембот ыкIи нэмыкIхэр ащ хэлэжьагъэх.
Непэ лъэпкъ кинематографием изытет, игъэхъагъэхэм, зэхэфыгъэн фэе Iофыгъоу къэтэджыхэрэм Нэгъэплъэ Аскэрбый ягугъу къышIыгъ. Ахэм хэкIыпIэ амалэу яIэхэр къыIотагъ Алексей Алешковскэм. Къэралыгъо грантхэм, субсидиехэм якъыдэхын нахь чанэу ахэлэжьэнхэм ишIыкIэхэр къафиIотагъ.
— БлэкIыгъэ илъэсым респуб­ликэм щызэхащэгъэ фестивалэу «Адыгеир, шIу усэлъэгъу!» зыфиIорэм апэрэу сыкъеблэгъагъ. Нэгъэплъэ Аскэрбый кинематографием фэгъэхьыгъэ IофшIэнэу шъолъырым щыригъэкIокIырэм сигъэрэзагъ. Джыри нахь куоу ныбжьыкIэхэр ащ хэщэгъэнхэм Iофышхо ищыкIагъ. Адыгеим икинематографистхэм нахьыбэу фильмхэр тырахынэу закъы­фэсэгъазэ, — къыIуагъ Алексей Алешковскэм.
— Адыгэ Республикэм кином хэхъоныгъэхэр щедгъэшIыным тыфэхьазыр, креативнэ индустрием иеджапIэхэр мэлажьэх. ИлъэсыкIэ еджэгъум джыри зы еджапIэ къуаджэу Кощхьаблэ къыщызэIутхыщт. Ахэм къа­чIэкIыгъэ еджакIохэм гугъэпIэшIухэр ятэпхых. Сурэт, видеотехыным, ахэр зэхэгъэуцожьыгъэнхэм, макъэм итетхэн алъэныкъохэм креативнэ индуст­рием иеджапIэхэм щафагъэсэщтых, — къыIуагъ Аулъэ Юрэ.
Непэрэ ныбжьыкIэхэр къэралыгъом инеущых. Республикэм пшъэрылъ шъхьа­Iэу зыфигъэуцужьыхэрэм ащыщ адыгэ культурэм икъэухъумэнрэ ихэхъоныгъэрэ ныбжьыкIэхэр хэгъэлэжьэгъэнхэр, кIэлакIэхэр кинематографием фэщэгъэнхэмкIэ IэпыIэгъу афэхъугъэныр.