Хэгъэгум ишъолъырыбэмэ зэращыщыты­гъэм фэдэу тыгъуасэ Адыгеими щымэфэкIышхуагъ, гурыт еджа­пIэхэр къэзыухыгъэхэм ябал щыкIуагъ. Мыгъэ ар ТекIоныгъэшхом ия 80-рэ илъэс фэгъэхьыгъагъ.

Республикэ балыр зыщыкIуагъэр Мыекъуапэ ипчэгу шъхьаIэу В. И. Лениным ыцIэ зыхьырэр ары. ЕджапIэхэр къэзыухыгъэ нэбгырэ 1700-у Адыгеим икъалэхэмрэ ирайонхэмрэ къарыкIыгъэ­хэр, ахэм янэ-ятэхэр, кIэлэегъаджэхэр, хьакIэхэр мыщ къыщызэрэугъоигъэх. АР-м и ЛIышъхьэу КъумпIыл Мурат, республикэм ихэбзэ къулыкъухэм ялIыкIохэр, муниципалитетхэм япащэхэр мэфэкI Iофтхьабзэм хэлэжьагъэх.
Республикэм имуниципалитетхэм якIэлэеджакIохэм гъэхъагъэу яIэхэм ягугъу къашIызэ, ныбжьыкIэхэр алы­рэгъу плъыжьым рыкIохи, мэфэкIыр къызэIуа­хыгъ. Гурыт еджапIэр къызэраухыгъэмкIэ, щыIэныгъэм ичэзыукIэ зэрэрагъа­жьэрэмкIэ ныбжьыкIэхэм афэгушIуагъэх. АР-м и ЛIышъхьэ мыщ фэдэ хъугъэ-шIэгъэшхомкIэ еджапIэхэр къэзыухыгъэхэм афэгушIуагъ.

«ЕджапIэм шъукъызэрэчIэкIырэм тегъэпсыхьэгъэ Iофтхьабзэр мэфэкI къодыеу щытэп. Мэхьанэшхо зиIэ, кIэлэцIыкIугъор къызыщызэшъунэкIыгъэ, шъуапэкIэ амалыбэ зыщыжъугъо­тыщт уахътэу ар щыт. ЕджапIэхэм джыри шъуачIэсызэ, шъо къэжъугъэлъэгъуагъ мурад гъэнэфагъэхэр зыфэжъугъэуцунхэ ыкIи ахэм шъуа­фэкIон зэрэшъулъэкIырэр. Еджэнми, творчествэми, спортми гъэхъагъэу ащышъушIыгъэхэм, IофышIухэм шъу­зэрахэлэжьагъэм къаушыхьаты шъуилIэуж зэчыишIоу, чанэу зэрэщытыр», — къыIуагъ КъумпIыл Мурат.
Адыгеим и ЛIышъхьэ агу къыгъэкIы­жьыгъ ТекIоныгъэм ия 80-рэ илъэсрэ Хэгъэгум иухъумакIо и Илъэсрэ мыгъэ Урысыем зэрэщыхагъэунэфыкIыхэрэр. Непи, илъэс 80-кIэ узэкIэIэбэжьмэ зэрэщытыгъэм фэдэу, дзэкIолIхэм тихэгъэгу исуверенитет къаухъумэ.
«Неущрэ мафэр зыфэдэщтыр зэлъытыгъэр ныбжьыкIэхэр ары. Ащ фэдэ пшъэрылъыр гъэхъагъэ хэлъэу зэрэ­жъугъэцэкIэщтым сицыхьэ телъ, сыда пIомэ ушэтын хьылъэ дэдэхэр зэпызычыгъэ лIэужхэм акIуачIи, язэчыйи, яакъыли шъо шъухэлъ. НыбжьыкIэхэр ыпэкIэ лъыкIотэнхэмкIэ, яамалхэм зыкъызэIуахынымкIэ тиреспубликэ фэлъэ­кIырэр зэкIэ ешIэ», — къыIуагъ КъумпIыл Мурат еджапIэхэр къэзыухыгъэхэм зафигъазэзэ.
