АР-м и къэралыгъо программэу «Зэ­лъэпкъэгъухэу IэкIыб къэралыгъохэм ащыпсэухэрэр ежьхэм яшIоигъоныгъэкIэ Адыгэ Респуб­ликэм къэкощыжьынхэмкIэ IэпыIэгъу афэхъугъэныр» зыфиIорэр пхырыщыгъэным фэгъэзэгъэ межведомст­веннэ комиссием зэхэсыгъо иIагъ.

Iофтхьабзэр зэрищагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэлэхъо Аскэр.
Тиресубликэ къэзыгъэзэжьыгъэ ти­лъэпкъэгъухэр щыIэныгъэм зэрэхэгъо­зэжьхэрэм, IэпыIэгъу афэхъугъэнымкIэ зэхэщэн Iофтхьабзэу зэрахьэхэрэм къа­тегущыIагъэх Шъхьэлэхъо Аскэррэ АР-м хэгъэгу кIоцI IофхэмкIэ и Минис­терствэ кощын IофхэмкIэ и ГъэIорышIапIэ ипащэ игуадзэу ХьацIэцIэ Рустамрэ.
Комитетым итхьаматэу Шъхьэлэхъо Аскэр къызэриIуагъэмкIэ, къэралыгъо программэр 2019-рэ илъэсым къыщыублагъэу тэ тишъолъыри щагъэцакIэ. Программэм ипхырыщын фэгъэзэгъэ къулыкъу пстэуми зэзэгъыныгъэхэр адашIыгъэу Iоф адашIэ. Ар зыфэIоры­шIэрэр IэпэIэсэныгъэ ин зыхэлъ тилъэп­къэгъухэу IэкIыб къэралыгъохэм ащы­псэухэрэм тишъолъыр къагъэзэжьыныр, республикэм исоциальнэ-экономикэ хэхъоныгъэ яIахьышIу хашIыхьаныр ары.
2025-рэ илъэсым тилъэпкъэгъу нэбгырэ 60-мэ (программэм хэлажьэхэу нэбгырэ 15-мэ, унэгъо 45-мэ) Адыгеим псэупIэкIэ къагъэзэжьынэу щыт. Программэм Iоф зишIэрэ илъэси 6-м къыкIоцI зэкIэмкIи тилъэпкъэгъу нэбгырэ 340-рэ (ахэм яунэгъо 215-рэ) Адыгеим псэупIэкIэ къэкощыжьыгъэх.
2025-рэ илъэсым бэдзэогъум и 1-м ехъулIэу АР-м хэгъэгу кIоцI Iофхэм-
кIэ и Министерствэ кощын IофхэмкIэ и ГъэIорышIапIэ иучет нэбгырэ 23-рэ ыкIи ахэм яунэгъо 12 хагъэуцуагъ. Анахьэу ахэм псэупIэкIэ къыхахыгъэх Мыекъуа­пэ, Тэхъутэмыкъое районыр.
Адыгеим щыпсэунхэу къэкIогъэ ти­лъэпкъэгъухэм УФ-м игражданствэ яIэ зыхъукIэ, мыщ исхэм яфитыныгъэхэр зэкIэ къаратых, джащ фэдэу къэралыгъо программэхэм ахэлэжьэнхэ, япсэупIэ амалхэр нахьышIу ашIынхэ алъэкIы.
Комитетым итхьаматэ къызэрэхигъэ­щыгъэмкIэ, АР-м ихэбзэ гъэцэкIэкIо къулыкъухэр, Адыгеим иобщественнэ организациехэр зэгъусэхэу тилъэпкъэгъухэм ягумэкIыгъохэр зэшIуахых. Ахэм псэупIэхэр, IофшIэпIэ чIыпIэхэр ягъэгъо­тыгъэнхэмкIэ, тхылъхэр афагъэпсынхэмкIэ ящыкIэгъэ IэпыIэгъур арагъэгъоты. Джащ фэдэу тилъэпкъэгъухэм ясабый-
хэр кIэлэцIыкIу IыгъыпIэхэм агъэкIонхэ алъэ­кIыным анаIэ тырагъэты, ащкIэ гумэкIыгъо щыIэп. ЗищыкIагъэхэм ыпкIэ хэмылъэу медицинэ IэпыIэгъур ара-
гъэгъоты.
Зихэкужъ къэзыгъэзэжьыгъэхэр щы­Iэныгъэм хэгъэгъозэжьыгъэнхэмкIэ мэ­хьанэшхо зиIэхэм ащыщ зыщыпсэущт-
хэ унэхэр зэрагъэгъотынхэр. Программэм игъэцэкIэн къызэрэдыхэлъытагъэу, псэу­пIэ зэрагъэгъотыным пае зэтыгъо ахъщэ IэпыIэгъу афатIупщы. ТичIыпIэгъухэм ежьхэм яахъщи халъхьэзэ псэу­пIэхэр ащэфых.
Комитетым ипащэ анахь гумэкIыгъо шъхьаIэу зигугъу къышIыгъэхэм ащыщ тилъэпкъэгъухэм якъэкIожьын. Непэ чIыпIэ къинэу тихэгъэгу зэрытым елъы­тыгъэу, ахэм якъэкощыжьын нахь хьылъэ хъугъэ, 2025-рэ илъэсым мэзаем и 5-м къыщыублагъэу кощын IофхэмкIэ хэ­бзэ­гъэуцугъэм зэхъокIыныгъэ инхэр фэ­хъугъэх, шапхъэхэр агъэлъэшыгъэх.
Мы къэралыгъо программэм фэгъэ­хьыгъэу 2025-рэ илъэсым изэфэхьысыжьхэм къатегущыIагъ ХьацIэцIэ Рус­там. Ащ къызэриIуагъэмкIэ, мы илъэ-
сым имэзихэу пыкIыгъэм программэм хэлажьэ ашIоигъоу IэкIыбым щыщхэм ялъэIу тхылъи 10 фэдиз ГъэIорышIапIэм къыIэкIэхьагъ. Ахэм ащыщэу нэбгыри 4-р ыкIи ахэм яунэгъуи 9 программэм хэлэжьэнхэ фитэу учетым хагъэуцуагъ. Программэм хэлажьэрэр ыкIи ащ иунагъо Адыгеим ишъолъыр къыхиубытэрэ муниципальнэ образованиеу ыкIи къалэу зыфаем щыпсэун ылъэкIыщт.
Программэм ишIуагъэкIэ Адыгеим псэупIэкIэ къэкощыжьыгъэхэр Абхъазым, Шам, Тыркуем, Казахстан, Германием, Киргизием, Туркменистан, Таджикистан, Молдовэм къарыкIыгъэх.
Зэхэсыгъом къыщаIэтыгъэ Iофыгъохэм япхыгъэ унашъохэм япроектхэм ахэп­лъэнхэу аштагъэх. Ахэм ащыщ къэралыгъо программэу «Тилъэпкъэгъухэу IэкIыб къэралыгъохэм ащыпсэухэрэр ежьхэм яшIоигъоныгъэкIэ Адыгэ Рес­публикэм къэкощыжьынхэмкIэ IэпыIэгъу афэхъугъэныр» зыфиIорэр пхырыщыгъэ­ным зэхъокIыныгъэхэр фэшIыгъэнхэр.
КIАРЭ Фатим.