Республикэм иеджапIэхэм къащызэIуахыгъэ гъэмэфэ зыгъэпсэфыпIэхэм яIофшIэн ижъотыпI. Кощхьэблэ районым ит къуаджэу Блащэпсынэ дэт гурыт еджапIэу Къош Алый ыцIэ зыхьырэм щызэхащэгъэ лагерым мы мафэхэм тыщыIагъ.

ЕджапIэм ипащэу Мэкъул Марьят иIофшIэгъухэр игъусэхэу нэгушIоу къытпэгъокIыгъ. НыбжьыкIэхэм лъэныкъо зэфэшъхьафхэмкIэ сэнаущыгъэу ахэ­лъыр къызщагъэлъэгъогъэ Iофтхьабзэу «Жъо­гъожъыехэр» зыфиIорэм тытефагъ. Артист шъыпкъэм афэдэхэу лагерым зыщызыгъэпсэфырэ кIэлэеджакIохэм зыкъагъэлъэгъуагъ, орэдхэр къаIуагъэх, къэшъо зэфэшъхьафхэр къашIыгъэх, усэхэм къяджагъэх. Нэужым адыгэ джэгу зэхащагъ.
— Мыгъэ нэбгыри 100 фэдизмэ тилагерь зыщагъэпсэфы ыкIи япсауныгъэ щагъэпытэ. Ыпэрэ илъэсхэм ялъытыгъэ­мэ ар нахьыб, районымкIэ гъэцэкIэ­жьынхэр зыщыкIорэ еджапIэ­хэм ачIэсхэм ащыщхэри къытфащэх. ЫпэрапшIэу унэгъо Iужъухэм ыкIи гъот макIэ зиIэ унагъохэм къарыкIыгъэхэр, хэушъхьафыкIыгъэ дзэ опера­цием хэлажьэхэрэм ясабыйхэр ары къыхэтхыхэрэр, чIыпIэ къызынэкIэ, нэмыкIхэри къетэгъэ­бла­гъэх. Илъэси 7-м къыщегъэ­жьагъэу 16-м нэс зыныбжьхэр ары къекIуалIэхэрэр. Ахэр купиплIэу зэтеуты­гъэх, ахэм нэбгырэ 25-рэ зырыз арыс. Пэублэ
классхэмкIэ кIэлэегъаджэхэм апшъэрэ классхэм арыс кIэлэ­еджакIохэр яIэпыIэгъухэу нахь цIыкIухэр агъэчэфых. Джащ фэдэу физкультурэмкIэ кIэлэ­егъаджэм мафэ къэс Iоф адешIэ. Лагерым къекIуалIэ­хэрэм яуахътэ гъэшIэгъонэу зэрагъэкIощтым, агу къызэринэ­жьыщтым нэбгырэ пэпчъ ыуж ит, — еIо еджапIэм ипащэ.

Гъэмэфэ зыгъэпсэфыгъор кIэлэцIыкIухэм къафэмыгъэсыжьэу ежэх. Мыщ къакIохэрэр зыми фэмыгъэзагъэхэу, зэщхэу зы такъикъи къыхэкIырэп. Мафэ къэс ашIэщтыр гъэнэфэгъахэу, зы мафэм адрэр текIэу Iофтхьабзэхэр зэхащэх. Зэрагъэчэфыщтхэм дакIоу, пIуныгъэ-гъэ­сэныгъэ мэхьанэ зиIэ Iофтхьабзэхэр зэрэзэхащэщтхэм мафэ къэс вожатэхэр ыуж итых. Япсауныгъэ псыхьэгъэным фэшI спорт зэнэкъокъухэр афызэхащэх.
— ТикIэлэцIыкIухэр гушIохэу, чэф макъэ ахэIукIы зыхъукIэ, гухахъо хэтэгъуатэ, джыри нахь гъэшIэгъон горэ афызэхэтщэным тыфещэ. Тилагерь «Тыгъэ» фэтыусыгъэр, ащ епхыгъэу фэбагъэ азыфагу илъэу, ныбджэ­гъуныгъэр агъэлъапIэу кIэлэ­еджакIохэм ямафэ агъакIо. ГушIо­хэзэ пчэдыжьым къэкIох. Мафэ къэс пчэдыжьым сыхьатыр 8.30-м IофшIэныр тэублэ, зарядкэкIэ етэгъажьэ, пчэды­жьышхэм ыуж Iофтхьабзэхэм язэхэщэн тыфежьэ. Куп пэпчъ класс епхыгъэу сурэтхэр щашIых, пластилиным Iоф дашIэ. КIэлэ­еджакIохэр зэнэкъо­къух, сэнаущыгъэу ахэлъыр къагъэлъагъо. Гощыгъэхэу къоджэ тхылъеджапIэм макIох, усэхэм къяджэх. БэмышIэу зэхэтщэгъэ «Пшысэм тырихьакI» зыфиIо­рэр ашIогъэшIэгъоныгъ, — еIо лагерым ипащэу Пэшъэ Ларисэ.
