АР-м и Къэралыгъо Совет — Хасэм изэхэсыгъоу тыгъуасэ щыIагъэм зыщытегущыIэнхэу агъэнэфэгъэ Iофыгъо 19 щызэхафыгъ. Iофтхьабзэр зэрищагъ АР-м и Къэралыгъо Совет — Хасэм и Тхьаматэу Владимир Нарожнэм.

АР-м иминистрэхэм я Кабинет хэтхэр, къэралыгъо хабзэм ифедеральнэ ыкIи иреспубликэ къулыкъухэм япащэхэр, шъолъыр къэбарлъыгъэIэс амалхэм ялIыкIохэр ащ хэлэжьагъэх.
Бюджет политикэм, мылъку ыкIи чIыгу зэфыщытыкIэхэм, социальнэ лъэ­ныкъом ыкIи къэлэгъэпсыным атегъэ­псыхьэгъэ хэбзэгъэуцу Iофыгъохэм ате­гущыIагъэх. Депутатхэм дырагъэ­штагъ АР-м иминистрэхэм я Кабинет къы­шIыгъэ зэфэхьысыжьым ыкIи аштагъ хэбзэгъэуцугъэу «Адыгэ Республикэм иреспубликэ бюджетэу 2024-рэ илъэсым телъытагъэм игъэцэкIэн ехьылIагъ» зыфиIорэр. Ащ хахъохэмкIэ иIахь сомэ миллиард 47,8-рэ, хъарджхэмкIэ сомэ миллиард 48,4-рэ хъугъэ, хахъохэм анахьи хъарджхэр сомэ миллион 537,8-кIэ нахьыб. «2024-рэ илъэсымкIэ бюджетым игъэцэкIэн зэфэхьысыжьэу фэ­хъугъэр, блэкIыгъэ илъэсхэм афэдэу, социальнэ лъэныкъор къызэрэзэтена­гъэр, финанс зыпкъыитыныгъэр, кредиторскэ чIыфэ къэмыгъэхъугъэныр ары. Республикэ бюджет системэм илъэныкъо пстэури зэдиштэнымкIэ ыкIи пшъэры­лъэу щытхэр гъэцэкIэгъэнхэмкIэ ихъухьагъэу щытыгъэ пстэури зэшIохыгъэ хъугъэ», — къыщиIуагъ игущыIэ АР-м и Къэра­лыгъо Совет — Хасэм и Тхьаматэ игуадзэу — мы лъэныкъомкIэ парламент комитетым ипащэу Iащэ Мухьамэд.
Адыгэ Республикэм и Къэралыгъо Совет — Хасэм АР-м иминистрэхэм я Кабинет къырихьыжьэгъэ Iофыгъо зэхэубытагъэхэу мэхьанэшхо зиIэ социальнэ лъэныкъохэм афэгъэхьыгъэхэм адыригъэштагъ. Ахэр зыфэгъэхьыгъэхэр кIэлэцIыкIу ибэхэу зипсауныгъэ амалхэр зэщыкъуагъэхэм шъолъырым ибюджет мылъкукIэ ятIонэрэ сэнэхьат гъэсэныгъэ IофшIэкIо къызэрыкIо ыкIи къулыкъушIэ хъунхэмкIэ егъэджэжьыгъэнхэм тегъэ­псыхьэгъэ программэхэмкIэ очнэ шIыкIэ­кIэ зэрагъэгъотышъуныр ары. Зэ­хъо­кIы­ныгъэхэр хагъэхьагъэх шъо­лъыр хэбзэгъэуцугъэу «КIэлэцIыкIу ибэхэмрэ алъы­плъэн зимыIэжьхэмрэ социальнэ IэпыIэгъу ягъэгъотыгъэнымкIэ шэс тедзэ­хэр пхырыщыгъэнхэм фэгъэхьыгъ» зы­фиIорэм.
Унэгъо ныбжьыкIэу ящэнэрэ е ащ къыкIэлъыкIорэ сабый къызфэхъурэм зэтыгъоу сомэ мин 300 фэтIупщыгъэныр хэбзэгъэуцугъэкIэ аштагъ. Ар къыуатыным пае уцугъуитIум уадиштэн фае: сабыим янэ-ятэхэм е ахэм ащыщэу зым ыныбжь илъэс 35-м ехъу хъущтэп, сабыир Адыгеим щатхыгъэу щытын фае.
Президентэу Владимир Путиным пшъэрылъ къызэришIыгъэм тетэу мы илъэсым иапэрэ мафэ къыщыублагъэу унагъохэу ящэнэрэ е ащ къыкIэлъыкIорэ сабый къызэрыхъухьагъэхэм псэупIэмкIэ ипотекэу аштагъэм итыжьын пэIуагъэ­хьанэу аратырэм сомэ миллионым нэ­сэу хэхъуагъ. ЫпэкIэ ар зэрэхъущты­гъэр сомэ мин 450-рэ. Зэхэсыгъом къызэрэщаIуагъэмкIэ, мы илъэсым сомэ мин 450-рэ зырыз унэгъо 24-мэ аратыгъах. Хэбзэгъэуцугъэр заштахэкIэ, мы уна­гъохэм джыри сомэ мин 550-рэ зырыз аIэкIагъэхьажьыщт пчъагъэр сомэ миллионым нэгъэсыжьыгъэным пае, къыщыкIигъэтхъыгъ гущыIэу къышIыгъэм Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.
Шъолъырым илъэныкъо зэфэшъхьаф­хэм яхэхъоныгъэ лъызгъэкIотэщт хэбзэ­гъэуцугъэу 6 депутатхэм аштагъ. Бюджетым, социальнэ, чIыгу, мылъку зэ­фыщытыкIэхэм ыкIи нэмыкIхэм ахэр япхыгъэх.
Зэхэсыгъом зэфэхьысыжь къыфишIызэ АР-м и Къэралыгъо Совет — Хасэм и Тхьаматэу Владимир Нарожнэм къы­Iуагъ Iофыгъуабэмэ игъэкIотыгъэу зэра­тегущыIагъэхэр ыкIи министрэхэм я Кабинет къэбарэу къыгъэхьазырыгъэр икъоу, гурыIогъошIоу зэрэщытымкIэ ирэзэныгъэ гущыIэхэр фигъэзагъэх. Анахьэу ащ анаIэ зытыригъэтыгъэр социальнэ лъэныкъохэмкIэ гукъэкIхэу хэбзэгъэуцухэм зыкIыныгъэ ахэлъэу зыдырагъэштагъэхэр ары.
«Президентэу Владимир Путиным къыгъэуцурэ пшъэрылъхэм татетэу гъэ­цэкIэкIо хабзэм тыригъусэу тиIофшIэн лъытэгъэкIуатэ сабыйхэр зиIэ унагъохэм, социальнэу мыухъумэгъэ цIыфхэм Iэпы­Iэгъоу ядгъэгъотырэм хэгъэхъогъэным ылъэныкъокIэ», — зэфэхьысыжь къы­шIыгъ Владимир Нарожнэм.