Я ХVII-рэ зэнэкъокъоу Чайковскэм ыцIэ зыхьырэм текIоныгъэ къыщыдэзыхыгъэ ныбжьыкIэ­хэм Адыгэ ­Республикэм концерт къыщатыгъ.

Культурнэ проектэу «Урысые ыкIи дунэе зэнэкъокъухэм ащытекIуагъэхэм яконцертхэр» зы­фиIорэм ар къыдыхэлъытагъ. Урысыем культурэмкIэ и Ми­нистерствэ игукъэкIкIэ зэхащагъ. Проектыр 2020-рэ илъэсым щыублагъэу щыIэныгъэм щыпхыращы. Илъэс къэс чIыпIэ зэфэшъхьафхэм Iофтхьабзэр ащэкIо. Мыгъэ Адыгэ Респуб­ликэр къыхахыгъ. АР-м инароднэ артистэу, АР-м исимфониче­скэ оркестрэ идирижерэу Аркадий Хуснияровыр концертым хэлэжьагъ. Симфоническэ оркестрэм мэкъамэхэр къыри­гъэIуагъ.
Хэгъэгу ыкIи лъэпкъ искусствэр къызэтегъэнэгъэнхэм, тапэкIэ хэхъоныгъэ ягъэшIы­гъэным, зэлъашIэгъэ композиторхэм аусыгъэ произведениехэм цIыфхэр нэIуасэ афэшIыгъэнхэм проектыр фэлажьэ. Джащ фэдэу академическэ музыкэм ныбжьыкIэхэр хэ­щэгъэнхэм, шъолъырхэм ыкIи лъэпкъ зэфэшъхьафхэм азыфагу илъ культурнэ зэпхыны­гъэр гъэпытэгъэным фэIорышIэ. ­Илъэс къэс ащ мэкъэмакIэхэр хагъахьэ ыкIи Iофтхьабзэр нахь гъэшIэгъон зэрашIыщтым зэхэщакIохэр пылъых.
Адыгэ Республикэм и Къэралыгъо филармоние исценэ зыкъыщагъэлъэгъуагъ ыпшъэкIэ зигугъу къэтшIыгъэ зэнэкъо­къокъум илауреатхэу Данил Коган (скрипкэр), Сергей Давыдченкэм (фортепианэр), Со­фия Виланд (флейтэр). Ахэм классикэм хэхьэгъэ произве­дениехэр концертым къыщы­рагъэIуагъэх.

— Апэрэу Адыгеим сыкъэ­кIуагъ, лъэшэу Мыекъуапэ сыгу рихьыгъ. Зэнэкъокъум ишIуа­гъэкIэ хэгъэгушхом исценэхэм концертхэр къащыттынхэ амал тиI. ТапэкIэ Японием, Китай, Америкэм гастроль гъэшIэгъонхэр къащыттыщтых, — къы­Iуагъ скрипкэм къезыгъэIорэ Данил Коган.
Музыкантхэм къагъэхьазырыгъэ къэгъэлъэгъоным искусствэр зышIогъэшIэгъонхэр гуха­хъо хагъуатэу еплъыгъэх.
Лъэпшъыкъо Фатим.