Гъэсэныгъэм иорганизациехэм къащызэIуахыгъэ гъэмэфэ лагерьхэм пшъэрылъ шъхьаIэу яIэр кIэлэеджакIохэм языгъэпсэфыгъо уахътэ гъэшIэгъонэу, шIуагъэ къытэу зэхэщэгъэныр ары.

Ащ къыдыхэлъытэгъэ джэгукIэу «Спортым ныбджэгъуныгъэ ды­уиIэн – уипсауныгъэ къэуухъумэн!» зыфиIорэр Мыекъуапэ игупчэу «Зэкъошныгъэм» щырагъэкIокIыгъ. Республикэм икъэлэ шъхьаIэ гъэсэныгъэмкIэ и Комитет ащ кIэщакIо фэхъугъ.
Спорт Iофтхьабзэм командэ 14 хэлэжьагъ. КIэлэеджакIохэм япсауныгъэ агъэпытагъ, яфизическэ ухьазырыныгъэ аушэтыгъ, лъэныкъо зэфэшъхьафхэмкIэ зэнэкъокъугъэх. Джащ фэдэу физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэр агъэцэкIэнхэм акIуачIэ рахьылIагъ. Ащ дакIоу командэхэм очкохэр къахьыщтыгъ. Зэфэхьысыжьхэм къызэрагъэлъэгъуагъэмкIэ, ящэнэрэ чIыпIэр зэдагощыгъ гурыт еджапIэу N 7-м ыкIи лицееу N 8-м ялIыкIохэм. ЯтIонэрэ хъугъэ гурыт еджапIэу N 3-р. ТекIоныгъэр къыдахыгъ гурыт еджапIэу N 11-м икIэлэеджакIохэм.