НыбжьыкIэгъур лъэхъэнэ анахь чэфыгъохэм ащыщ. Непэрэ мафэм ехъулIэу Адыгеим илъэс 14-м къыщегъэжьагъэу 35-м нэс зыныбжьэу нэбгырэ мини 135-рэ щэпсэу.

НыбжьыкIэхэм хэхъоныгъэ ашIыным пае амалхэр ягъэ­гъотыгъэнхэмкIэ республикэм Iофыгъуабэ щызэшIуахы. Ахэм афэгъэхьыгъэу мы мафэхэм гущыIэгъу тыфэхъугъ АР-м ныбжьыкIэ IофхэмкIэ и Комитет ипащэу Максим Галушкиным.
Комитетыр 2023-рэ илъэсым жъоныгъокIэ мазэм икIэрыкIэу къызэIуахыжьыгъ, апэрэ лъэ­бэкъухэр мыпсынкIагъэхэми, илъэситIум къыкIоцI къэгъэлъэгъон дэгъухэр щыIэ зэрэхъу­гъэхэр тигущыIэгъу къыхигъэщыгъ. НыбжьыкIэ политикэм хэхъоныгъэхэр ышIынхэмкIэ пшъэрылъ шъхьаIэу иIэр шъо­лъырым иобщественнэ, испортивнэ, итворческэ щыIакIэ зыныбжь имыкъугъэхэр хэщэгъэнхэр ары.
— АР-м и ЛIышъхьэу КъумпIыл Мурат ынаIэ къызэрэттетым ишIуагъэкIэ ныбжьыкIэхэм ящыкIагъэр ядгъэгъотын амал тиI, — еIо М. Галушкиным. — 2023-рэ илъэсым Урысые зэнэ­къокъоу зэхащагъэм респуб­ликэм ипроект текIоныгъэ къызэрэщыдихыгъэм ишIуагъэкIэ «Шъолъырыр ныбжьыкIэхэм апай» зыфиIорэ программэр гъэцэкIагъэ хъугъэ. Федеральнэ бюджетым къыхэхыгъэ сомэ миллион 80 фэдиз зэрифэ­шъуашэу дгъэфедагъэ. Лъэныкъо зэфэшъхьафхэм афэгъэзэгъэ шъолъыр ныбжьыкIэ Гупчэу «Адыгеим иныбжьыкIэхэр» зыфиIорэр тиIэ хъугъэ. КъатитIоу зэтет псэуалъэм гъэцэкIэжьынхэр щыкIуагъэх, ищыкIэгъэ Iэмэ-­псымэхэр чIэтых, Iофтхьэбзэ зэ­­фэшъхьафхэр щызэхэпщэнхэм фытегъэпсыхьагъ. НыбжьыкIэхэм япхыгъэ IофшIэн шъхьаIэр зыгъэцакIэрэр мы Гупчэр ары. Ащ нэмыкIэу ныбжьыкIэхэм я Урысые отряд, «Движение первых» зыфиIорэр къытэпхыгъэх. 2023-рэ илъэсым къыщегъэжьагъэу медицинэм, ТекIоныгъэм иволонтерхэр, Адыгеим истудентхэм яассоциацие, организациеу «Твой ход» зыфиIорэр кIэу къы­зэIуахыгъэх, зэкIэми япшъэрылъхэр зэрифэшъуашэу агъэцакIэ, ныбжьыкIэ чанхэр ахэтых. Ахэм ягухэлъышIухэр щыIэныгъэм щыпхырытщынхэр, IэпыIэгъу та­фэхъуныр ары пшъэрылъ шъхьа­Iэу тиIэр.

Комитетым ипащэ къызэри­IуагъэмкIэ, 2024-рэ илъэсым рес­публикэм ис ныбжьыкIэ мин 43-рэ зыхэлэжьэгъэ Iофтхьабзэ­хэр рагъэкIокIыгъэх. Ахэм пат­риотическэ, общественнэ, куль­турнэ, творческэ, спортивнэ ыкIи шIушIэ мэхьанэ яIагъ.
Iофтхьэбзэ инэу Комитетым ипащэ зигугъу къышIыгъэхэм ащыщ шъолъыр форумэу «Адыге­им иныбжьыкIэхэр» зыфиIорэр. Республикэм икъалэхэм ыкIи ирайонхэм къарыкIыгъэ ныбгырэ 600 фэдиз ащ хэлэжьагъ. Мы илъэсыр Хэгъэгум иухъумакIо и Илъэсэу зэрагъэнэфагъэм къыдыхэлъытагъэу пат­риотическэ Iофтхьабзэхэр бэу зэхащагъэх. Ахэм ащыщ Хэ­гъэгу зэошхор къызежьэгъэ мафэм фэгъэхьыгъэ «ШIэжьым ишэф остыгъ» зыфиIорэр, нэбгырэ 300 фэдиз ащ хэлэжьагъ. Мыгъэ зэ­хащагъэхэм ащыщ «Молодежка 2.0» зыфиIорэр, гъэсэныгъэ учреждение зэфэшъхьафхэм ялIыкIохэр аугъоихи, мэфищэ Iоф адашIагъ, яшIэныгъэхэмкIэ зэхъожьыгъэх.
Мы илъэсыр пштэмэ, пшъэ­рылъ шъхьаIэу яIэр сэнаущыгъэ зыхэлъ ныбжьыкIэ чанхэр зыхэ­лэжьэхэрэ Iофтхьабзэу «Фыщт» зыфиIорэм изэхэщэн. Ар шы­шъхьэIум аублэщт. Адыгеим, Краснодар краим, Къэбэртэе-­Бэлъкъарым, Къэрэщэе-Щэр­джэсым, Къалмыкъым, Херсон хэкум, Абхъазым, Белоруссием яныбжьыкIэхэр мыщ щызэIукIэщтых. ЗэкIэмкIи нэбгырэ 500 фэдиз хэлэжьэнэу агъэнафэ.