КъыткIэхъухьэрэ ныбжьыкIэхэм зэрарыгушхорэр, олимпиадэхэм, спорт, творческэ зэнэкъокъухэм ащатекIуагъэ­хэр, общественнэ Iофхэм чанэу ахэлажьэхэрэр ахэм зэрахэтхэр республи­кэм ипащэ къыхигъэщыгъ. Мыгъэ нэбгыри 8 зыкI къэралыгъо ушэтынхэмкIэ лъэгэпIэ анахь инхэм анэсыгъэх. Мые­къуапэ илицееу N 34-м икIэлэеджакIоу Александр Мусиным урысыбзэмрэ физикэмрэкIэ балли 100 зырыз къыхьыгъ. Джащ фэдэу лицееу N 34-м икIэлэеджа­кIоу Анастасия Гужовам химиемкIэ, Яблоновскэ гурыт еджапIэу N 5-м икIэлэеджакIоу Аскар Шафиковым химиемкIэ, Инэм гурыт еджапIэу N 25-м икIэлэеджакIоу Татьяна Лысенкэм урысыбзэмкIэ, Мыекъопэ гурыт еджапIэу N 2-м икIэлэеджакIоу Полина Пранкевич литературэмкIэ, Адыгэ республикэ гимназием икIэлэеджакIоу ХьакIмэфэ Мэдин физикэмкIэ, Мыекъопэ гурыт еджапIэу N 7-м икIэлэеджакIоу Роман Сафроновым географиемкIэ, Мыекъопэ лицееу N 19-м икIэлэеджакIоу Яна Исущевам урысыбзэмкIэ балли 100 къахьыгъ. Адыгеим икIэлэеджэкIо 89-мэ предмет зэфэшъхьафхэмкIэ балл 90-рэ ыкIи ащ нахьыбэ къахьыгъ. Хабзэ зэрэхъугъэу, республикэм иныбжьыкIэхэу гурыт еджа­пIэхэр дэгъоу къэзыухыгъэхэм ушэтынхэм ауж зафэгушIохэрэр.
«Шъуигъэхъагъэхэм тарэгушхо. Шъуащыщ пэпчъ игъогоу щыIэныгъэм щыпхырищыщтыр къыхихынымкIэ, республикэмрэ хэгъэгумрэ яхэхъоныгъэ иIахь ахишIыхьанымкIэ ищыкIэгъэ амалхэр тапэкIи зетхьащтых, — къыIуагъ КъумпIыл Мурат. — Ти Адыгей хэхъоныгъэ ышIызэ ыпэкIэ лъэкIуатэ. Шъори гъэсэныгъэ зэжъугъэгъотынышъ, псэолъэшIыным мыщ шъущыпы­лъынэу, сымаджэхэм шъущяIэзэнэу, щежъугъэджэнхэу тышъо­жэ. Адыгеим шIу шъущалъэгъу ыкIи цыхьэ къыщышъуфашIы! ШъуищыIэныгъэ хъярыбэ хэрэлъ, насыпышIо шъыпкъэ шъохъу! Шъуи­гухэлъхэр Тхьам къыжъу­дегъэхъух!»
Адыгеим и ЛIышъхьэ кIалэхэмрэ пшъашъэхэмрэ афэлъэIуагъ ямурадхэр къадэхъунхэм пае пытагъэ къызхагъэ­фэну, ныбжьыкIэхэм япIун яIахь зэрэха­шIыхьэрэм фэшI кIэлэегъаджэхэмрэ ны-тыхэмрэ «тхьашъуегъэпсэу» ари­Iуагъ.
Мы мафэм мэфэкI программэ гъэшIэгъон цIыфхэм къапагъохыгъ. ЕджапIэхэр къэзыухыгъэхэм янэ-ятэхэм ягъусэхэу къашIыгъэ вальсыр ТекIоны­гъэм ия 80-рэ илъэс фагъэхьыгъ. Джащ фэдэу ныбжьыкIэхэр флэшмобым хэлэ­жьагъэх, урыс, адыгэ лъэпкъ къашъо­хэр къашIыгъэх. «ГушIогъо маф» зыфиIорэ орэдым дахэу къыдэшъуагъэх.
Тыгъосэрэ Iофтхьабзэр культурнэ хъугъэ-шIэгъэшхо хъугъэ. Мэкъэмэ зэфэшъхьафхэмрэ чэфыгъомрэ зэрэпчэгоу зэлъаIыгъыгъ. НыбжьыкIэхэм янэ-ятэхэр, якIэлэегъаджэхэр ягъусэхэу псыутхэу агъэкIэжьыгъэм, къэгъэгъэ гъэкIыпIэхэм адэжь сурэтхэр щызытыра­рагъэхыгъэх. ЗэкIэри зэгъусэхэу респуб­ликэм иартистхэм къаIогъэ орэдхэм къадэшъуагъэх. МэфэкI Iофтхьабзэр къагъэдэхагъ кавер-купэу «Monte Carlo show», Дзыбэ Мыхьамэт ыкIи нэмыкIхэм къаIогъэ орэдхэм. Пчыхьэзэхахьэм икIэух Мыекъуапэ ипчэгу шъхьаIэ мэфэкI мэшIоустхъо щыдафыягъ.
АР-м и ЛIышъхьэ
ипресс-къулыкъу къытыгъэ
къэбархэмкIэ ЛIышэ Саныет.