ХэушъхьафыкIыгъэ дзэ операцием иветеранхэм апэрэу автомобильхэр Адыгеим щаратыгъэх.

IэкIэ агъэIорышIэрэ унэгъо автомобильхэу «SWM» зыфаIоу Калининград къыщашIыгъэхэм яIункIыбзэхэр сэкъатныгъэ зиIэхэу курэжъыехэм арыс ветеранхэу Андрей Косолаповымрэ Вячеслав Каплинымрэ аратыжьыгъэх.
Ащ фэгъэхьыгъэ Iофтхьабзэу къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ тыгъуасэ щыкIуагъэм хэлэжьагъ АР-м иминистрэхэм я Кабинет и Тхьаматэ игуадзэу — финансхэмкIэ министрэу Виктор Орловыр.
Пэублэ псалъэкIэ Iофтхьабзэр къызэIуихыгъ ыкIи зэрищагъ шъолъыр фондым ипащэ игуадзэу Джарымэ Еленэ. Ащ къызэрэхигъэщыгъэмкIэ, УФ-м зыкъэухъумэжьынымкIэ иминистрэ игуа­дзэу, къэралыгъо фондэу «Хэгъэгум иухъумакIохэм» итхьаматэу Анна Цивилевам игукъэкIэу хэушъхьафыкIыгъэ дзэ операцием иветеранхэм автомобильхэр къафэщэфыгъэнхэм Президентэу Владимир Путиным къыдыригъэштагъ. Джащ тетэу АР-м и ЛIышъхьэу КъумпIыл Мурат иунашъокIэ хэушъхьафыкIыгъэ адаптивнэ автомобилитIур шъолъыр фондым къыщэфыгъэх. ДзэкIолIхэм анаIэ зэратетым, зэрафэгумэкIыхэрэм, IэпыIэгъу зэрафэ­хъухэрэм ар ишыхьат хъугъэ.
— Непэ Адыгэ Республикэм хэушъхьафыкIыгъэ дзэ операцием хэлажьэ­хэрэм IэпыIэгъу афэхъугъэнымкIэ шIуагъэ къэзытырэ IофшIэкIэ гъэнэфагъэ щызэхэщагъ. Адыгеим и ЛIышъхьэ, Къэ­ралыгъо Советым — Хасэм идепутатхэр, министрэхэм я Кабинет, партиеу «Единэ Россием» ишъолъыр организацие, предпринимательхэм ыкIи зэкIэ республикэм щыпсэухэрэм аIэ зэкIэдзагъэу шIушIэ IэпыIэгъур зэпымыоу афарагъащэ. АщкIэ тидзэкIолIхэм тызэракъотым, тызэрафэгумэкIырэм агу къыдещае, — хигъэунэфыкIыгъ Виктор Орловым.
Джащ фэдэу ащ къызэрэхигъэщыгъэм­кIэ, дзэ операцием хэлэжьагъэхэм ыкIи ахэм яунагъохэм арысхэм шъолъыр фондыр лъэныкъо зэфэшъхьафхэмкIэ IэпыIэгъу афэхъу. ФинансхэмкIэ министрэр ветеранхэм зафигъазэзэ, мамыр щыIакIэм зыкъыхагъотэнымкIэ автомобильхэр къызэрафэфедэщтхэр, язекIонкIэ Iэрыфэгъу зэрэхъущтхэр къыIуагъ.
Къэзэрэугъоигъэхэм закъыфигъэзагъ къэралыгъо фондэу «Хэгъум иухъума­кIохэр» зыфиIорэм ишъолъыр къутамэ ипащэу ПIатыкъо Аслъан. Анна Цивилевам, ежь ышъхьэкIэ, шъолъыр фондым иIофышIэхэм ацIэкIэ ащ шIуфэс къари­хыгъ.
— АвтомобилыкIэхэр тиветеранхэм яIэ зэрэхъугъэмкIэ сигуапэу сафэгушIо. Джы ахэр Iэрыфэгъоу, къин амылъэгъоу зекIонхэмкIэ ар амалышIу зэрэхъущтым сицыхьэ телъ. ЗэкIэ Iофтхьабзэу фондым зэрихьэрэр хэушъхьафыкIыгъэ дзэ операцием иветеранхэм лъытэныгъэ зэрафэтшIырэм, тызэрафэгумэкIырэм къыпкъы­рэкIых, — хигъэунэфыкIыгъ ПIатIыкъо Аслъан.
