Дунэе фестиваль-зэнэ­къо­къоу «Лъэпкъым ыпс» зыфиIорэр Адыгеим икъэлэ шъхьаIэ щыкIуагъ.

Урысыем и Къыблэ шъолъыр къарыкIыгъэ къэшъокIо куп 30-м ехъу ащ хэлэжьагъ, нэбгырэ 550-мэ ясэнаущыгъэ Iофтхьабзэм къыщагъэлъэгъуагъ. Культурнэ гухэлъхэмкIэ Президентскэ фондым игрант-проектэу «Жемчужины Адыгеи» зыфиIорэм къыдыхэлъытагъэу ар рагъэкIокIыгъ. Мыщ хэлэжьагъэхэр зыщыщ лъэпкъымрэ бзэу аIулъымрэ ямылъытыгъэу, къэшъоным ыбзэ нахь благъэ зэфишIыгъэх.
Кавказым ыкIи дунаим мамырны­гъэр ащыгъэпытэгъэным фестивалыр фэгъэ­хьыгъагъ. ЦIыф лъэпкъхэм якультурэ къэухъумэгъэнымкIэ ыкIи хэхъоныгъэ егъэшIыгъэнымкIэ, зэкъошныгъэ зэфыщытыкIэхэр гъэпытэгъэнхэмкIэ мыщ фэдэ Iофтхьабзэхэм мэхьанэшхо яI.
Сэнаущыгъэ зыхэлъ ныбжьыкIэхэр къыхэгъэщыгъэнхэм ыкIи ахэм адеIэгъэ­ным, лъэпкъ зэфэшъхьафхэм культурэмкIэ язэдэлэжьэныгъэ зегъэушъомбгъугъэным Iофтхьабзэр афэIорышIагъ.
КIэлэцIыкIу къэшъокIо купхэр творческэ зэнэкъокъум чанэу хэлэжьагъэх. ТекIоныгъэ къыдэзыхыгъэхэм ащыщых: ансамблэхэу «Форвард», «Сюрприз» «Алекс» зыфиIохэрэр, кIэлэцIыкIу къэшъокIо купэу «Мыекъуапэ инэфылъэхэр», студиеу «Майкопчанкэр». Ахэм Адыгэ Республикэм ищытхъу арагъаIо.
Культурэм щыцIэрыIо цIыфхэр осэшI купым хэхьагъэх. Ахэр Адыгеим, Къэ­бэртэе-Бэлъкъарым, Краснодар краим ялIыкIох. Мыекъопэ къэлэ администрацием культурэмкIэ и ГъэIорышIапIэ ипащэу Цэй Розэ купым ипэщагъ.
— Культурэм епхыгъэ Iофтхьабзэхэм язэхэщэн Адыгеим мэхьэ­нэ ин щыраты. Фестиваль-зэ­нэкъокъум ипшъэрылъ шъхьаIэр искусствэм хэхъоныгъэ егъэшIыгъэныр, сэнаущыгъэ зыхэлъ ныбжьыкIэхэр къыхэгъэщыгъэнхэр, лъэпкъ зэфэшъхьафхэр зэхищэнхэр, зым икультурэ адырэм ригъэлъэгъуныр ары. А пшъэ­ры­лъыр къыддэхъугъэу сэлъытэ, — къыIуагъ Цэй Розэ.
Лъэпшъыкъо Фатим.