Я ХХVIII-рэ дунэе эко­номическэ фо­ру­мым къыдыхэ­лъыта­гъэу щыIэгъэ пленар­нэ зэхэсыгъом Урысыем и Президентэу Владимир Путиныр къыщыгущыIагъ. Адыгеим и ЛIышъхьэут КъумпIыл Мурат зэ­хэ­сыгъом хэлэжьагъ.

УФ-м и Президент зэрэхигъэу­нэфыкIыгъэмкIэ, экономикэмкIэ Урысыем Европэм апэрэ чIыпIэр, дунаим я 4-рэ чIыпIэр ащиIыгъ. Къырадзэгъэгъэ пчъа­гъэхэм инфляциер алъыIэсы­гъэп, Правительствэмрэ Гупчэ банкымрэ зэрахьэгъэ амалхэм яшIуагъэкIэ проценти 10-м на­хьи нахь макIэ ар хъугъэ. Къи­ныгъоу щыIэхэм ямылъытыгъэу Урысые Федерацием къыщыдагъэкIырэм зэхэугъоягъэу илъэс къэс проценти 4-кIэ хэхъо. 2025-рэ илъэсым иапэрэ мэзи 4 Урысыем изэхэугъоегъэ продукт процент 1,5-кIэ нахьыбэ хъугъэ. IофшIэнмыгъотыныгъэр Урысыем зыпкъ щиуцуагъ, шэпхъэ анахь цIыкIум — проценти 2,3-м ар зэрэтет. ЛэжьапкIэм икъоу Урысыем зэрэ­щыхамыгъэхъуагъэр, цIыфхэм яча­ныгъэ зыкъегъэIэтыгъэнымкIэ, IофышIэхэм яIэпэIэсэныгъэ хэгъэхъогъэнымкIэ, лэжьакIохэм нахь псынкIэу Iоф ашIэнымкIэ ищыкIэгъэ амалхэр зехьэгъэнхэ зэрэфаер Президентым къыхигъэщыгъ.
Владимир Путиным зэрэхигъэунэфыкIыгъэмкIэ, Урысыем иэкономикэ илъэныкъохэр зэ­ры­гъозэнхэ фаер хэгъэгум къы­щыхахырэ технологиехэр ары. ТехнологиякIэхэр зэра­гъэфедэрэм Правительствэм гъунэ лъифыщт, Урысыем ибрендыкIэхэм IэпыIэгъу афэхъузэ ышIыщт. Шъолъыр экономическэ модельхэм язытет нахьышIу шIыгъэнэу, инвестициехэр къахалъхьанхэмкIэ амалхэм зягъэу­шъомбгъугъэнэу пшъэрылъ заулэ ащ къафишIыгъ.
Президентым Правительст­вэмрэ шъолъырхэмрэ пшъэрылъ афишIыгъ креативнэ экономи­кэм зызэрэрагъэушъомбгъущтым истратегие къагъэхьазырынэу, федеральнэ проект шъхьафым икъыхэхын дегу­пшысэнхэу. Къэралыгъом ипащэ зэрэхигъэунэфыкIыгъэмкIэ, мыгъэкIэ мэхьанэшхо зиIэ пшъэ­рылъэу щытыр хэгъэгум иэкономикэ зыпкъ итэу хэхъоныгъэ егъэшIыгъэныр, инфляцием зы­къемыгъэIэтыгъэныр, Iоф­шIэнмыгъотыныгъэм ебэны­жьыгъэныр ары.
«Сырьем тиэкономикэ чIыпIэ шъхьаIэ зэрэщиубытыщты­гъэм джы Iофыр фэдэжьэп. Предприятие, компание минипшI пчъагъэмэ дэгъоу Iоф зэра­шIэ­рэм ишIуагъэкIэ тиэкономикэ зыпкъ итэу хэхъоныгъэ ышIы, лъэныкъуабэхэмкIэ нахь зиушъомбгъу хъугъэ», — къыIуагъ Владимир Путиным.
