БзэджэшIагъэхэр къычIагъэщых
Оперативнэ-пэшIорыгъэшъ Iофтхьабзэу «Мак-2025» зыфиIорэм иапэрэ едзыгъо Адыгэ Республикэм щыкIуагъ.
Мы IофтхьабзэмкIэ зэхэщакIохэм мурадэу яIагъэр наркотикхэр хэбзэнчъэу къызIэкIэзыгъахьэхэрэр
ыкIи къезыгъэкIокIыхэрэр къыхэгъэщыгъэнхэр, мы лъэныкъомкIэ бзэджэшIагъэу зэрахьэхэрэр къычIэгъэщыгъэнхэр, наркотик зыхэлъэу хэбзэнчъэу къагъэкIыгъэхэр гъэкIодыгъэн-
хэр ары.
Анахьэу анаIэ зытырагъэтыгъэр наркотик зыхэлъ веществохэр къезыгъэкIокIыхэрэм, хэбзэнчъэу ахэр къэзыгъэкIыхэрэм ыкIи ахэм наркотик ахэзышIыкIыхэрэм ябэныгъэныр ары.
ПэшIорыгъэшъ Iофтхьабзэм изэхэщэнкIэ полицием иIофышIэхэм яIэпыIэгъух щынэгъончъэнымкIэ Федеральнэ къулыкъум ыкIи Росгвардием ягъэIорышIапIэхэу АР-м щыIэхэр, нэмыкI ведомственнэ ыкIи структурэ зэфэшъхьафхэм ялIыкIохэр.
Iофтхьабзэр зыщыкIогъэ уахътэм къыриубытэу мы лъэныкъомкIэ бзэджэшIэгъи 5 къыхагъэщыгъ. Наркотикым епхыгъэ бзэджэшIагъэ зэрахьагъэу егуцафэхэу нэбгыри 4 къаубытыгъ, ахэм уголовнэ пшъэдэкIыжь къафызэIуахыгъ. Мыхэм анэмыкIэу нэбгырэ 18-мэ административнэ пшъэдэкIыжь атыралъхьагъ.
ЗэкIэмкIи хэбзэнчъэу къырагъэкIокIыщтыгъэ наркотик зыхэлъ вещество грамм 640-рэ къаIахыгъ.
Полицием цIыфхэм закъыфегъазэ! Хэбзэнчъэу наркотикыр къезыгъэкIокIыхэрэм ыкIи IузыгъэкIыхэрэм якъэбар шъущыгъуазэмэ хэгъэгу кIоцI къулыкъум иотделэу Мыекъуапэ щыIэм ителефон номерхэу: (8772) 59-64-00-м, 52-57-27-м е 02-м шъуафытеу.
АР-м хэгъэгу кIоцI IофхэмкIэ
и Министерствэ ипресс-къулыкъу.