Бэдзэогъум и 1-м я 131-рэ мотострелковэ бригадэм идзэ­кIолIхэм яшIэжь фэгъэхьыгъэ мемориал зэхэтым зэхахьэ щыкIуагъ. Зэо зэфэшъхьафхэм ыкIи Iэшэ зэIуупIэныгъэхэм яветеранхэм я Мафэ ар фэ­гъэхьыгъагъ.

Iофтхьабзэм хэлэжьагъэх республикэ ыкIи къэлэ къэралыгъо хэбзэ къулы­къухэм, ветеран ыкIи гуфэкIо организациехэм ялIыкIохэр.
Зэхахьэр къызэIуихыгъ ыкIи зэри­щагъ ветеранхэм я Урысые общественнэ ор­ганизацие и Адыгэ республикэ къута­мэу «ДзэкIолI зэкъошныгъэр» зыфиIорэм итхьаматэу Алексей Харитоновым.
— Мы мафэр Урысыем ишъхьафитыныгъэ фэбэнэгъэ пстэуми яшIэжь фэгъэхьыгъ. Зэо ыкIи Iэшэ зэIуупIэныгъэу ахэр зыхэлэжьагъэхэр арэп мэхьанэ зиIэр, Хэгъэгур къыухъумэзэ дзэкъулыкъушIэм ипшъэрылъ зэригъэцэкIагъэр ары. Непэ ветеран пстэуми шъхьащэ афэтэшIы, къытхэмытыжьхэми яшIэжь тэгъэлъапIэ, — къыIуагъ Алексей Харитоновым.
Адыгеим и ЛIышъхьэу КъумпIыл Мурат, депутатхэм ацIэкIэ, ежь ышъхьэкIи мы мафэмкIэ къафэгушIуагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.
— ЛIыхъужъныгъэрэ лIыгъэрэ къызха­гъафэзэ, Iашэр зыIыгъэу Урысыер къэзыухъумэгъэ пстэуми рэзэныгъэ гущы­Iэхэр афэтэIох. Хэгъэгу зэошхом икъиныгъохэр зэпызычыгъэхэми, къэралыгъом игъунапкъэхэм ашIокIэу къулы­къур зыхьыгъэхэми, джы хэушъхьафыкIыгъэ дзэ операцием хэлэжьэгъэ пстэуми мыр афэгъэхьыгъ. Хэгъэгум ахэр фэшъыпкъагъэх. Хэгъэгум иухъумакIохэу зыпсэ зыгъэтIылъыгъэхэм ягупсэхэм ыкIи яIа­хьылхэм ялыуз адэтэгощы, ЛIыхъужъхэм ацIэхэр къэралыгъом итарихъ егъашIэм хэтыщтых, яшIэжь тыгухэм арылъыщт, — хигъэунэфыкIыгъ Цэй Эдуард.
Джащ фэдэу зэо ыкIи зэпэуцужь зэ­фэшъхьафхэм яветеранхэр республикэм иэкономикэ, иполитикэ щыIакIэ чанэу зэрэхэлажьэхэрэр, ныбжьыкIэхэм япатриотическэ пIуныгъэ емызэщыжьхэу ыуж зэритхэр, дзэ операцием хэла­жьэ­хэрэм IэпыIэгъу зэрафэхъухэрэр Парламентым и Тхьаматэ игуадзэ къыхигъэщыгъ.
Мыекъопэ къэлэ администрацием ипащэ игуадзэу Андрей Михайловым зиIофшIэнкIэ къахэщыгъэ ветеранхэм щытхъу тхылъхэр аритыгъэх.
Нэужым щымыIэжь дзэкъулы­къушIэ-
хэм такъикърэ афэшъыгъуагъэх, сау­гъэтым къэгъагъэхэр кIэралъхьагъэх. Къэзэрэугъоигъэхэр зэхэтхэу «Дзэ­кIолIхэм япсынэкIэчъ» екIолIагъэх. Ащи зэхахьэ щырагъэкIокIыгъ.
Iэшъынэ Сусан.