Адыгэ Республикэм ипрофсоюзхэм я Федерацие зэхищэгъэ ятфэнэрэ зе­кIо слетыр Мыекъопэ районым щы­кIуагъ.

«Живи активно! Думай позитивно!» зыфиIорэ проектым игрант IэпыIэгъу ишIуагъэкIэ ар зэхащагъ.
Медицинэм, культурэм, гъэсэныгъэм яIофы­шIэхэм япрофсоюз организациехэм, общест­веннэ зэхахьэхэм ялIыкIохэр лъэныкъо зэ­фэшъхьафхэмкIэ зэнэкъокъугъэх, зэкIэмкIи ахэр команди 9 хъущтыгъэх. Зызыушэтыхэрэр мэзым хэтхэу зекIо пэрыохъухэр къызэра­нэкIыгъэх, яфизическэ ухьазырыныгъэ къагъэлъэгъуагъ. Ащ дакIоу хэушъхьафыкIыгъэ дзэ операцием хэлажьэхэрэм зэраготхэм, IэпыIэгъу афэхъунхэм зэрэфэхьазырхэм фы­тегъэпсыхьэгъэ дзэ-спорт эстафетэм хэлэ­жьагъэх. Джащ фэдэу зекIо орэдхэм якъэ­Iон­кIэ зэнэкъокъугъэх, профсоюз агитационнэ материалхэм ялъэтегъэуцохэр, краеведениемкIэ викторинэхэр зэхащагъэх. Творческэ лъэныкъомкIэ анахьэу анаIэ зытырагъэтыгъэр Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэр ары. Зэо лъэхъаным иорэдэу къаIуагъэхэр, мы уахътэм тисоветскэ цIыфхэм лIыхъужъныгъэу зэрахьагъэм фэгъэхьыгъэ усэу къызэджагъэ­хэр къэзэрэугъоигъэхэми осэшI купым хэтхэ­ми лъэшэу агу рихьыгъ. Мыщ дэжьым анахьэу анаIэ зытырагъэтыгъэр СССР-м и ЛIыхъужъхэу Адыгеим къыщыхъугъэхэм е щыпсэущтыгъэхэм афэгъэхьыгъэ къэбархэр ары.

Зэнэкъокъу зэфэшъхьафхэм язэфэхьысыжьхэм ялъытыгъэу текIоныгъэр ыкIи хагъэунэфыкIырэ чIыпIэхэр къыдэзыхыгъэхэр осэшIхэм къыхахыгъэх. Апэрэ чIыпIэр къыдихыгъ псауныгъэр къэухъумэгъэным иIофышIэхэм я Адыгэ республикэ профсоюз организацие (пащэр — Любовь Усачевар). ЯтIонэрэ хъугъэ Iахьзэхэлъ обществэу «Газ­пром газораспределение Майкоп» зыфиIорэм ипрофсоюз организацие (пащэр — Роман Тишаковыр). Ящэнэрэ чIыпIэр фагъэшъошагъ гъэсэныгъэм иIофышIэхэм я Адыгэ респуб­ликэ организацие (пащэр — Сергей Кошкиныр).
Iофтхьабзэм изэфэшIыжьын фэгъэхьыгъэ зэхахьэм хэлэжьагъэх Адыгэ Республикэм ипрофсоюзхэм я Федерацие итхьаматэу Устэ Руслъан, хьакIэхэр. ТекIоныгъэ ыкIи хагъэу­нэфыкIырэ чIыпIэхэр къыдэзыхыгъэхэм шIу­хьафтынхэр, кубокхэр афагъэшъошагъэх.