Урысыем и Президент пшъэрылъ зэрэфишIыгъэм тетэу УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым пэIудзыгъэ шIыкIэм тетэу цIыфхэр ригъэблэгъагъэх. Iофыгъо заулэу къырахьылIагъэхэм ар ахэплъагъ, ахэм зыкIэ ащыщыгъ къалэу МыекъуапэкIэ чIыпIэ-общественнэ зыгъэIорышIэжьыпIэу N 10-м итхьаматэу Оксана Пономаренкэм къыIэтыгъэ Iофыгъор.

Мы Iофтхьабзэм хэлэжьагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, Мыекъуапэ имэрэу Геннадий Митрофановыр.
ЛъэIу тхылъыр зиер зыфаер урамэу Гоголым ыцIэкIэ щытым (Пушкинымрэ Пролетарскэмрэ азыфагу) изы Iахь игъэкIотыгъэ IофшIэнхэр ешIылIэгъэнхэмкIэ IэпыIэгъу къафэхъунхэр ары. А гъогум транспортыбэ рэкIо ыкIи къалэм иинфраструктурэкIэ мэхьанэшхо иI. Социальнэ мэхьанэ зиIэ псэуалъэхэри бэу ащ тетых. ГущыIэм пае, гупчэ бэдзэ­рыр, апшъэрэ къэралыгъо еджэпIитIу, кIэлэегъэджэ колледжыр, республикэ сымэджэщыр. Арышъ, гъогум изытет икъоу шапхъэхэм зэрадимыштэрэм зекIоныр къегъэхьылъэ.
Республикэм и ЛIышъхьэ къызэрэхигъэщыгъэмкIэ, зы километрэ фэдиз зикIыхьэгъэ гъогу Iахьым игъэцэкIэжьын мы илъэсым Iоныгъом и 1-м ехъулIэу аухыщт. КъумпIыл Мурат къызэриIуагъэм­кIэ, ащ дакIоу гъогухэр щынэгъончъэнхэм, транспортыр зыгъэIорышIэхэрэм шапхъэхэр амыукъонхэм, джащ фэдэу лъэсрыкIохэми къатефэрэр агъэцэкIэным, сакъынхэм япхыгъэ IофшIэнхэр лъыгъэкIотэгъэнхэм мэхьанэшхо иI.
«Проектым сомэ миллион 58-м ехъу тефэщт. Лъэпкъ проектэу «ЩыIэныгъэм пае инфраструктурэр» зыфиIорэм тегъэпсыхьагъэу IофшIэнхэр агъэцэкIэщтых. ИщыкIэгъэ проект-сметэ документациери хьазыр, IофшIэнхэр зыгъэцэкIэщтхэри агъэнэфэгъа­хэх. Къалэу Мыекъуапэ игъогу­хэм яIыгъын имызакъоу, респуб­ликэм имуниципальнэ образование пстэуми а лъэныкъомкIэ яIоф­хэм язытет лъэшэу тынаIэ тетэгъэты. Гъогухэм ягъэцэкIэ­жьынкIэ планыр илъэс къэс икъоу тэгъэцакIэ. ЧIыпIэу дгъэ­цэ­­кIэжьыщтыр къыхэтхын зы­хъукIэ гъогухэр щынэгъончъэнхэмкIэ къэралыгъо инспекцием игъоу ылъэгъухэрэр ыкIи цIыф­хэм яеплъыкIэхэр къыдэтэлъы­тэх», — къыIуагъ КъумпIыл Мурат.
ЛъэIу тхылъыр къэзыгъэхьыгъэр Полномочнэ лIыкIом гущыIэгъу зыфэхъум къыIуагъ республикэм и ЛIышъхьэ къы­тыгъэ джэуапым зэригъэрэзагъэр.
А гъогу Iахьым ипроект къызэрэдилъы­тэрэм тетэу зэщыкъогъэ гъогубгъухэр зэтырагъэпсыхьащтых ыкIи жъы хъугъэ асфальт-бетон гъэчъыгъэу гъогухэм ателъыри зэблахъущт. Ащ нэмыкIэу тамыгъэхэу гъогухэм атетхэр агъэкIэ­жьыщтых, лъэсрыкIохэм апае зэпыгъэ­IыкIыгъэхэри зэблахъущтых. Гъогухэм ащызекIонхэмкIэ шIыкIэ гъэнэфагъэу щыIэм тегъэпсыхьагъэу гъогухэр агъэтхъыщтых, ащкIэ агъэфедэщтхэр псынкIэу мыхъокIырэ материалхэр ары.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.