Адыгеим и ЛIышъхьэу КъумпIыл Мурат респуб­ликэм иминистрэхэм я Кабинет изэIукIэу зэри­щагъэм зыщытегущыIа­гъэ­­хэр лъэныкъо зэфэшъхьафхэмкIэ пIэлъэ кIыхьэхэм ателъытэгъэ гухэлъхэр ыкIи зэкIэми апэу зэшIохыгъэн фэе Iофыгъохэр ары. Ахэм ащыщых цIыфхэр зыщыпсэухэрэ унэхэм яшIын ыкIи ягъэцэкIэжьын.

Мы зэIукIэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, республикэм имуниципалитетхэм япащэхэр. Iофыгъоу зытегущыIагъэхэм зыкIэ ащыщ лъэпкъ проектыкIэу «ЩыIэныгъэм пае инфраструктурэр» зыфиIорэм зэхэтэкъоным нэсыгъэ унэжъхэм цIыфхэр къачIэщы­жьыгъэнхэм ипрограммэу къыдыхэлъытагъэр пхырыщыгъэныр. ПстэумкIи цIыфхэр зыщыпсэухэрэ унэ квадрат метрэ мин 23-рэ Iуахын фае, 2017-рэ илъэсым щылэ мазэм и 1-м ар агъэу­нэфы­гъэу щыт. Унэжъхэм къачIэкIыщт нэбгырэ 1440-мэ псэупIэхэр ятыгъэнхэ фае.
Адыгеим псэолъэшIынымкIэ и Министерствэ къызэритыгъэмкIэ, 2025 – 2030-рэ илъэсхэм чIыпIэхэм хэхъоныгъэ ягъэшIыгъэнымкIэ Фондым икъэкIуапIэ­хэм сомэ миллион 423,8-рэ къахагъэ­кIыщт, зэхэтэкъоным нэсыгъэ квадрат метрэ мини 7,5-м ащыпсэущтыгъэхэр унэхэм ачIэгъэтIысхьэгъэнхэм ар пэ­Iухьащт. Къанэхэрэм УФ-м ишъолъыр бюджет икъэкIуапIэхэмкIэ афагъэцэ­кIэщт.
Республикэ бюджетым 2025-рэ илъэ­сым къыщегъэжьагъэу 2027-м нэс а гухэлъхэм апае сомэ миллиони 115,8-рэ илъэс къэс къыхагъэкIызэ ашIыщт. АР-м псэолъэшIынымкIэ и Министерствэ ипащэу Валерий Картамышевым къызэрэхигъэщыгъэмкIэ, 2025 – 2026-рэ илъэс­хэм сомэ миллион 77,9-рэ ахэм апэIуа­гъэхьанэу ары, ащ щыщэу сомэ миллион 50,3-р чIыпIэхэм хэхъоныгъэ ягъэшIыгъэнымкIэ Фондым икъэкIуапIэхэм къахэкIыщт. Ащ ишIуагъэкIэ цIыф­хэр зыщыпсэухэрэ унэжъхэу квадрат метрэ мин фэдиз Iуахыжьыщт. Мы илъэсым анахьыбэу IофшIэнхэр зыщызэшIуахыщтхэр Тэхъутэмыкъое районыр ары.

