Мы мафэхэм Дондуковскэ мэкъумэщ техникумым «Труд Крут» зыфиIорэ зэнэкъокъур щыкIуагъ. Тракторист сэнэхьатым епхыгъэ гъэсэныгъэ тедзэ зэзыгъэгъотыгъэ ныбжьыкIэхэм яаужырэ ушэтын хъугъэ мы зэнэкъокъур. Анахь дэгъоу зыкъэзыгъэлъэгъуагъэхэр агъэшIуагъэх.

Къэралыгъо программэм ишIуагъэкIэ Урысые ныбжьыкIэ общественнэ организациеу «Урысые студент отрядхэр» зыфиIорэм и Адыгэ шъолъыр къутамэ республикэм нахь ищы­кIэгъэ сэнэхьатхэм япхыгъэ егъэ­джэн тедзэхэр ыпкIэ хэмылъэу ныбжьыкIэхэм зэрагъэ­гъотынымкIэ Iофышхо зэшIуехы.
— НыбжьыкIэхэр зыфеджэрэ сэнэхьатым нэмыкIэу гъэсэ­ныгъэ тедзэ зэфэшъхьафхэм япхыгъэ шIэныгъэхэр зэрагъэгъотынхэ амал яI. Гъэсэныгъэ учреждениехэм зэзэгъыныгъэ адэтшIызэ, вожатэхэр, барменхэр, пщэрыхьакIохэр ыкIи шъо­лъырым нахь ищыкIэгъэ нэмыкI лъэныкъохэмкIи рагъаджэх. Адыгеир мэкъумэщ рес­публикэу зэрэщытыр къыдэт­лъытэзэ, тракторист сэнэхьатри джы хэдгъэхьагъ. Дондуковскэ мэкъумэщ техникумым зэзэ­гъыныгъэ дэтшIи, мэзищым къыкIоцI нэбгырэ 20 мы сэнэ­хьатым фырагъэджагъ, — къы­Iуагъ Ярослав Борсук, студент отрядхэм япащэ.
Техникумым ипащэу Чыназыр Руслъан зэнэкъокъум ипэублэ къэзэрэугъоигъэхэм шIуфэс къа­рихыгъ, мэкъумэщ сэнэхьат зэфэшъхьафхэм япхыгъэ шIэныгъэхэр студентхэм арагъэ­гъотыным пае ищыкIэгъэ Iэмэ-­псымэхэр зэкIэ зэряIэр къы­хигъэщыгъ. Зэрагъэгъотыгъэ шIэныгъэхэр зэрифэшъуашэу къагъэлъэгъожьынэу студентхэм закъыфигъэзагъ.

Зэнэкъокъум къыдыхэлъытагъэу ыпэрапшIэу компьютерымкIэ тракторым изэхэлъыкIэ зэрашIэрэр къагъэлъэ­гъуагъ, двигателыр зэхахыгъ, зэхалъхьа­жьыгъ, нэужым тракторым кIэрытIыс­хьагъэх, гъогурыкIоным ишапхъэхэр къыдалъы­тэзэ, ар агъэIорышIагъ, джащ фэдэу пхъэIашэми Iоф дашIагъ. ЛъэныкъуиплIыкIэ зэтеутыгъэу ныбжьыкIэхэм зау­шэтыгъ.
Ушэтыныр зэрифэшъуашэу зытыхэрэм зэреджагъэхэр къэзыушы­хьатырэ тхылъхэр аратыжьыгъэх. Нэужым, тракторыр зэрафэнымкIэ фи­тыныгъэ къязытыщт водительскэ удостоверениер къызыдахыкIэ, Дондуковскэ элеваторым мэзитIо практикэр ща­хьыщт. Зэнэкъокъум изэфэхьысыжь къы­зэригъэлъэгъуагъэмкIэ, апэрэ чIыпIэр Максим Акатьевым къыдихыгъ, Альберт Богосян ятIонэрэ, Виталий Волошиныр ящэнэрэ хъугъэх.

— Гъэсэныгъэ тедзэ зэзгъэгъотын амал зэрэщыIэр зызэхэсэхым, семыгупшысэу сыкIуагъ, шIэныгъэ лые щыIэп. Ветеринар сэнэхьатым имызакъоу, трак­тористэуи Iоф сшIэн амал сиIэ хъу­гъэ. Къоджэ псэупIэм удэсмэ, къыпфэфедэ­жьыщт. Мэзищым къыкIоцI шIэныгъэ дэгъухэр зэрэтагъэгъотыгъэм ишIуагъэкIэ апэрэ чIыпIэр къэсхьыгъ, ащ сырэгушхо, — къыIуагъ Максим.

ДЕЛЭКЪО Анет.