Адыгеим и ЛIышъхьэу КъумпIыл Мурат пленарнэ зэхэсыгъом икIэуххэм къатегущыIэзэ, УФ-м и Президент форумым къащыхилъхьэгъэ унашъохэр гъэцэкIэгъэнхэм мэхьанэшхо зэриIэр хигъэунэфыкIыгъ. Экономикэр зыпкъ итыным, цIыфхэм федэу къа­IэкIахьэрэр нахьыбэ хъуным, хэгъэгум икъыдэгъэкIакIохэм зягъэушъомбгъугъэ­ным ахэр зэрафэIорышIэщтхэр игущыIэ къыщыхигъэщыгъ.
«УФ-м и Президент игущыIэ экономикэ Iофхэм язытет къыщызэхифыгъ, тихэгъэгу пIэлъэ кIыхьэм телъытагъэу хэхъоныгъэ егъэшIыгъэнымкIэ мэхьанэшхо зиIэ лъэныкъохэу тынаIэ зытед­гъэтын фаехэр къыгъэнэфагъэх. Тирес­публикэ нахь псынкIэу социальнэ-экономикэ хэхъоныгъэ егъэшIыгъэнымкIэ пшъэрылъэу Владимир Путиным къы­гъэуцугъэхэр дэх имыIэу дгъэцэкIэщтых. Экспертхэм яеплъыкIэхэу форумым къыщаIуагъэхэр зэфэтхьысыжьыщтых. IофшIэкIэ амалэу тиIэхэм ахэдгъэхъощт. Инвесторхэм ямылъку нахьыбэу къытхалъхьанымкIэ республикэм амалэу иIэхэм зядгъэушъомбгъущт. Экономикэм илъэныкъо пэрытхэм хэхъоныгъэ ашIынымкIэ амалхэр зэрэщыIэхэр непэ тинэрылъэгъу. Промышленнэ паркэу «Инэм» зыфиIорэм, зыгъэпсэфыпIэу «Лэгъонакъэм», логистическэ гупчэхэм ягъэпсынкIэ проектхэм тишъыпкъэу тадэлажьэ. Ахэм экономикэм нахь зыкъырагъэIэтыщт, IофшIэпIэ чIыпIакIэхэр щыIэ хъущтых. Хэгъэгум икъыдэгъэ­кIакIохэм хэхъоныгъэ ягъэшIыгъэным а амалыр фэдгъэIорышIэщт», — къыIуагъ КъумпIыл Мурат.
АР-м и ЛIышъхьэ зэрэхигъэунэфыкIыгъэмкIэ, сомэ миллиард 93,8-м ехъу зытефэрэ проектхэм непэ республикэм Iоф щадашIэ. Адыгеим инвестицие­хэр нахьыбэу къыхалъхьанхэмкIэ дунэе экономическэ форумэу Санкт-­Петербург щыкIорэм ишIуагъэ къэкIощт. ШIуагъэ къытэу форумым тыхэлэжьагъ, зэзэгъыныгъэ заулэ адэтшIыгъ. Социальнэ лъэныкъоми, экономикэми Iофхэр нахьышIу ащыхъунхэм ахэр фэIорышIэщтых.
«Экономикэм зыкъегъэIэтыгъэнымкIэ, гъомылапхъэхэр афикъунымкIэ, социальнэ, инженер, транспорт инфраструктурэм зегъэушъомбгъугъэнымкIэ пшъэ­рылъхэр тапэкIи дгъэцэкIэщтых. Бюджетым хахъохэр нахьыбэу къихьанхэм, цIыфхэм ахъщэу къаIэкIахьэрэм хэхъоным, IофшIэпIэ чIыпIакIэхэр зэхэщэ­гъэнхэм Iоф адэтшIэщт. Республикэм, бизнес-проектхэм, лъэпкъ проектыкIэ­хэмрэ къэралыгъо программэхэмрэ амалэу къытатыхэрэр нахь икъоу къыз­фэдгъэфедэщтых. Хэхъоныгъэ тшIызэ, ыпэкIэ тылъыкIотэщт, цIыфхэм ящы­IэкIэ-псэукIэ зыкъегъэIэтыгъэным тишъып­къэу тыдэлэжьэщт», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.