Адыгеим креативнэ индустриемкIэ иеджапIэ икIэлэеджакIохэр апэрэ Урысые фестивалэу «ШКИ Фест — 2025» зыфиIорэм хэлэжьагъэх ыкIи текIоныгъэ къыщыдахыгъ.

Рязань щыкIогъэ зэнэкъокъур мэфэкI шIыкIэм тетэу мэкъуогъум и 12-м зэфахьысыжьыгъ. Креативнэ индустриемкIэ Федерациер, Рязанскэ хэкум и Правительствэ ыкIи Роскультпроектыр Iофтхьабзэм кIэщагъо фэхъугъэх. Урысые Федерацием культурэмкIэ и Министерствэ IэпыIэгъу къафэхъугъ. Урысыем ичIыпIэ зэфэшъхьафхэм къарыкIыгъэ нэбгыри 156-рэ ащ хэлэжьагъ.
«КультурэмкIэ Урысые фонд» зыфи­Iорэм игранткIэ Iофтхьабзэр зэхащагъ, лъэпкъ проектэу «Унагъу» зыфиIорэм ифедеральнэ проектэу «Семейные ценности и инфраструктура культуры» зыфиIорэм ар къыдыхэлъытагъ.
МэфэкI зэхахьэм пэублэ псалъэ къы­щишIыгъ Урысые Федерацием культурэмкIэ иминистрэу Ольга Любимовам. Iоф­тхьабзэу зэхащагъэм сыд фэдэрэ лъэныкъокIи мэхьанэшхо зэриIэр, шIуа­гъэ къызэритыщтыр ащ хигъэунэфы­кIыгъ.

— Непэрэ мафэм Урысыем кре- ативнэ индустриемкIэ еджэпIэ 93-мэ Iоф щашIэ, илъэс къэс а пчъагъэм хэхъо. Сэнаущыгъэ зыхэлъ ныбжьыкIэхэр ахэм ащызэрэугъоих, зыкъызыщагъэлъэгъощт чIыпIэхэри нахьыбэ мэхъу. НыбжьыкIэхэм шIэны­гъакIэхэр зэрагъэгъотых, ягу­хэлъхэр щыIэныгъэм щыпхыращынхэ зэралъэкIыщтыр къагурэIо, — къыIуагъ УФ-м культурэмкIэ иминистрэ игуадзэу Жанна Алексеевам.
Рязанскэ хэкум культурэмкIэ иминистрэу Елена Рохлинам къызэриIуагъэмкIэ, апэрэ фестивалыр яшъолъыр зэрэщыкIорэм рэгушхох ыкIи ащкIэ пшъэ­дэкIыжь ин зэрахьырэр къагурэIо. Кре­­ативнэ индустриемкIэ еджэпIэ 70-мэ ялIыкIохэр Iофтхьабзэм хэлэжьагъэх, ахэм ащыщэу анахь дэгъоу зыкъэзыгъэ­лъэгъогъэ нэбгырэ 39-рэ фестивалым хэлэжьагъэх. УнэмкIэ гъэцэкIэжьынэу яIагъэр «2026-рэ илъэсыкIэм Рязань» зыфиIорэм епхыгъэ талисман къагъэхьазырыныр ары.
ОсэшIхэм анахь дэгъухэр къыхагъэщыгъэх. Талисман анахь дахэу агъэнэфагъэр Мыекъуапэ искусствэхэмкIэ икIэлэцIыкIу еджапIэу N 6-м ыгъэхьазырыгъэр ары. Рязань иархитектурэ саугъэт пхъэм хэшIыкIыгъэу ащ ыгъэ­хьазырыгъ.
Зыгъэхьазырыгъэр
Делэкъо Анет.