Мэкъуогъум и 27-м къыщегъэжьагъэу и 29-м нэс къэзэкъ культурэм ия ХХХIV-рэ фестиваль Адыгэ Республикэм ипсэупIэу Каменномостскэм щыкIощт.

Ащ изэхэщакIор Ассоциациеу «Къэзэкъ культурэм ишъолъыр фестиваль» зыфиIорэр ары. Адыгэ Республикэмрэ президент грантхэмкIэ Фондымрэ къафатIупщыгъэ мылъкумкIэ ар зэхащэщт. Мы Iофтхьабзэм изэхэщэнкIэ IэпыIэгъу къафэхъугъэх Адыгеим и ЛIышъхьэ, Пшызэ шъолъыр икъэзэкъыдзэ иатаман, АР-м IофшIэнымрэ социальнэ хэхъоныгъэмрэкIэ и Министерствэ, Адыгеим культурэмкIэ и Министерствэ, къалэу Мыекъуапэрэ Мыекъопэ районымрэ яадминистрациехэр.
ОрэдыIохэм, къэзэкъ фольклор-этнографическэ купхэм, IэпэщысэхэмкIэ Iоф­шIэгъэ анахь дэгъухэр зиIэхэм, пщынаохэм, къэзэкъ лъэпкъ къашъохэмкIэ ыкIи нэмыкI лъэныкъохэмкIэ нахь къахэщыгъэхэм яIэпэIэсэныгъэ къагъэлъэгъощт.
Зэнэкъокъум хэлажьэхэрэм Адыгэ Республикэм ичIыпIэ анахь дахэхэр арагъэлъэгъущтых: псыкъефэххэу Рыфабгъо, Свято-Михайло-Афонскэ чылысыр ыкIи нэмыкIхэр. Къалэу Мыекъуапэ дэт Лъэпкъ музеим, КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ ыкIи нэмыкI чIыпIэхэм ахэр ащыIэщтых.
Фестивалым иапэрэ мафэ хьакIэхэр зыхэлэжьэщтхэ концертхэр къатыщтых, къэзэкъ культурэм фэгъэхьыгъэ Iэнэ хъурае зэхащэщт. Къэзэкъ IэпэIасэхэм яIэпэщысэхэм якъэгъэлъэгъон ыкIи ахэм яегъэджэн сыхьатхэр рагъэкIокIыщтых.
ЯтIонэрэ мафэм лъэпкъ шхынхэмкIэ фестиваль зэхащэщт. МэфэкI шIыкIэм тетэу Iофтхьабзэр къызэIуахыщт, пчыхьэм зэнэкъокъум хэлажьэхэрэр къэлэ паркым рагъэблэгъэщтых.
Фестивалым икIэухым анахь дэгъухэр къыхахыщтых, псэупIэу Каменномостскэм дэт паркым а Iофтхьабзэр щырекIокIыщт.
Пшызэ шъолъырым ис къэзэкъхэм якультурэрэ ящыIэкIэ-псэукIэрэ янэшэнэ шъхьаIэхэм хьакIэхэр нэIуасэ афашIыщт.
Лъэпшъыкъо Фатим.