— Адыгеим иныбжьыкIэхэр чаных, ахэм тигъунэгъу къэлэ инхэм замыгъэзэным пае ящыкIагъэр ягъэгъотыгъэным тыпылъ, ныбжьыкIэ политикэм хэщагъэ хъунхэм, гухэлъышIоу яIэхэр щыIэныгъэм щыпхыращынхэм афэшI IэпыIэгъу та­фэхъу. Президент программэу «Шъолъырыр ныбжьыкIэхэм апай» зыфиIорэм республикэр мы илъэсым хэлажьи, къэбар гушIуагъо къыIукIагъ. Федеральнэ ахъщэу мы мафэхэм сомэ миллион 81,3-рэ къытфатIуп­щыщт. Ащ ишIуагъэкIэ республи­кэм имуниципальнэ образованиехэм ныбжьыкIэ гупчэхэр къащызэIутхыщтых. Шъыпкъэ, физкультурэ-псауныгъэр зыщагъэпытэрэ гупчэхэр, культурэм иунэхэр ахэм зэкI пIоми хъунэу адэтых, ау спортымкIэ, творчествэмкIэ сэнаущыгъэ зыхэмылъхэми зыдэкIонхэ чIыпIэ яIэн фае. Ахэр ягухэлъышIухэмкIэ зэхъожьыщтых, лъэныкъуакIэхэм зафагъэзэн алъэкIыщт.
Джащ фэдэу Мыекъопэ районым итыгъэ лагерэу «Зэкъошныгъ» зыфиIоIрэр зычIэтыгъэ псэуалъэр Комитетым къыратыжьыгъ. Мы чIыпIэр зызэтырагъэпсыхьажькIэ, ныбжьыкIэхэр ащ мэфэ заулэрэ щыIэнхэ алъэкIыщт, нэбгырэ 250-рэ фэдиз чIэфэщт. Лекциехэр, Iоф­тхьэбзэ зэфэшъхьафхэр зыщыкIощт, зызыщагъэпсэфын алъэ­кIыщт чIыпIэу хъущт.
Республикэм иныбжьыкIэхэм проект зэфэшъхьафхэр агъэхьазырых, Президент грантхэм ахэлажьэх. ТиныбжьыкIэхэм ИТ лъэныкъомкIэ, творчествэмкIэ, спорт проектхэмкIэ яшIэныгъэ­хэр къагъэлъагъох, Урысые зэ­нэкъокъухэм текIоныгъэхэр къащыдахых. Урысые студент отрядхэм ялIыкIоу Ольга Борсук бэмышIэу грант къырихыгъэу хэушъхьафыкIыгъэ дзэ операцием хэлажьэхэрэм апае щыгъынхэр зыщадырэ цех къызэ­Iуихыгъ. ГухэлъышIу зиIэхэм ягъогу непэ зэIухыгъ.
НыбжьыкIэхэм ямэфэкI рес­публикэм зэрифэшъуашэу зэ­рэщыкIощтыр тигущыIэгъу къы­Iуагъ. Площадкэ зэфэшъхьафхэр яIэщтых, мастер-классхэр, спорт зэнэкъокъухэр зэхащэщтых. НыбжьыкIэхэм ащыщэу анахь дэгъоу зыкъэзыгъэлъэ­гъуагъэм «Айфон 16 про» зыфиIорэр къыхьын амал иIэщт. Нэужым республикэм иорыдыIохэм, икъэшъокIо купхэм концерт къатыщт. НыбжьыкIэ пстэуми агу рихьырэ орэдыIоу АNDRО къырагъэблэгъагъ.
ДЕЛЭКЪО Анет.