Президент грантхэмкIэ 2025-рэ илъэсым ятIонэрэ зэнэкъокъоу зэхащэгъагъэм икIэух­хэр зэфахьысыжьыгъэх. Адыгеим ипроекти 6-мэ а зэнэкъокъум текIоныгъэр къыщыдахыгъ.

Сомэ миллиони 10,4-рэ фэдиз гукъэ­кIыкIэхэм язэшIохын пэIуагъэ­хьащт, ащ щыщэу сомэ миллиони 6,4-р президент грантхэмкIэ Фондым къари­тыщт. ТекIоныгъэр къыдэзыхыгъэхэм ахэхьагъэх анахь зищыкIэгъэ цIыфхэм Iэпы­Iэгъу ятыгъэным, гъэсэныгъэ тедзэмкIэ пэIудзыгъэ шIыкIэм тетэу Iоф зы­шIэщт технологиехэр къыхэхыгъэнхэм, зекIоным зегъэу­шъомбгъугъэным, кIэлэцIыкIухэр къэу­хъумэгъэнхэм, зипсауныгъэ пыч фэхъугъэ цIыфхэу сэнаущыгъэ зыхэлъ­хэр къыхэгъэщыгъэнхэм епхыгъэ проектхэр.
Мы аужырэ илъэсхэм мысатыу организациехэм IэпыIэгъу ятыгъэнымкIэ ахъщэу Адыгеим къыщыхагъэкIырэр нахьыбэ хъугъэ. ГущыIэм пае, 2024-рэ илъэсым социальнэ инициативэхэм апэIухьанэу сомэ миллион 44-м ехъу республикэм къыщыха­гъэкIыгъагъ, грант зэратыгъэхэр мы­сатыу организацие 37-рэ. 2025-рэ илъэсым грантхэр нахьыбэ хъугъэх ыкIи сомэ миллион 54,4-м нэсыгъэх.
«Социальнэ Iофтхьабзэхэм афытегъэпсыхьэгъэ мысатыу организациехэм Iофэу ашIэрэр щысэшIу мэхъу цIыф чанхэм нахьышIум ылъэныкъокIэ дунаир зэрахъокIын зэралъэкIыщтымкIэ. Общественнэ гукъэкIыкIэхэм IэпыIэгъу ятыгъэныр тинеущрэ мафэ нахьышIу шIыгъэным изы Iахьышхоу зэрэхъущтым сицыхьэ телъ!» — къащитхыгъ Адыгеим и ЛIышъхьэу КъумпIыл Мурат исоциальнэ нэкIубгъохэм.