Петербург щыкIорэ я ХХVIII-рэ экономическэ форумым Адыгеим и ЛIышъхьэу КъумпIыл Муратрэ Урысыем псэо­лъэшIынымкIэ ыкIи унэ-­коммунальнэ хъызмэтымкIэ иминистрэу Ирек Файзуллинымрэ зэдыряIэгъэ зэIукIэгъур щыкIуагъ.

Ащ хэлэжьагъ псыкъэкIуапIэхэмкIэ Федеральнэ агентствэм ипащэу Дмитрий Кирилловыр. Республикэм исоциальнэ-­экономикэ хэхъоныгъэ иIофыгъохэм лъэныкъуитIури атегущыIагъэх.
ЗэIукIэгъум илъэхъан республикэм къихьэрэ инвестициехэр нахьыбэ шIыгъэнхэм ыкIи социальнэ, зекIон лъэныкъохэм яинфраструктурэ уахътэм диштэу гъэпсыгъэным япхыгъэ Iофыгъохэм ахэплъагъэх. Шъугу къэтэгъэкIыжьы: федеральнэ проектэу «Къэлэ щыIэкIэ Iэрыфэгъур» зыфиIорэмрэ лъэпкъ проектэу «ЩыIэныгъэм пае инфраструктурэр» щыIэныгъэм пай» зыфиIорэмрэ атегъэпсыхьагъэу общественнэ чIыпIэ 20 Адыгеим щызэтырагъэпсыхьанэу рахъухьагъ. Бюджет чIыфэтхэм яамалхэр агъэфедэхэзэ республикэм инженер ыкIи транспорт инфраструктурэм къахиубытэрэ псэолъи 9 ща­тIупщыгъ.

КъумпIыл Мурат УФ-м псэолъэшIынымкIэ и Министерствэ ипащэ къызэрэфиIотагъэмкIэ, мы аужырэ илъэси 6-м, 2019-рэ илъэсым къыщыублагъэу, Адыге­им цIыфхэр зычIэсыщтхэ унэ квадрат метрэ миллиони 2-рэ мин 420-рэ щатIупщыгъ. Ахэм ащыщэу квадрат метрэ мин 565,62-р икIыгъэ илъэсым. Фэтэрыбэу зэхэт уни 188-рэ (квадрат метрэ 809105-рэ) агъэпсыгъ, унэе псэолъэшIхэм — квадрат метрэ миллион 1,6-м ехъу ашIыгъ. Нэбгырэ телъытэу квадрат метрэ 1,13-м нэсынхэ алъэкIыгъ. ЧIыпIэхэм хэхъоныгъэ ягъэшIыгъэным къы­дыхэлъытагъэу псэолъэшIынымрэ зэ­те­гъэпсыхьэгъэнымрэ япроектхэм яшIуагъэ къэкIо цIыфхэр зычIэсыщтхэ унэу ашIыхэрэр нахьыбэ хъунымкIэ. НепэкIэ республикэм ащ фэдэ проектэу 12 щагъэцакIэрэр: МыекъуапэкIэ — 6, Тэхъу­тэмыкъое районымкIэ — 5 ыкIи Адыгэ­къалэкIэ — 1.
Адыгеим и ЛIышъхьэ шъхьафэу къыщыуцугъ къалэу Мыекъуапэ щызэтырагъэпсыхьэрэ шъолъырэу «Мэздахэм» епхыгъэ Iофхэр зэрэкIохэрэмрэ къэлэ бассейнэр зэрэзэтырагъэпсыхьажьырэмрэ. УФ-м псэолъэшIынымкIэ и Министерствэ, ышъхьэкIэ ежь Ирек Файзуллинми республикэм проектхэр щыгъэцэкIэгъэнхэмкIэ, анахьэу етIани со­циальнэ, инфраструктурнэ псэуалъэхэр зэтегъэпсыхьэгъэнхэмкIэ, яшIуагъэ къы­зэрэкIорэм пае зэрафэразэр КъумпIыл Мурат къыIуагъ.
«Федеральнэ гупчэм иIэпыIэгъу хэлъэу республикэм гъогухэр, еджапIэхэр, сымэджэщхэр, социальнэ инфраструктурэм къыхиубытэрэ нэмыкI псэуалъэхэр щашIых ыкIи щагъэцэкIэжьых. УФ-м псэолъэшIынымкIэ и Министерствэ рес­публикэм цIыфхэр зычIэсыщт унэхэр нахьыбэу щышIыгъэнхэмкIэ ишIуагъэ къегъакIо, цIыфхэм ящыIакIэ нахьышIу хъунымкIэ, кIэлэцIыкIу ибэхэм, унэгъо ныбжьыкIэхэм зычIэсыщтхэ унэхэр ­ягъэгъотыгъэнхэмкIэ, зэхэтэкъоным нэсыгъэ унэжъхэм цIыфхэр къачIэщы­жьыгъэнхэмкIэ, социальнэ программэхэр гъэцэкIагъэ хъунхэмкIэ ащ ишIуагъэ къэкIо. ЗыгъэпсэфыпIэу «Лэгъонакъэ» иинфраструктурэ игъэпсынкIи а Ми­нистерствэм ишIуагъэ къызэригъакIорэм къыхэкIэу ыпэкIэ тылъыкIотэн тэлъэкIы. Лъэпкъ проектыкIэу «ЩыIэныгъэм пае инфраструктурэр» зыфиIорэм къыдыхэлъытагъэу непэкIэ гухэлъ инхэр тиIэх. Ахэр зэшIохыгъэ хъунхэм пае УФ-м псэолъэшIынымкIэ и Ми­нистерствэ дытиIэ гъусэныгъэр лъыд­гъэкIотэщт. Адыгеим ихэхъоныгъэкIэ УФ-м и Правительствэ къыгъэуцугъэ пшъэрылъхэр зэкIэ шIуагъэ хэлъэу гъэ­цэкIэгъэнхэм тыдэлажьэ», — къыIуагъ КъумпIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.