Шапхъэхэм адиштэу лагерым щагъа­шхэх, хэтэрыкIхэр, пхъэшъхьэ-мышъхьэ­хэр ренэу яIанэ тетых.
Зы мэфэкI бламыгъэкIэу Iофтхьэбзэ гъэшIэгъонхэр зэхащэнхэм пылъых. Мэфэ реным орэдхэр къаIох, сурэтшIынымкIэ зэнэкъокъух, къэшъох, пкъыгъо зэфэшъхьафхэр ашIых. НахьыбэмкIэ щагум щэджэгух, футболымкIэ, волейболымкIэ, пионерболымкIэ зэнэкъокъух. АщкIэ спорт площадкэ дэгъухэр яI.
Организацие зэфэшъхьафхэм зэзэгъы­ныгъэхэр адашIыгъэу ахэм ялIыкIохэр ныбжьыкIэхэм гущыIэгъу къафэхъух. Полицием иIофышIэхэм гъогурыкIоным ишапхъэхэр арагъашIэх, ащкIэ джэгукIэ шIыкIэ зэфэшъхьафхэр агъэфедэх. Джащ фэдэу цIыфым апэрэ медицинэ IэпыIэгъур зэребгъэкIыщтыр дэгъоу зэрагъэшIагъ. БзэджэшIагъэ зезыхьэхэрэм пшъэ­дэкIыжьэу арагъэхьырэр, наркоманием, экстремизмэм, терроризмэм зэрарэу къахьырэр къафаIуатэ.
— КIэлэцIыкIухэр едгъаджэхэ зыхъукIэ пшъэдэкIыжьэу тхьырэм нахь макIэп непи тиIэр. Ау джы тиIофшIэн зэблэтхъугъэу, чэф макъэр тиеджапIэ чIэIу­кIэу, зы унагъо фэдэу Iофтхьабзэхэр мафэ къэс зэхэтэщэх. Языгъэпсэфыгъо уахътэ агу къинэ­жьыным тишъыпкъэу тыдэлажьэ, — еIо лагерым ипащэ.
Патриотическэ пIуныгъэм гурыт еджа­пIэм лъэшэу ынаIэ тет. Хэгъэгу зэошхор къызщежьэгъэ мафэм фэгъэхьыгъэ Iоф­тхьабзэ зэхащагъ. Ащ ехьылIэгъэ къэбархэр къафаIотагъэх, ЛIыхъужъхэр джыри зэ агу къагъэкIыжьыгъэх. Мы мафэм фэгъэхьыгъэ зэнэкъокъоу районым щызэхащагъэм лагерым щыIэ ныбжьыкIэхэр хэлэжьагъэх, зэрифэшъуа­шэу зыкъагъэлъэгъуагъ.
Лагерым зыщызгъэпсэфырэ ныбжьыкIэхэм ащыщхэм гущыIэгъу тафэхъугъ.
— Тиуахътэ гъэшIэгъонэу тэгъа­кIо, тикIэлэегъаджэхэм тагъэчэфэу къызэрэтхэтхэр сыгу рехьы. ДжэгукIэу тфызэхащэхэрэр зэкIэ гъэшIэгъоных. Зыми тыфэмыгъэзагъэу зы такъикъ къыхэкIырэп. Джащ фэдэу анахь цIыкIухэм тахэтэу ахэр дгъэджэгунхэр сыгу рехьы, IэшIоу тагъашхэ, — еIо Хьаткъо Самирэ.
Апэрэ классыр къэзыухыгъэ БрантI Даннэ ылъэгъурэр зэкIэ зэрэшIогъэшIэгъоныр, ныбджэгъукIэхэр зэришIыгъэхэр гушIозэ къытфеIуатэ. ДжэгукIэхэм анэмы­кIэу сурэтшIыныр ыгу рехьы, орэд дахэу къызэриIорэр нэрылъэгъу тфэхъугъ.
Мафэрэ зызыщагъэпсэфырэ ыкIи япсауныгъэ зыщагъэпытэрэ лагерым иIофшIэн шIэхэу еухы, ау ащ щагъэкIогъэ мафэхэр кIэлэеджакIохэм джыри бэрэ агу илъыщт.
ДЕЛЭКЪО Анет.