Адыгэ Республикэм и Концерт зэхахьэ и Къэралыгъо симфоническэ оркестрэ иконцертэу «Мэзым исимфоние» джырэблагъэ гъэпсэфыпIэ шъолъырэу «Мэз­дахэм» щыкIуагъ. ­Республикэм и ЛIышъхьэ игукъэкIыкIэ илъэс къэс ащ фэдэ концертхэр зэхащэх.

Творческэ коллективхэм гъэ­мафэрэ республикэм щыпсэу­хэрэри, ащ ихьакIэхэри якъэгъэлъэгъонхэмкIэ шъхьэихыгъэ чIыпIэ зэфэшъхьафхэм аща­гъэгушIох. Симфоническэ оркестрэм иконцерт гъэпсэфыпIэ шъолъырэу «Мэздахэм» щызэхащэрэ гъэмэфэ къэгъэлъэгъон­хэм зыкIэ ащыщ ыкIи апэрэ культурнэ хъугъэ-шIагъэу хъугъэ. Зызыгъэпсэфырэ цIыфыбэ а чIыпIэм къекIолIэгъагъ. Хьа­­кIэ­хэм ахэтыгъ Адыгеим и ЛIышъхьэу КъумпIыл Мурат. Кон­цер­тым ыуж ар гущыIэгъу афэ­хъугъ цIыфэу къызэIукIагъэхэм ыкIи артистхэм зэрафэразэр ари­Iуагъ.
Концертыр анахь къэзыгъэ­кIэрэкIагъэхэм ащыщ орэдыIоу Дарья Умбинар (сопрано). Дирижер шъхьаIэр — АР-м инароднэ артистэу Аркадий Хус­нияровыр, художественнэ пащэр – УФ-м изаслуженнэ артистэу Андрей Семеновыр ары. Музыкальнэ пчыхьэзэхахьэм хэлэ­жьагъэхэм гущыIэгъу зафэхъум Адыгеим и ЛIышъхьэ къызэрэхигъэщыгъэмкIэ, республикэм ихьакIэхэм ыкIи ащ щыпсэухэ­рэм зыгъэпсэфыпIэ шъолъырэу «Мэздахэр» якIуапIэ хъугъэ, Адыгеим итворческэ купхэм агъэхьазырырэ концертхэр къыз­щатын алъэкIыщт чIыпIэхэм джыри зы къахэхъуагъ. Симфоническэ оркестрэм иконцертхэр гъэмафэрэ джы ренэу мы чIы­пIэм щызэхищэнхэ ылъэкIыщт.
Зызыгъэпсэфыхэрэм респуб­ликэм ипащэ зэрэфэразэхэр къаIуагъ ащ фэдэ Iэрыфэгъу чIыпIэ дахэм, жьы къабзэм хэтхэу, языгъэпсэфыгъо уахътэ агъэкIонымкIэ амал дэгъу яIэ зэрэхъугъэм фэшI. Классическэ музыкальнэ произведениехэмрэ чIыопсым, тыкъэзыуцу­хьэрэ дунаим имэкъэмэ гохьхэмрэ гур къаIэты, пщы­мы­гъупшэжьы­нэу зэхэшIэ дахэ уагъэшIы.
«ЗыгъэпсэфыпIэ чIыпIакIэхэм язэхэщэнкIэ, Мыекъуапэ зе­кIохэр нахьыбэу къекIолIэнхэмкIэ, культурэшхо зиIэ Адыгеир инэшэнэ гъэнэфагъэхэмкIэ нэ­мыкIхэм къахэщыным япхыгъэ Iофтхьабзэу зэшIотхыхэрэр зэрэзэхашъушIэхэрэм сегъэгу­шIо. IофшIэнэу дгъэцакIэрэм икIэух шъхьаIэхэм ащыщ фэIо-фашIэхэм къакIэкIорэ рэзэныгъэр: «Мэздахэм», зыгъэпсэ­фыгъо мафэхэм ямызакъоу, нэмыкI мафэхэми зыщызыгъэ­псэфыхэрэм япчъагъэ нахьыбэ зэрэхъурэр тинэрылъэгъу. Шъо­лъырым изэтегъэпсыхьанкIэ ар апэрэ чэзыу ныIэп. ТапэкIи чIыпIэ Iэрыфэгъу дахэу мыр зэрэхъущтым тыдэлэжьэщт, итхъухьагъэхэри щыIэныгъэм щыпхырытщыщтых. Ащ дакIоу культурэм нахь хэхъоныгъэ ышIынымкIэ зишIуагъэ къэкIощтхэм зыкIэ «Мэздахэр» ащыщ хъуным тынаIэ тедгъэтыщт», — къыIуагъ КъумпIыл Мурат.
Шъугу къэтэгъэкIыжьы: къэлэ Iэрыфэгъу щыIакIэр цIыфхэм яIэным пае къэлэ проект анахь дэгъухэм яя IX-рэ Урысые зэ­нэкъокъу проектэу «Мэздахэм» текIоныгъэр къыщыдихыгъ. Мы шъолъырым изэтегъэпсыхьан сомэ миллиони 175-рэ пэIуа­гъэхьащт. ПсыутIэ Iушъохэм язэ­тегъэпсыхьанкIэ, архитектурэ пкъыгъо цIыкIухэр гъэуцугъэнхэмкIэ, чъыгхэр, къэгъагъэхэр нахьыбэу гъэтIысхьэгъэнхэмкIэ рахъухьагъэр зэкIэ мы илъэсым зэшIуахынхэ мурад яI.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.