Псаухэу, узынчъэхэу къагъэзэжьыгъ!
Адыгеим ыкIи Пшызэ шъолъыр ащыпсэурэ быслъымэнхэм ащыщхэм хьадж къашIи, къагъэзэжьыгъ.
Шъугу къэдгъэкIыжьын, мыгъэ Адыгеим ыкIи Пшызэ шъолъыр ащыпсэурэ быслъымэн нэбгыри 110-рэ Чабэм хьаджэшI щыIагъэх. Ахэм пэщэныгъэ адызэрахьагъ Iимамхэу Минду Артуррэ Хьасани Мыхьамэтрэ.
ХьаджэшI щыIагъэхэр купитIу хъущтыгъэх. КъокIыпIэ Благъэм зэрэщыбырсырым ыпкъ къикIэу зы купым хэтхэр къэбыбыжьынхэ амылъэкIэу мэфэ заулэрэ ежагъэх. Арэу щытми, Тхьэм ишыкуркIэ, зэкIэри псаоу, узынчъэхэу яунагъохэм къагъэзэжьыгъ.
Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ имуфтий IэкIыб зэпхыныгъэхэмкIэ игуадзэу Хьасани Мыхьамэт къызэриIуагъэмкIэ, блэкIыгъэ илъэсым егъэпшагъэмэ, мыгъэ хьаджэшIыныр нахь псынкIэ къафэхъугъ, шэпхъэшIухэм атетэу рекIокIыгъ, ом изытети уигъэрэзэнэу щытыгъ. Къихьащт илъэсым щыIэщт хьаджэшIыным джы зыфагъэхьазырыщт, Чабэм кIо зышIоигъохэм ятхылъхэр мэкIэ-макIэу агъэхьазырыщтых.
КIАРЭ Фатим.