2025-рэ илъэсым Адыгэ Республикэм играждан общест­вэ хэхъоныгъэ ышIыным фэIоры­шIэщт грантхэм якъыдэхын епхыгъэ зэнэкъокъум изэ­фэхьысыжьхэр къэ­нэфагъэх, текIоныгъэ къыдэзыхыгъэ­хэм тыгъуасэ сертификатхэр аратыжьыгъэх.
АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч ипэублэ псалъэ текIоныгъэ къыдэзыхыгъэхэм къащыфэгушIуагъ.

— Социальнэ Iофтхьабзэхэм афытегъэпсыхьэгъэ мысатыу организациехэм яобщественнэ гу­къэкIыкIэхэр пхыры­щы­гъэн­хэм фэшI IэпыIэгъу афэхъугъэным республи­кэм мэхьанэшхо щыраты. АР-м и ЛIышъхьэу КъумпIыл Мурат ишIуагъэкIэ мыщ фэдэ организациехэм грантхэр къахьын амал арагъэгъоты. Къыхэгъэщыгъэн фае, гъэрекIо со­циальнэ инициативэхэм со­мэ миллион 44-м ехъу апэIухьанэу агъэнэфэгъагъэмэ, мы илъэсым ар сомэ миллион 54-м кIэхьэ. Хэлажьэхэрэми япчъагъэ нахьыбэ хъугъэ, — къы­Iуагъ Мырзэ Джанбэч.
Мы илъэсым зэкIэмкIи мысатыу организацие 64-рэ зэнэкъокъум хэлэ­жьагъ, ахэм ащыщэу 40-мэ япроектхэр пхырыкIыгъэх ыкIи шъхьадж ыгъэ­хьазырыгъэ гухэлъым елъытыгъэу ахъщэр атырагощагъ.
Ахъщэ IэпыIэгъум ишIуа­гъэкIэ мысатыу организациехэм яIофшIэнкIэ хэхъоныгъэхэр ашIынхэ, ящыкIэгъэ Iэмэ-псымэхэр къащэфын амал яIэ хъущт, лъэныкъо зэфэшъхьафхэмкIэ мэхьанэ ин зиIэ проектхэр щыIэныгъэм щыпхыращыщтых. КъыткIэ­хъухьэрэ лIэужхэм яхэ­гъэгу шIу алъэгъуным, гъэ­шIэ кIыхьэм фэкIонхэм, адыгабзэм изэгъэшIэнкIэ Iофыгъохэр зэшIохыгъэнхэм афытегъэпсыхьэгъэ проектхэр ары текIоныгъэ къыдэзыхыгъэхэр.

«Черкес медиаплатформэм» къыткIэхъухьэрэ лIэ­ужхэм яныдэлъфыбзэ зэрамышIэрэр гумэкIыгъо шъхьаIэу къыIэтыгъ. Грантым ишIуагъэкIэ проекти 3 пхыращынэу агъэнафэ, мультфильмэ 84-рэ къыдагъэкIыгъ, адыгабзэкIэ сериал цIыкIу сабыйхэр хэлажьэхэзэ тырахынэу агъэнафэ ыкIи Нарт эпосым епхыгъэ мультфильмэ агъэуцунэу рахъухьэ.
Грантым ишIуагъэкIэ лъэпкъ журналистикэм епхыгъэ еджапIэ респуб­ликэм иIэ хъущт. Адыга­бзэкIэ Iоф зышIэрэ журналистхэр зэрэмакIэр къыдилъыти, Урысыем ижурналистхэм я Союз и Адыгэ шъолъыр отделение ипащэу ТIэшъу Светланэ проект ыгъэхьазырыгъ. Зэ­нэкъокъум хэплъэрэ экспертхэм ащ дырагъэштагъ ыкIи рейтингымкIэ ятIонэрэ чIыпIэр ыубы­тыгъ. IофшIэн мыпсынкIэм изэшIохын бэ темышIэу ыуж ихьащтых.
ДЕЛЭКЪО Анет.