Зыныбжь хэкIотагъэхэмрэ сэкъатныгъэ зиIэхэмрэ зыщаIыгъхэрэ республикэ унэ-интернатым «ГъэшIэ кIыхьэр ыкIи чаныр» зыфиIорэ отделениер къыщызэIуахыгъ. Къатищ хъурэ унэр урамэу Депутатскэм тет.

Ащ икъызэIухын хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, Мыекъуапэ имэрэу Геннадий Митрофановыр, АР-м иминистрэхэм я Кабинет хэтхэр, республикэ парламентым идепутатхэр.

Лъэпкъ проектэу «Демографием» къыдыхэлъытэгъэ федеральнэ проектэу «Тинахьыжъхэр» зыфиIорэм диштэу сомэ миллиард 1,3-м ехъу зытефэгъэ социальнэ псэолъакIэр агъэпсыгъ. Урысыем IофшIэнымрэ социальнэ ухъумэнымрэкIэ и Министерствэ ащкIэ республикэм IэпыIэгъушхо къыритыгъ. Квадрат метрэ мин 21-м ехъу унэм зэлъеубыты. Подрядчикыр компаниеу «Марк-Сервис».
Республикэм и ЛIышъхьэ шъхьафэу къызэрэхигъэщыгъэмкIэ, социальнэ проектхэр зэкIэ Урысыем и Президентэу Владимир Путиным къыгъэнэфэгъэ пшъэрылъхэм аблэмыкIхэу республикэм щагъэцакIэх.
«ГъэшIэ кIыхьэр ыкIи чаныр» зыфиIорэ отделениер къызэрэзэIуахыгъэр респуб­ликэмкIэ мэхьанэшхо зиIэ социальнэ проектышхоу щыт. Медикэ-социальнэ IэпыIэгъу зищыкIэгъэ тинэжъ-Iужъхэм щыIэкIэ амал дэгъухэр ядгъэгъотынхэ фае. Мы социальнэ учреждениер ащ щыпсэухэрэм яунэ шъыпкъэ хъунэу, ренэу шIур, гукIэгъур, шIулъэгъур, гуфэбэныгъэр игъогогъунэу фэтэIо», — къыIуагъ КъумпIыл Мурат.
Адыгеим и ЛIышъхьэ сэкъатныгъэ зиIэхэм, нэжъ-Iужъхэм ащыщхэм, учреждением Iоф щызышIэхэрэм адэгущы­Iагъ. УнэчIэхьажьымкIэ пстэуми афэгушIуи, республикэм ипащэ къызэрэхигъэщыгъэм­кIэ, унэ-интернатым щаIыгъхэм ящыIэ­кIэ-псэукIэ зыфэдэщтыр бэкIэ зэлъытыгъэхэр мы отделением ипащэхэмрэ иIофышIэхэмрэ ары.
Нэжъ-Iужъхэмрэ сэкъатныгъэ зиIэ­хэмрэ атегъэпсыхьэгъэ республикэ унэ-интернатым ипащэ ипшъэрылъхэр зыгъэцакIэу КIыкI Адам республикэм и ЛIышъхьи, ащ игъусагъэхэми социальнэ псэуалъэм амалэу иIэхэм афэгъэхьыгъэу къафиIотагъ.

Ар блокиплIэу зэхэт, щыр укъызыдекIокIын фэе нэбгырэ 250-рэ щыIыгъы­гъэным фытегъэпсыхьагъ. ЯплIэнэрэм фэIо-фэшIэ зэфэшъхьафхэр щагъэцакIэх. Ащ нэмыкIэу сэкъатныгъэ зиIэхэу курэжъыехэм арыс нэбгырэ 23-мэ яунэхэр ащ хэтых. Джыдэдэм нэбгырэ 240-м ехъу ащ щэпсэу.
Унэ-интернатым чIэсхэм зэрищыкIагъэм тетэу къадекIокIых, щяIазэх, социальнэ, культурнэ, медицинэ фэIо-фашIэхэр щафагъэцакIэх.
ОтделениякIэм актовэ залыр, медицинэ, къулыкъушIэ кабинетхэр, пщэрыхьапIэр, шхапIэр, парикмахерскэр, зыгъэ­псэфыпIэ чIыпIэхэр, мастерскоир, кафер, спортзалхэр ыкIи нэмыкIхэр хэтых. Джащ фэдэу сэкъатныгъэ зиIэхэм япсауныгъэ зыщызэтырагъэуцожьырэ чIыпIэхэри ащ иIэх.
Щагур дахэу зэтырагъэпсыхьагъ, пхъэшъхьэ-мышъхьэ чъыгхэр щагъэтIыс­хьагъэх, спорт джэгупIэ, псыутх, тетIысхьапIэхэр дэтых, зызщагъэпсэфырэ чIыпIэхэри иIэх. Ар гуIэтыпIэу, джырэ шапхъэхэм адиштэу щыт.
Iофтхьабзэм икIэух КъумпIыл Мурат, Сергей Дрокиным ыкIи Цэй Эдуард учреждением ищагу лэнчъэ чъыг щагъэ­тIысхьагъ.
АР-м и ЛIышъхьэ ипресс-къулыкъу къытырэ
къэбархэмкIэ ЛIышэ Саныет.