Футболист ныбжьыкIэхэм яIэпэIэсэныгъэ, текIоныгъэм зэрэфаблэхэрэр, командэм хэтхэм язэдегъэштэныгъэ ­къыщагъэлъэгъуагъ мэфэ зэкIэлъыкIохэм Мыекъуапэ щыкIогъэ Урысые зэнэкъокъухэу «Хьэшъо Iэгуау» зыфиIохэрэм.

«Хьэшъо Iэгуаор» футболымкIэ турнир къодыеу щытэп, советскэ ыкIи урысые кIэлэцIыкIу футболым итарихъ чIыпIэшхо ащ щеубыты. 1964-рэ илъэсым ар зэхащагъ ыкIи пшъэрылъ шъхьаIэу иIагъэр кIэлэцIыкIухэмрэ зихэ­хъогъухэмрэ нахьыбэу футболым хэщэгъэнхэр, сэнаущыгъэ мыщкIэ зыхэлъхэр къыхэгъэщыгъэнхэр ары. ЗэлъашIэрэ футболистхэм ащыщхэми яспорт щыIэныгъэ «Хьэшъо Iэгуаом» къыщежьэ. Олег Блохиным, Игорь Доброволь­скэм, Валерий Карпиным яапэрэ гъэхъагъэхэр ащ щашIыгъэх.
«Хьэшъо Iэгуаом» иреспубликэ уцугъо стадионэу «Юностым» щы­кIуагъ, ар мэфэкI шъыпкъэ хъугъагъэ хэлажьэхэрэмкIи, футболыр зикIасэу ащ къекIолIа­гъэхэмкIи, кIэлэцIыкIухэм янэ-­ятэхэмкIи. Аныбжь елъытыгъэу футболистхэр купищэу гощы­гъагъэх. АнахьыкIэхэр, 2014 — 2015-рэ илъэсым къэхъугъэхэу Адыгеим имуниципалитет зэфэшъхьафхэм къарыкIыгъэхэр зыха­хьэхэрэр команди 7 хъущтыгъэх. Анахь лъэшэу къэлъэгъуагъ Мые­къопэ районым икомандэу Красногвардейскэ районым къикIы­гъэм 2:1-у текIуагъэр. Ящэнэрэ хъугъэх Адыгэкъалэ ифутболистхэр. 2012 — 2013-рэ илъэсым къэ­хъугъэхэр зыхахьэщтыгъэ командэхэмкIэ анахьышIоу футбол ешIа­гъэхэр Теуцожь районым къикIыгъэхэр ары. Ахэр Мыекъопэ районым икомандэ 1:0-у текIуагъэх. Джэрз медалыр афагъэшъошагъ Джэджэ районым испортсменхэм.
Анахьыжъхэм, 2010 — 2011-рэ илъэсым къэхъугъэхэм якуп хэт­хэм ащыщэу Мыекъопэ районым икомандэ финалым нэсыгъ, ау текIоныгъэ шъхьаIэр къыдихын ылъэкIыгъэп. Турнирым ичем-­
пион мы купымкIэ хъугъэ Кощ­хьэблэ районым икомандэу ешIэгъу шъхьаIэр 1:0-у зыухыгъэр. Ящэнэрэ чIыпIэр аубыытыгъ Красногвардейскэ районым испорт­­сменхэм.
ЗэхэщакIохэр мэгугъэх «Хьэшъо Iэгуау» зыфаIорэ турнирым тапэкIи зиушъомбгъунэу, сэнаущыгъэ зыхэлъ ныбжьыкIабэ мы спорт лъэпкъым фищэнхэу.