Зэдегъэштэн есынымкIэ Урысые зэнэкъокъухэр мэкъуогъум и 19-м щегъэжьагъэу и 23-м нэс Санкт-Петербург щыкIуагъэх.

Илъэс къэс мыщ щызэхащэрэ дунэе экономическэ форумым илъэхъан турнирыр рагъэкIокIы. Мы уахътэм Темыр Пальмирэм щыпсэухэрэм ыкIи ихьакIэхэм чэщ фыжьхэм ядэхагъэ зэрагъэлъэгъун амал яI.

Зэнэкъокъухэм ахэлэжьагъэх илъэс 13-м нэс зыныбжь кIалэхэр ыкIи пшъашъэхэр, илъэс 13 — 16 ыкIи 13 — 15 зыныбжь кIалэхэмрэ пшъашъэхэмрэ. Урысыем ишъо­лъыр 16-мэ, джащ фэдэу Беларусим ыкIи Казахстан яспортсменхэм заушэтыгъ, зэкIэмкIи нэбгырэ 500.
Адыгэ Республикэр къэзыгъэлъэгъуагъэхэр олимпийскэ резервым испорт еджапIэу В. С. Максимовым ыцIэ зыхьырэм зыщызыгъасэхэрэр ары. Илъэс 13 — 15 зыныбжьхэм якуп хэтыгъэхэ Тыгъушъэ Самирэрэ Виктория Исаковамрэ спортым имастер хъунхэмкIэ балли 5 ныIэп зыщыкIагъэхэр. Анастасия Анисимовар, Джан­хъот Элана, Виктория Исаковар, Диана Михайловар, Тыгъушъ Самирэ, Владислава Хлупинар ыкIи Елизавета Шестаковар зы­хэтхэ командэм хагъэунэфыкIырэ чIыпIэ къыдихыгъэп, ау пшъашъэхэм балл 223-рэ къахьи, спортым имастер хъунхэмкIэ шап­хъэр агъэцэкIагъ. Ярослав Стародубцевым медаль къыдихыгъ. Илъэси 10 зыныбжь кIалэм унэе зэнэкъокъухэм ятIонэрэ чIыпIэр къащыдихыгъ.