АР-м культурэмкIэ и Министерствэ иобщественнэ ыкIи культурнэ фэIо-фашIэхэр цIыфхэм зэрарагъэгъотырэм уасэ фэшIыгъэнымкIэ исоветхэм зичэзыу зэхэсыгъо яIагъ. Iофтхьабзэм хэлэжьагъэх министрэу Аулъэ Юрэрэ игуадзэу Кушъу Светланэрэ.

Советхэм илъэсищ IофшIэным зэфэхьысыжьхэр фашIы­гъэх, пIэлъакIэмкIэ зыдэлэ­жьэщтхэр агъэнэфагъэх. Зэхэсыгъор гушIогъо IофкIэ аублагъ. Советхэм яIофшIэн чанэу хэлэжьагъэхэм АР-м культурэмкIэ и Министерствэ ирэзэныгъэ тхылъхэр министрэм ариты­жьыгъ, Iофэу ашIэрэм мэхьанэ ин зэриIэр къыхигъэщыгъ.
— Советхэм ахэтэу аужырэ илъэсищым Iоф зышIагъэхэм «тхьашъуегъэ­псэу» къышъуасIо сшIоигъу. ЗымышIэрэм шъуиIофшIэн псынкIэу къыщыхъущт, ау ар IэшIэхэп ыкIи ищыкIэгъэ дэд. Культурэм ылъэны­къокIэ зэшIотхырэ Iофы­гъохэм, гъэцэкIэжьынхэм шIуагъэу къатырэр тшIэнымкIэ шъо IэпыIэгъу шъу­къытфэхъу. Тэ тшъхьэкIэ зэкIэми танэсынэу, зэдгъэлъэгъунэу хъурэп. Мыщ дэжьым шъуишIогъэшхо къэкIо. А пстэур къэшъо­кIухьэ, фэныкъуагъэхэр, щы­кIагъэхэр къыхэшъогъэщых, тыздэлэжьэн фаем тынаIэ тетэшъогъадзэ, — къариIуагъ Аулъэ Юрэ.
Зэхэсыгъор лъигъэкIотагъ министрэм игуадзэу Кушъу Светланэ. Ащ къызэриIуагъэмкIэ, культурэмкIэ Минис­терствэм исоветхэм зичэзыу илъэсищ IофшIэнэу аублэрэмкIэ бэ къапыщылъыр. Культурэм илэ­жьэпIэ унэ 50-м ехъу ауплъэ­кIущт. Ахэм ахэхьэх культурэм иунэ­хэр, искусствэхэмкIэ еджапIэхэр, тхылъеджапIэ­хэр, лъэпкъ культурэм игупчэхэр ыкIи нэмыкIхэр. Пчъагъэр ­илъэсищым атырагощагъ. Мыгъэ лэжьэпIэ унэ 17 советхэм ахэтхэм къакIухьащт. Ахэр Адыгэкъалэ, Мыекъуапэ ыкIи Мыекъопэ районым ащыIэх. ЯIофшIэн зэрэзэхэщагъэр, ­
икъоу фэIо-фашIэхэр арагъэ­гъотыхэмэ, шапхъэхэр агъэца­кIэхэмэ зэрагъэшIэщт. Апэрэ дэкIыгъохэри рахъухьэгъахэх. Бэдзэогъум и 8-м Мыекъопэ районым еблэгъэщтых, Тульскэм щылэжьэщтых
Анцокъо Ирин.