Республикэм ичIыгулэжьхэм бжыхьасэхэм яIухыжьын мы мафэхэм аублагъ. АIожьынэу щыт гектар 107919-м щыщэу мэкъуогъум и 24-м ехъулIэу хьэ гектар 558-рэ Iуахыжьыгъ. Апэрэ гектархэм гурытымкIэ центнер 54,5-рэ къаты, гъэрекIорэм егъэпшагъэмэ ар центнери 7,45-кIэ нахьыб. Лэжьыгъэм иIухыжьын Кощхьэблэ, Шэуджэн, Джэджэ, Красногвардейскэ, Теуцожь районхэм ащаублагъ.

Кощхьэблэ районым мэкъу-мэщымкIэ игъэIорышIапIэ иагроном шъхьаIэу Агъыр­жьэнэкъо Саидэ къызэриIуагъэмкIэ, икIыгъэ тхьамафэм бэрэскэшхом апэрэ комбайнэхэр губгъом ихьагъэх. ЗэкIэмкIи бжыхьэсэ гектар 18728-рэ аIожьынэу щыт. Районым илъ чIыгум ипроцент 51-рэ ар мэхъу. Хьэм — гектар 1575-рэ, коцым — гектар 15120-рэ, рапсым — гектар 2014-м ехъу арагъэу­бытыгъ. Тыгъуасэ ехъулIэу районым гектари 128-рэ щыIуахыжьыгъ, апэрэ гектархэм 52-м ехъу къаты.
Апэрэу лэжьыгъэм иугъоижьын фежьагъэхэр Зыхьэ Зураб, Тутарыщ Эдуард, Къушъхьэ Азэмат зипэщэ мэкъумэщ-фермер хъызмэтшIапIэхэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэхэу «Премиум» ыкIи «Элит» зыфиIохэрэр ары.
— Iоныгъор игъом зэшIуахыным районым ичIыгулэжьхэм зэрифэшъуашэу зыфагъэхьазырыгъ. ИщыкIэгъэ техникэр, Iэмэ-псымэхэр, зыщагъэтIылъыщтхэр зэкIэ хьазырых. ЗэкIэмкIи 2025-рэ илъэсым иIоныгъо комбайнэ 80 хэлэжьэнэу тэгъэнафэ. Лэжьыгъэр зэрэзэращэщт автомобили 140-рэ хьазыр. Рай­оным иIэ техникэр икъущт, — еIо Саидэ.
Бжыхьасэхэм лэжьыгъэ бэгъуагъэ къатынэу зэрэщыгугъыхэрэр нэужым ащ къыхигъэщыгъ. Мыгъэ ом изытет ыпкъ къикIыкIэ Iоныгъор нахь кIасэу рагъэ­жьагъ, ау апэрэ гектархэм лэжьыгъэ бэгъуагъэ къаты. Непэрэ мафэм хьэм ыуасэ соми 10 — 11, ащ къыхэкIыкIэ чIыгулэжьхэм лэжьыгъэр агъэтIылъы.
Ом изытет иягъэ къэмыкIомэ, мэфэ заулэкIэ хьэм иIухыжьын Кощхьэблэ районым щаухынэу агъэнафэ. Нэужым рапсыр аIожьыщт.
Джащ фэдэу гъэтхэсэ гектар 16572-рэ районым ихъызмэтшIапIэхэм апхъыгъ. Ахэм ащыщэу натрыфым — гектар 6592-рэ, тыгъэгъазэм — гектар 9018-рэ, соем — гектар 660-рэ, зэнтхъым — гектари 160-рэ арагъэубытыгъ, гъэтхэсэ хьэ гектари 130-рэ ыкIи картоф гектар 12-рэ ашIагъ. Ахэм ящыкIагъэр зэкIэ арагъэгъоты, непэрэ мафэм язытет уигъэрэзэнэу зэрэщытыр агроном шъхьа­Iэм къыIуагъ.

ДЕЛЭКЪО Анет.