Теннис цIыкIумкIэ Адыгэ Республикэм изэIухыгъэ зэнэкъокъухэр Мыекъуапэ щэкIох. Мы спорт лъэпкъымкIэ Федерацием ипрограммэу «Урысыем инеущрэ маф» зыфиIорэм ар къыдыхэлъытагъ.

Къэралыгъом и Къыблэ ишъо­лъыри 10-мэ къарыкIыгъэ спорт­сменхэм заушэты. Зыныбжь илъэс 12-м емыхъугъэ кIалэхэм ыкIи пшъашъэхэм язэнэкъокъу медальхэр къащызыхьыгъэхэр къэнэфагъэх. Ставрополь краим илIыкIохэу Алия Канаматовамрэ Максим Третьяковымрэ текIоныгъэр къыдахыгъ. Адыгеим испорт­сменхэу Адам Матюшинымрэ Ирина Славновамрэ я 5-рэ ыкIи я 6-рэ чIыпIэхэр къафагъэшъошагъэх.
Зыныбжь илъэс 14-м емыхъугъэхэм якуп анахь щылъэшхэр непэ къэнэфэщтых. Тиспортсменхэу Артем Вариводиныр, Бзаго Дамир, Адам Матюшиныр, Кирилл Панькиныр, Эльдар Матюшиныр ыкIи Ирина Славновар медальхэм афэбэнэщтых.
Джащ фэдэу 2008 — 2017-рэ илъэсхэм къэхъугъэхэм заушэ­тыщт. Илъэс 18-м нэс зыныбжьхэм яунэе зэнэкъокъухэмкIэ турнирыр зэфашIыжьыщт.