Фондым икъэкIуапIэхэм къахэкIыщт ахъщэр Урысые Федерацием ишъолъыр­хэм 2025-рэ илъэсым Iоныгъом аIэкIагъэхьанэу ары. НепэкIэ федеральнэ шапхъэхэр агъэнафэх. Республикэм и ЛIышъхьэ пшъэрылъ афишIыгъ муниципалитет пэпчъ ащызэшIуахыщт Iофтхьабзэхэм лъэшэу анаIэ тетэу якIолIэнхэу, игъом программэхэр гъэцэкIагъэ хъунхэм анаIэ тырагъэтынэу.
«Зэхэтэкъоным нэсыгъэ унэжъхэр IухыжьыгъэнхэмкIэ республикэ бюджетым ищыкIэгъэ мылъкур къы­щыдалъытагъ. Федеральнэ ахъщэр къызэрэшъу­IэкIахьэрэм лъыпытэу шъуIэ къижъугъэхьанэу шъу­ублэн фае ыкIи гухэлъэу щыIэхэр икъоу гъэцэкIагъэ хъунхэм шъунаIэ тежъугъэт», — къыIуагъ КъумпIыл Мурат.
Республикэм и ЛIышъхьэ ренэу ынаIэ зытыригъэтыхэрэм ащыщ кIэлэцIыкIу ибэхэм зычIэсыщт унэхэр ягъэгъотыгъэн­хэр. Мы илъэсым а гухэлъхэм апэIуагъэхьанэу сомэ миллион 333,8-рэ агъэ­нэфагъ, ащ щыщэу сомэ миллион 300-р республикэ бюджетым къыхагъэ­кIыщт. НепэкIэ фэтэр 77-рэ кIэлэцIыкIу ибэхэм апае къащэфыгъ. Шъугу къэтэгъэкIыжьы: илъэсэу икIыгъэм ахэм апае фэтэри 150-рэ къыхагъэкIыгъагъ. Джы пшъэры­лъэу щытыр а пчъагъэм къыкIе­мыгъэ­чыгъэныр ары, дэгъоу зэтегъэ­псыхьэгъэ унэхэр кIэлэцIыкIу ибэхэм ятыгъэнхэмкIэ Iофтхьабзэхэр зэкIэ зэрищыкIагъэм лъыкIахьэу зэшIохыгъэнхэ фае. Муниципалитетхэмрэ министерствэ зэфэ­шъхьаф­хэмрэ пшъэрылъ афашIыгъ амал тедзэхэр къагъотынхэу, псэолъэшI компаниехэу чIыпIэхэм яхэхъоныгъэхэм адэлажьэхэрэм программэхэр гъэцэкIагъэ хъунхэм пае нахь шIогъэ ин хэлъэу адэлэжьэнхэу. Унэхэм яигъэкIотыгъэ гъэ­цэкIэжьынкIэ, республикэм ицIыф псэупIэхэм джырэ уахътэм диштэрэ теплъэ ятыгъэнымкIэ пшъэрылъ гъэнэфагъэхэри ЛIышъхьэм къыгъэуцугъэх.
«Тимуниципалитетхэм язэте­гъэпсыхьанкIэ бэ зэшIотхырэр. Унэхэм къапэIулъ чIыпIэхэр, ахэм къахеубытэх Мыекъуапэ дэт унэхэу фэтэрыбэу зэхэтхэм ябалконхэри, зэтедгъэпсыхьагъэх. А Iоф­шIэныр джыри лъыгъэкIотэ­гъэн фае. ЦIыф псэупIэхэр гум къи­нэжьхэу щытынхэм пае нахь зэрэдгъэкIэрэкIэщтхэм, тхыпхъэхэри зэрэдгъэфедэщтхэм тынаIэ тед­гъэтын фае. Муниципалитетхэм язэтегъэпсыхьанрэ цIыфхэр зыщыпсэухэрэ унэхэм ягъэцэкIэ­жьынрэ зэрэкIорэр сэ сшъхьэкIэ сыуплъэкIунэу зыфэзгъэзэщт, къа­лэу МыекъуапэкIэ къезгъэжьэщт. Республикэм икъэлэ шъхьаIэ джыри нахь дахэу, ущыпсэунымкIэ нахь Iэрыфэгъоу хъун фае», — къыIуагъ КъумпIыл Мурат.
ЗэIукIэм илъэхъан лъэныкъо зэфэ­шъхьафхэмкIэ министрэхэм, чIыпIэхэм япащэхэм, уплъэкIокIо-лъыплъэкIо къулыкъухэм яIэшъхьэтетхэм къашIыгъэ джэпсалъэхэм республикэм и ЛIышъхьэ ядэIугъ ыкIи программэм къыдилъытэрэ пшъэрылъхэр зэкIэ гъэцэкIагъэ хъунхэм пае графикыр укъуагъэ мыхъуным тегъэпсыхьэгъэ пшъэрылъхэр къыгъэнэфагъэх.

АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.