АР-м и Лъэпкъ тхылъеджапIэ имэфэкI ипэгъокIэу «Тхылъ­еджапIэр. Уахътэр. Тэры» зыфи­Iорэ зэхахьэр ащ щыкIуагъ. Тарихъ мэхьанэ зиIэ тхылъхэр, сурэтхэр, тхыгъэ зэфэшъхьаф­хэр къэгъэлъэгъоным хэхьагъэх.

ЛъэхъаныкIэ пэпчъ дэкIэжьырэ ­Лъэпкъ тхылъеджапIэм гъогу гъэшIэгъонэу къы­кIугъэм, итарихъ нэкIубгъо щыщ пычыгъохэм зэхахьэм хэлэжьагъэхэр атегущыIагъэх.
Лъэпкъ тхылъеджапIэм ипащэ игуа­дзэу Пэнэшъу Фатимэ мэфэкI шIыкIэм тетэу Iофтхьабзэр къызэIуихыгъ.
ТхылъеджапIэм ифонд тхыль мин 560-м ехъу чIэлъ, ащ щыщэу мин 50-м шIокIырэр лъэпкъ фондым иIахь.
— Краеведениемрэ лъэпкъ литературэмрэ яотдел ифонд баеу ыкIи гъэшIэгъонэу гъэпсыгъэ. Тиотдел чIэлъ тхылъхэр интернетым ибгъотэщтхэп, арышъ, цIыфыбэ къытфэкIо, тхылъхэм къакIэупчIэх. ТхылъеджапIэр щыIэкIакIэм дэлъэбакъо, Iофтхьэбзэ гъэшIэгъонхэр зэхещэх. Тхылъыр зышIогъэшIэгъонхэр зэфещэх, — къыIуагъ АР-м и Лъэпкъ тхылъеджапIэ краеведениемкIэ ыкIи лъэпкъ литературэмкIэ иотдел ипащэу ГъукIэлI Фатимэ.
Илъэс зэфэшъхьафхэм тхылъеджапIэм иIофшIэн къизыIотыкIырэ къэгъэлъэгъоным хэхьэгъэ тхыгъэхэм, сурэтхэм, тхылъхэм афэгъэхьыгъэу къэгущыIагъ тхылъеджапIэм икъэбарлъыгъэ­Iэс библиографическэ отдел ипащэу Юлия Сосковар.
Тарихъ шIэныгъэхэмкIэ докторэу, гуманитар ушэтынхэмкIэ Адыгэ респуб­ликэ институтым тарихъымкIэ иотдел ипащэу, общественнэ организациеу «ШIэныгъэм» итхьаматэу Ацумыжъ Каз­бек, КъокIыпIэм щыпсэурэ лъэпкъхэм яискусствэкIэ Къэралыгъо музеим ­икъутамэ ипащэу ШъэуапцIэкъо Аминэт, АР-м культурэмкIэ и Министерствэ иотдел ипащэу Теуцожь Нуриет, АР-м культурэмкIэ изаслу­женнэ IофышIэу, хъарзынэщым испециалист шъхьаIэу Къэзэнэ МулиIэт, краевед цIэрыIоу Николай Ложкиныр ыкIи нэмыкIхэри Iофтхьабзэм къыщыгущы­Iагъэх. АР-м итхылъеджапIэхэм ялIыкIохэр, шIэны­гъэлэжьхэр, студентхэр, тхылъеджэныр зикIасэхэр зэхахьэм хэлэжьагъэх.
«ТхылъеджапIэр. Уахътэр. Тэры» зы­фиIорэ къэгъэлъэгъоным илъэсым ыкIэм нэс Iоф ышIэщт.

Лъэпшъыкъо Фатим.