Урысыем каратэмкIэ и Федерацие и Адыгэ шъолъыр къутамэ итренерэу ХьакIэкожъ Мурат Мыхьамэт ыкъом ишIэжь фэгъэхьыгъэ зэнэкъокъухэр Адыгэ къэралыгъо университе-тым физическэ культурэмкIэ ыкIи дзюдомкIэ и Институт щыкIуагъэх.

ХэушъхьафыкIыгъэ дзэ операцием ипшъэрылъхэр щигъэцакIэзэ зидунай зыхъожьыгъэ Мурат Мыхьамэт ыкъом ишIэжь агъэлъапIэзэ мыщ цIыфыбэ къыщызэрэугъоигъ. Iофтхьабзэм къырагъэблэгъагъэх ащ янэ, ишъхьэгъу­сэ, ыкъо ыкIи ыпхъу. Спортсменхэм апашъхьэ къыщыгущыIагъэх Фондэу «Хэгъэгум иухъумакIохэр» зыфиIорэм икъутамэу Адыгеим щыIэм ипащэу ПIатIыкъо Аслъан, физическэ культурэмкIэ ыкIи спортымкIэ Комитетым итхьаматэ игуадзэу Игорь Бандуркиныр, ыпшъэкIэ зигугъу къэтшIыгъэ Федерацием и Адыгэ шъолъыр къутамэ ипащэу Владимир Васильченкэр. Мурат ишIэжь агъэлъапIэзэ, къэзэрэугъоигъэхэр зы такъикърэ ащ фэшъыгъуагъэх.
Турнирым команди 8 хэлэ­жьагъ, зэкIэмкIи нэбгыри 150-рэ фэдиз. Ахэр Шъачэ, Курганинскэ, Адыгеим икъэлэ шъхьаIэ, Мые­къопэ ыкIи Джэджэ районхэм ялIыкIох.
Командэхэм язэнэкъокъу текIоныгъэр къыщыдихыгъ Мыекъуапэ ихэшыпыкIыгъэ командэ. Техникэ анахь дэгъу къэзыгъэлъэгъуагъэр Хьамдэхъу Ислъам (Мыекъуапэ). Анахь псынкIэу зэIукIэгъур зыухыгъэр Шъачэ къикIыгъэ Саломея Тандильян, анахь лъэшэу текIоныгъэм фэбэнагъэр респуб­ликэм икъэлэ шъхьаIэ илIыкIоу Левон Егикян.