Урысые Федерацием ишъолъырхэм инвестициехэм алъэныкъокIэ яIофхэм язытет фэгъэ­хьыгъэ Лъэпкъ рей­тингым икIэуххэр Петербург щыкIорэ дунэе экономическэ форумым къырахьылIагъэх.

Стратегическэ инициати­вэхэмкIэ Агентствэм исессие игъэкIотыгъэ бизнесыр нахь дэгъоу зэхэщэгъэнымкIэ, шъо­лъырхэм амалыкIэхэр ягъэгъотыгъэнхэмкIэ, инвести­цие­хэмкIэ Iофхэм язытет нахьы­шIу шIыгъэнымкIэ, цIыф­хэм ящыIакIэ нахь зыкъегъэIэтыгъэнымкIэ Iофыгъоу къэуцу­хэрэм щатегущыIагъэх. Урысые Федерацием экономикэ хэ­хъоныгъэмкIэ иминистрэу Максим Решетниковым къызэрэхигъэщыгъэмкIэ, непэ экономикэм изытет сыд фэдизэу дэгъуми, инвестициехэр икъоу тымыгъэфедэхэмэ, пIэлъэ кIыхьэм те­лъытэгъэ хэхъоныгъэ ащ ышIышъущтэп. Арышъ, УФ-м и Президентэу Владимир Путиным хэгъэгум иэкономикэ зыкъыIэтынымкIэ, инвестициехэмкIэ Iофхэм язытет нахьышIу шIыгъэнымкIэ къыгъэуцугъэ пшъэрылъхэр гъэцэкIагъэ хъунхэм пае шъолъырхэм чанэу Iоф ашIэн фае. Лъэпкъ рейтингым икIэ­уххэми ар нафэ къашIыгъ. Урысые Феде­рацием и Правительствэ и Тхьаматэ игуа­дзэу Александр Новак ­Лъэпкъ рейтингым изэхэщэн икIэух­хэм япхыгъэу шъолъыр къулы­къухэм Iоф зэрашIагъэр къызэхифыгъ.
Шъугу къэтэгъэкIыжьы: Пре­зидентэу Владимр Путиным пшъэрылъ къызэрафишIыгъэм тетэу Урысыем ишъо­лъырхэм инвестициехэмкIэ яIофхэм язытет и Лъэпкъ рейтинг 2014-рэ илъэсым къы­щегъэжьагъэу зэхагъэуцо ыкIи хэгъэгум икъулыкъу зэ­фэшъхьафхэм ягъусэу стратегическэ инициативэ­хэмкIэ Агентст­вэр илъэс къэс зэхащэ. Мы илъэсым Лъэпкъ рей­тингым лъэ­ныкъуи 8 къы­хиубытагъ: амыгъэкощырэ мылъкур, инженер хъытыухэр, бизнесым икъэу­хъумэн, ащ IэпыIэгъу етыгъэнымкIэ Iофтхьабзэхэм язэшIохын, экспорт Iоф­шIэныр, инфраструктурэр, технологиехэр, IофышIэхэр, бэдзэр зэфыщытыкIэхэм ыкIи зэнэкъокъуным зягъэушъомбгъу­гъэныр. Лъэныкъо пэпчъ агъэунэфыным пае цIыфхэм яеплъыкIэхэр, статистикэм къыгъэлъэгъуагъэхэр, экспертхэм уасэу къафашIыгъэхэр къыдалъытагъэх.
ПроектыкIэхэр пхырыщыгъэнхэмкIэ стратегическэ инициативэхэм я Агентствэ игенеральнэ пащэу Цупшъэ Светланэ къызэриIуагъэмкIэ, рейтингым иметодологие игъэкIэжьынкIэ зишIуагъэ къэкIуагъэхэр лъэпкъ проектхэр зэрищыкIагъэм тетэу къызэрэдалъытагъэхэр, шъолъырхэмрэ предпринимательхэмрэ яеплъыкIэхэм къызэрапкъырыкIыгъэхэр ары. А методологием къызэлъеубытых бизнесым зэкIэ илъэныкъохэр, шъолъыр инвестиционнэ командэхэм яIофшIакIэ изытет ыкIи нэмыкIхэр.
Къалэу Москва рейтингымкIэ джыри анахь дэгъухэм апэ ит хъугъэ. Адыгеир мы илъэсым шъолъыр анахь дэгъу 20-мэ ахэфагъ, я 16-рэ чIыпIэр ыубытыгъ, Къыблэ федеральнэ шъолъырым исубъектхэм азыфагу я 3-рэ чIыпIэр щиIыгъ.
Адыгеим и ЛIышъхьэ къызэрэхигъэщыгъэмкIэ, республикэмкIэ ащ мэхьанэшхо иI, шъолъырым икомандэ Iофышхоу зэшIуихыгъэм ар ишыхьат. Хэгъэгум и Правительствэ иIэпыIэгъу хэлъэу Адыге­ир социальнэ-экономикэ хэхъоныгъэм илъэныкъо шъхьаIэхэмкIэ лъыкIотагъ, инвестициехэри нахьыбэ ышIынхэ ылъэ­кIыгъ.
«Стратегическэ инициативэхэмкIэ Агентствэм опытышIоу IэкIэлъ хъугъэр дгъэфедэзэ, инвестициехэр нахьыбэу къызэрэтIэкIэхьащтхэм, бизнесым нахь зызэредгъэушъомбгъущтым амалышIу­хэр афызэхатщэхэзэ тынаIэ атетэгъэты. Урысые Федерацием и Президент хэгъэгум итехнологическэ суверенитет зыкъегъэIэтыгъэнымкIэ, цIыфхэм ящы­IакIэ нахьышIу шIыгъэнымкIэ стратегическэ пшъэрылъхэу къыгъэуцухэрэр зэшIохыгъэ хъунхэмкIэ а IофшIэным мэхьанэшхо иI. Арышъ, АСИ-м иамалхэр зэкIэ тапэкIи дгъэфедэщтых. Бизнесым хэхъоныгъэ егъэшIыгъэнымкIэ лъэпкъ проектхэм атегъэпсыхьагъэу Iоф тшIэщт ыкIи а пстэуми яшIуагъэ къэкIощт рес­публикэм имызакъоу, хэгъэгуми нэ­мыкIхэм янэкъокъун ылъэкIын амал ыгъо­тынымкIэ, цIыфхэм ящыIакIи на­хьышIу хъунымкIэ. Лъэпкъ рейтингым ишIуагъэ къэкIо республикэм икъулыкъу зэфэшъхьафхэм непэ Iофэу ашIэрэр икъоу зэхэфыгъэнымкIэ, къэкIуапIэу щыIэхэм гу алъытэгъэнымкIэ, ыпэкIэ ты­лъыкIотэным пае IофшIэныр нахь зыщыдгъэлъэшын фэе чIыпIэхэр тэрэзэу дгъэунэфынхэмкIэ», — къыIуагъ КъумпIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.