Тщыгъупшэщтэп
Сигупшысэ хэтэу а лIыр
Садэжь къакIо,
Къэмыпсалъэу, ыбгъэ дэлъыр
НитIумэ къаIо:
«КъэошIэжьа а гъэмафэу
Мэфэ стырыр?
Гум къэкIыжьа зэо хафэу
Зэо плъырыр?..»

Iэпхъо-лъапхъоу дунай машIор
ЧIылъэм щыгъэIагъ,
Лъыпсы нэпскIэ дунай хашъор
Тыгъэм ригъэIагъ.
ЛIыгъэу хэлъыр тарихъ хъугъэу
ЗэолI пхъашэр щылъ,
Ыпсэ хэкIми, пыим лъыхъоу
Федзы инэмыплъ.
Зэо мыгъоу тпэкIэкIыгъэр
Таущтэу тщыгъупшэн,
Ащ бэлахьэу къытфихьыгъэр
Сыдым едгъэпшэн!

Ренэу, ренэу а лIыр
Садэжь къакIо,
Къэмыпсалъэу, ыбгъэ дэлъыр
НитIумэ къаIо:
«КъэошIэжьа а гъэтхапэу
Къыдэтхыгъэр?
Гум къэкIыжьа лIыгъэ напэу
ТекIоныгъэр?..»

Быракъ Плъыжьым фэдэу тыгъэр
Огум шъхьэщэтаджэ,
Чэф-гушIуагъоу къэтIэтыгъэр
ЧIылъэм хэтэгъаджэ.
Джэрпэджэжьым имэкъамэ
Псаумэ алъэIэсы,
Фэхыгъэ дзэлIмэ якъэмэ
Уцыр ащэсысы.
Ахэм ныбжьи зэкIэкIоныр,
Ныбжьи амышIагъ.
Запхъотэнышъ, зэу задзыныр
ЛIыгъэ хабзэу ащ яIагъ.

Сигупшысэ хэтэу а лIыр
Садэжь къакIо,
Къэмыпсалъэу, ыбгъэ дэлъыр
НитIумэ къаIо.
Жъогъо Плъыжьыр жъыутэхэу
Бгъэм къыхэщы,
Сиджэ макъэ зэхимыхэу
Ар IокIыжьы.

Осы чIэгъми, жъогъо нэгуми
Ахэр щырэхьатых,
Зэо мыгъоу цIыфы гугъуми
Ахэр ишыхьатых.
Титыгъэпсхэу, гугъэ гъашIоу
Ахэр ощхы шъабэх.
Тимамыры иухъумакIоу
Ахэр зэолI пытэх.
Мыжъо джанэр къякIоу, къякIоу
Ахэр чIылъэм тетых

Дэпкъым пылъэгъэ къамэр
Тхыдэ мытхым фэдэу къамэр
Шъэф зэхэлъышъ, Iасэу къаплъэ,
Шыбли, лыгъи, жьыбгъи амэ
Щыщы хъугъэу зыхагъаплIэ.

Къэмэ цапэм усакъыпэу
Узынэсрэм зегъэхъые,
ЛIэныгъишъэр ыбгъэгу щыбэу
ЛIэшIэгъуишъэр ыIу щэчъые.

Охътэ тамэу улъыигъэм
УчIэплъэнэу амал щыIэп.
Сыд къыIона гъучI дыигъэм,
Хабзи, бзыпхъи, жабзи Iулъэп.

Пыим гущтэ езыгъэшIэу
Хэта Iашэу узиIагъэр?
ШъэогъуитIум гужъ фэзышIэу
Ора язым ытх хэхьагъэр?

Хьауми джаущтэу дэхэ лъагъор
ГъучI такъырэу къыздэпхьыгъа?
Е чэщ шIункIым тхьамыкIагъор
МэкъумэщышIэм шъхьащыпщыгъа?

Е зыгорэм ыуж уитэу
Шъхьафитынчъэу ер фэпхьыгъа?
Хьауми гушIом узэлъиштэу
Хьалыгъу фабэр афэббзыгъа?

СизыупчIи зэхимыхэу
Тхыдэ тхыгъэу къамэр къаплъэ,
ЛIэшIэгъу паIор зыщимыхэу
Ишъэф минхэр нафэм фалIэх.

Къэмэ цапэм усакъыпэу
Узынэсрэм зегъэхъые,
ЛIэныгъишъэр ыбгъэгу щыбэу
ЛIэшIэгъуишъэр ыIу щэчъые.

Шы фыжь
Илъэсы пчъагъэм шылъэмакъэм
Пчэдыжь къэси сыкIэдэIукIы.
Джа илъэс пчъагъэм ренэу гъэтхапэм
Осы нэгуфыр чIым тырестыкIы.

Шы щыщы макъэ сэ зызэхэсхрэм,
Сятэ иш сшIошIышъ, унэм сыкъечъы.
Сызыгъолъыжьрэм, сызхэчъыежьрэм,
Шы фыжьхэр пкIыхькIэ сыгу щызэтечъых.

Псынэ мэзахэм фэдэу ным ынэ
Нэпсыр изыбзэу сэ къэсэшIэжьы,
Хъугъэр ыушъэфэу, Iушъашъэу сянэ
Ыбгъэ сшъхьэ чIэлъэу сыгуи къэкIыжьы.

Сэ сяни, сэри тымышIэу пшъыгъэр
Къытфэт зэолIым тыфыпэплъагъ,
Пхъэчаим изэу тишъотэ зыгъэ
Джы къызнэсыгъэм ащ едгъэжагъ.

Шыу фыжь гъощагъэм фэдэу пщэ закъор
Сятэ фэзгъадэу огум щэшэсышъ,
Ощхыцэ минхэр ишылъэмакъэу
Типынджыр бзыгъэ къыжэхетакъо.