Къуаджэу АдыгеякIэм иурамэу Краснэм общественнэ чIыпIакIэу щагъэпсыгъэр мэфэкI шIыкIэм тетэу джырэблагъэ къызэIуахыгъ. Iофтхьабзэм хэлэжьагъэх къоджэ администрацием илIыкIохэр, къоджэдэсхэр.

Зэзэгъыныгъэм къыпкъырыкIыхэзэ, федеральнэ проектэу «Къэлэ щыIэкIэ Iэрыфэгъу гъэ­псыгъэныр» ыкIи лъэпкъ проектэу «ЩыIэныгъэм пае инфраструктурэр» зыфиIохэрэм ягъэ­цэкIэн къыдыхэлъытагъэу пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «ЮГ-СТРОЙ» зыфиIорэм иIофышIэхэм мыр зыдагъэуцугъэ чIыпIэм щытыгъэ псэуалъэм ищагу дэтыгъэ пкъэухэу ыкIи мыжъо гъэчъыгъэхэу жъы хъугъэхэр зэблихъугъэх, лъэсрыкIуапIэм плиткакIэ тыралъхьагъ, нэфынэ къэзытырэ пкъэухэр агъэуцугъэх.
Ащ нэмыкIэу, уц шхъуантIэ къызщыкIырэ ыкIи чъыгхэр зыщагъэтIысхьащт чIыпIэхэр зэтырагъэпсыхьагъэх. НыбжьыкIэхэу зипкъышъол зыгъэпытэ зышIоигъохэм апае спорт площадкэ агъэпсыгъ, ащ тренажерхэр ыкIи спорт Iэмэ-­псымэхэр щагъэуцугъэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, къуаджэу АдыгеякIэм общественнэ чIыпIакIэ щыгъэпсыгъэным сомэ мил­лиони 3-рэ мин 632-рэ пэIуагъэхьагъ. Къоджэдэсхэм мы чIыпIэ дахэр гуIэтыпIэ афэхъугъ, зыщагъэпсэфынэу нэбгырабэ
мыщ къекIуалIэ.