Нэбгырищмэ – балли 100 зырыз
ФизикэмкIэ ыкIи географиемкIэ зыкI къэралыгъо ушэтынхэм язэфэхьысыжьхэр къэнэфагъэх.
Илъэс пчъагъэхэм ежь кIэлэеджакIохэм зэрагъэгъотыгъэ шIэныгъэхэм ыкIи ахэм якIэлэегъаджэхэм, ны-тыхэм Iофэу ашIагъэм ар изэфэхьысыжь хъугъэ.
Апшъэрэ балл физикэмкIэ изыгъэкъугъэхэр Адыгэ республикэ гимназием икIэлэеджакIоу ХьакIмэфэ Мэдин ыкIи Мыекъопэ лицееу N 34-р къэзыухырэ Александр Мусиныр. ГеографиемкIэ балли 100 къыхьыгъ Мыекъопэ гурыт еджапIэу N 7-м икIэлэеджакIоу Роман Сафроновым. ТиныбжьыкIэхэм ыкIи ахэр езыгъэджагъэхэм гъэхъэгъэшIоу къагъэлъэгъуагъэмкIэ тафэгушIо!
Шъугу къэдгъэкIыжьын, тапэкIэ урысыбзэмкIэ зыкI къэралыгъо ушэтынэу атыгъэмкIи Александр Мусиным балли 100 ригъэкъугъ, профильнэ хьисапыр балл 95-кIэ ытхыгъ.
«Ащ фэдэ тиныбжьыкIэ губзыгъэхэм тарэгушхо! Апшъэрэ еджапIэу зыфаехэм ачIэхьанхэу, щыIэныгъэ гъогум гъэхъэгъэшIухэр щашIынхэу афэтэIо!» — къащитхыгъ КъумпIыл Мурат исоциальнэ нэкIубгъохэм.