Зэмыблэжьхэу Хэгъэгум ищынэгъончъагъэ къызэраухъумагъэмкIэ, къэралыгъор чIыпIэ зэжъу зефэм зэрэкъоуцуагъэхэмкIэ, лIыхъужъ зекIуакIэу зэрахьагъэхэмкIэ ветеранхэм зэрафэразэхэр Виктор Орловми, ПIатIыкъо Аслъани къаIуагъ.
Андрей Косолаповыр зэзэгъыныгъэкIэ дзэ къулыкъур къалэу Камышин 2009-рэ илъэсым щыригъэжьагъ, нэужым Мые­къуа­пэ щылъигъэкIотагъ. ХэушъхьафыкIыгъэ дзэ операцием огнеметчикэу хэлажьэзэ, 2022-рэ илъэсым гъэтхапэм щэрыоным хафи, уIэгъэ хьылъэхэр теща­гъэхэ хъугъэ. Я 2-рэ купым хэхьэрэ сэкъатныгъэ къыратыгъ. ЛIыгъэу ыкIи псэемыблэжьныгъэу зэрихьагъэхэм апае медалэу «За отвагу» зыфиIорэр къыфагъэшъошагъ.
— ИкIыгъэ илъэсым ищылэ мазэ къы­щегъэжьагъэу шъолъыр фондым ынаIэ къыстет. Бэ ишIуагъэу къысигъэ­кIыгъэр: щыIэныгъэм сызэрэхэгъозэ­жьыщт пкъыгъо­хэр ыкIи ортопедическэ лъэкъопылъхьэ къысатынхэмкIэ зэкIэ тхьапэхэр сфигъэ­псыгъэх, диспансеризациер сагъэкIугъ, джы сыщызекIошъуным сызщыпсэурэ унэр тырагъэпсыхьэ. Къысатыгъэ автомобилыр зесфэшъуным пае шъолъыр ДОСААФ-м сагъакIуи сырагъэджэжьыгъ. Лъэшэу сигуап ар сиунагъокIи амалышIу зэрэтфэхъущтыр. Сыда пIомэ социальнэ таксим бэрэ сежэн фаеу хъущтыгъ, ащ унагъор рызепщэнэу щытэп. Пчэдыжьырэ кIэлэцIыкIуитIур IыгъыпIэм ыщэнхэмкIэ сишъхьэ­гъусэ къин хэтыгъ. Джы а зэпстэури дэгъэзыжьыгъэ хъущт. Лъэшэу хэбзэ къулыкъухэм сафэраз, — къы­Iуагъ Ан­дрей Косолаповым.
Вячеслав Каплиныр зэзэгъыныгъэм кIатхи, 2023-рэ илъэсым ищылэ мазэ хэушъхьафыкIыгъэ дзэ операцием кIогъа­гъэ. Мотострелковэ батальоным хэтэу гъэтхапэм къауIагъ. А илъэсым къыщегъэжьагъэу фондэу «Хэгъэгум иухъума­кIохэм» иIэпыIэгъу ветераным IокIэ. Курэжъые рагъэгъотыгъ, иунашъхьэ фы­зэблахъугъ, иунэ щызекIошъуным фытырагъэпсыхьагъ. ИкIалэу Даниил илъэс къэс зыгъэпсэфыпIэхэм ащыщ агъакIо.
— Фондми, автомобилыр къытатыным зиIахьышIу хэлъ пстэуми «тхьа­шъуегъэп­сэу» ясэIо. СикIалэхэр еджапIэм, гъэсэныгъэ тедзэ зыщызэрагъэгъотырэ чIыпIэхэм джы сызщыфаем сщэнхэ слъэ­кIыщт. Сэри IэзапIэм сыкIоныр джы Iэрыфэгъу хъугъэ, — еIо ветераным.

Iэшъынэ Сусан.