Урысые Федерацием ишъолъырыкIэхэм, Донецкэ ыкIи Луганскэ народнэ респуб­ликэхэм, Запорожскэ ыкIи Херсон хэкухэм ясоциальнэ-­экономическэ хэхъоныгъэ фэгъэхьыгъэ IофыгъохэмкIэ зэхэсыгъо зэхищэгъагъ къэралыгъом ипащэу Владимир Путиным.

Геническэ районым и Новоалексеевскэ еджапIэу N 2-м ифизкультурнэ-псау­ныгъэм изэтегъэуцожьын псэуалъи игугъу ащ ща­шIыгъ. Херсон хэкум игубернаторэу Владимир Сальдо УФ-м и Президент зэрэфэразэр къыIуагъ зы­наIэ къатетыщтхэр афэ­гъэ­загъэхэу IэпыIэгъу къызэрарагъэкIырэм пае ыкIи Геническэ районым изэтегъэуцожьынрэ хэхъоныгъэ егъэшIыгъэнымрэ Адыге­им иIахьышхо зэрэ­хэлъыр къыхигъэщыгъ.
ГущыIэм пае, Новоалексеевскэ еджапIэм спорткомплексыр щызышIыгъэр тиреспублик. Владимир Путиным ащ къыдыригъэштагъ ыкIи Адыгеим спортым ылъэныкъокIэ хэхъоныгъэ инхэр зэриIэхэм къыкIигъэтхъыгъ.
Iофэу шъолъырым ща­шIэрэм осэ ин къызэрэфи­шIыгъэм пае къэралыгъом ипащэ зэрэфэразэр Адыге­им и ЛIышъхьэу КъумпIыл Мурат къыхигъэщыгъ. «Мэхьанэшхо иI Геническэ районым IэпыIэгъу фэхъу­гъэным иIофыгъо хъыз­мэт­шIэпIабэ, организацие­хэр ыкIи республикэм щы­псэурэ цIыфхэр къызэрэхэ­лажьэхэрэм», — къащи­тхыгъ Адыгеим и ЛIышъхьэ исоциальнэ нэкIубгъохэм.
Республикэм ынаIэ зытет чIыналъэм мамыр щы­IакIэр щызэтегъэуцо­жьыгъэным пстэури зэ­гъусэхэу зэрэдэлажьэхэрэр ащ къыхигъэщыгъ ыкIи лъэныкъо зэфэшъхьафхэм япхыгъэ гумэкIыгъохэр зэ­рэзэхафыхэрэр къыIуагъ. Ахэм ащыщых социальнэ ыкIи инженернэ инфраст­руктурэм изэтегъэпсы-­
хьан: 1 МФЦ, физкультурнэ-псауныгъэм изэтегъэуцожьынкIэ псэолъи 4, спор­тым зыщыпылъыщтхэ чIыпIи 4 ыкIи кIэлэцIыкIу джэгупIэ 12, мыхэм къапэIулъ чIыналъэхэм язэтегъэпсыхьан; еджэпIиплIырэ кIэлэцIыкIу IыгъыпIитIурэ, краеведческэ музеир агъэ­цэкIэжьыгъэх. Мы илъэсым псэупIэу Вольнэм еджапIэу дэтым гъэцэкIэжьын ку­ухэр щашIыщтых, ащ къыпэIулъ чIыналъэр зэты­рагъэпсыхьащт, спортым зы­щыпылъыщтхэ чIыпIэр ашIыщт. Бжыхьэ-кIымэфэ уахътэу къэблагъэрэм социальнэ псэуалъэхэр фэгъэхьазырыгъэнхэр Адыгеим икIыгъэхэм зэшIуахы. Рес­публикэм ынаIэ зытыри­гъэтырэ районхэм ащы­псэурэ сабыйхэм Адыгеим икIэлэцIыкIу зыгъэпсэфыпIэхэм яуахътэ гъэмафэм ащагъакIо. Джащ фэдэу Херсон хэкум «псауныгъэм имэшIокухэр» щатIупщых. Республикэм ынаIэ зытет районхэм яадминистрациехэм яIофышIэхэр Адыгеим имуниципальнэ псэу­пIэхэм къэкIох IофшIэкIэ амалхэр зэрагъэгъотынхэу, еджэнхэу.
«Херсон хэкум ипащэ­хэм ыкIи ежь Владимир Сальдо зэгурыIоныгъэ зы­хэлъ зэдэлэжьэныгъэ
адэт­шIыгъэу сыд фэдэрэ IофыгъокIи тызэгурэIо, ар къытфэфедэ мэхьанэшхо зиIэ пшъэрылъхэр зэшIотхынхэмкIэ, ыпэкIэ тылъыкIотэнымкIэ. ТапэкIи ти­зэ­дэлэжьэныгъэ зедгъэу­шъомб­гъущт ыкIи тиIахь хэтлъхьащт Херсон хэкум зиужьыжьыным. Iоф­шIэныр лъыдгъэкIотэщт!» — къы­Iуагъ КъумпIыл Мурат.